10
Ya Pagkurangan Na Istralita Kiden
1 A ya ibosag ku tekamuy, kahkahulun, a pake matakit ya nonot ku gafu ta kagittak kiden nga Istralita. A kanayun pakimallak ku kid petta mekerutan kid mina, 2 te amuk ta pake ikakinan da ya dumagdag ta lintig na Namaratu. Ammi intu dulay te killu garay ya pangawatan da, 3 te aweda haman amu ya iatad na Namaratu tekid petta matunung kid mina tentu. A gafu ta aweda amu a paruban da la ipasikkal ya katunung na bari da gafu ta pangdagdag da ta lintig na en. A yen ta aweda ikatalak ya iatad na Namaratu, petta mekwenta mina ta katunung da. 4 Ammi awan na haman ta serbi na lintigen nga ikatalak da, te ya pasi ni Hesusen ya addet na, a intun mina ya ikatalak da, petta mekwenta kid ta matunung gafu ta pangikatalak da tentu.
5 Intu mina pagnonotān da ya nesurat ni mina Moses ta idi, te ya uhohug na ta Istralita kiden a
“Am sigida idulot muy ya ngamin kiden nesurat ta lintig na Namaratu
petta awemuy pulus magliwat
a matolay kam sangaw magnayun gafu ta katunung muy,” kunna.
6 Ammi gafu ta awan ta awan nagliwat a nebar hapa ni Moses ta itta ya ikwenta na Namaratu ta katunung tam am ikatalak tam. A awena masapul ta itta ya magafu ta langit petta kurugan tam, te dana dumagut na haman i Hesusen. 7 A awena masapul ta itta ya magafu ta agyan na nagpasi kiden petta ibar na tekitam, te nasi haman i Hesusen a natolay hala. 8 Te ya ikwenta na Namaratu ta katunung tam a dana nepaita na haman ta bida na surat kiden nga kanayun basan tam ikid na nonotan tam. A yen hapa ya kanayun ipadpadangag mi ta ngamin tolay petta kurugan da. 9 Te am kurugan tam ta tinolay na Namaratu i Afu Hesus ta pasi na en, otturu ibosag tam ta intu hala ya dafu na ngamin a mekerutan kitam. 10 Te ya pangurug na nonot tam ya ikwenta na Namaratu ta katunung tam, a am yen ya ibosag tam a ikerutan na kitam. 11 A ya uhohug na hapa ta takday para na surat a
“Ya ngamin kiden mangikatalak tentu, a aweda sangaw melogot,” kunna.
12 Te maski am Hudyo kitam ono am Hentil kitam a awan ta idaduma na Namaratu tekitam am ikatalak tam i Afu Hesus. Te ya Dafu na takday a Dafu da ngamin, a malogon mangatad ta ngamin kiden makimallak tentu, 13 te ya uhohug na hapa ta takday ha na surat a
“Ya ngamin kiden makimallak ta Dafu tam ewan a ikerutan na kid,” kunna hapa.
14 Ammi aweda haman makimallak ta aweda ikatalak. A aweda ikatalak ya aweda en para la nadangag. A awan hapa ta madangag da am awan ta umange mangipadangag tekid. 15 A awan hapa ta ange mangipadangag am awena medob. Ammi nonotan tam ya nebar ni mina Isayas ta surat na en:
“Pake ispot ya umange kiden mangipadangag ta mappya en damag,” kunna.
16 A addu mantu ya nedob, a ispot hapa ya nepadangag da, ammi intu dulay te pake addun ya awan mangurug ta nepadangag da en. A naggagitta kid mantu ta dadagkal da kiden nga binida ni mina Isayasen,
“Ay Afu, manmano la ya nangurug ta nepadangag mi tekid,” kunna.
17 A ta kuman na inuhohug ken a awan ta mangurug am awan ta nadangag na, a awan ta madangag na am awena mepadangag ya uhohug ni Hesus tentu. 18 Ammi ya takday para saludsud ku gafu ta Istralita kiden a awan hud ta nangipadangag tekid? Itta haman, te
“Madangag haman ya ngahal na Namaratu addet ta ngamin paglelehutin.
A nepadangag ya uhohug na kiden addet ta ngamin kiden lugar ta lutakin,” kunna.
19 Ammi mabalin de ta awena maawatan na Istralita kiden? Ammi anu haman ta aweda maawatan? Te ya uhohug na Namaratu tekid a
“Pangahugun ta kam sangaw gafu ta takwan na tolay nga awan para la makkamu teyak,
a magtaratna kam sangaw gafu ta pangurug da teyak,” kunna.
20 A ya takday para uhohug na nga pake nepasikkal ni Isayasen tekid a
“Ya awan kiden nakanonot teyak ta idi a amu dak na, te maski awedak inapag a nakipakamu yak tekid,” kunna.
21 Ammi ya uhohug na en gafu ta Istralita kiden a
“Pake nabayagak na nga mangagagay ta masoysoy na tolay, ammi kanayun pagtalekudan dak,” kunna.
<- Roma 9Roma 11 ->