1 Apajuí, Israel aents aidaun kuitamnuh,

¡ame José wegantu aina duka

aents uwigjin kuitamas awekauwama numamtuk

kuitamsa awekame!

¡Ame querubin aidauk iname!

¡Iman asam Efraín wegantu aidau,

2 Benjamín wegantu aidau,

Manasés wegantu aidau wait anenjata!

Dutikakum amina senchigmijai uwemtikagtugta.

3 Tuke Pujuuwah, ¡iina pujutji yapagkagtuam

yaunchuk ayag iman ekagtita!

Dutikagtuawaminig jutiishkam uwemjagtatji.

4 Tuke Pujuu ashí senchigtinuh,

amina aentsjum aidau

segapainakui dakitam dusha

¿wajupa kuashta aikash pujugtatme?

5 Yutai sukagtumaina nunú

waitut sukagtusmayume,

tuja umutai umumaina nunú

waitiaku buutbau sukagtusmayume.

6 Iina nugkega nuna yantamen batsamin aina

nunú atsaneaku dushiktai ekagtiume.

7 Apajuí ashí senchigtinuh,

¡iina pujutji yapajiam

yaunchuk ayag iman ekagtita!

Dutikagtuawaminig jutiishkam uwemjagtatji.

8 Uva numiji*“Uva numiji” tawa nunak Israel aents aidau Egipto nugkanum batsatun Apajuí jiija yajuak Canaán nugkanum ikaunma, nuwi aents aidaun jiija utsaak nunú nugkanum batsasua nuna taku tawai. egiptunmaya jukim

juwi itaam, aents pegkegchau aidau

jiija utsaakum juju nugkanum ajabiume.

9 Dutikam shiig tsapaiti tusam nugka iwajabiume,

dutikawamin nuwi tsapaka

ashí nugkan jamagmayi.

10 Imaniku asa nunú tsakaak

muja aidaunak bikintu awajsabi;

dutikak numi múun aidaunash

nagkagag niina kanawen yutua asabi.

11 Imaniau asa kanawe aidauk

nayantsanum jegabi.

Tuja nuwi yama tsapaidaushkam

namak Eufratesa imanui jegabi.

12 Uva ajakbau peejamua dusha

¿wagka yumpuntuamesh agkantash awajtusume,

aents aidau nagkaemainak

akajag yajumtinme tusamesh?

13 Paki utsantua tegaja ijinui.

¡Kuntin ikamia aidau amuinawai!

14 Amek Apajuí ashí senchigtinaitme,

iman asam wait aneasam

nayaimpinum pujusam

juju uva ajakbauwa nunú kuitamkata.

15 Juju uva ayá duka ame ajakbau ainawai,

nuadui kuitamkata.

16 Tuja uva numijin tsupig apea ijinuk,

ameshkam dutiksamek ijinata.

17 Untsu apu ati tusa ame etegkamua duka

kuitamkata, dutikakum yaigta.

18 Tuja yamai nagkamsaik

makichkish aminig tsujakchattaji.

¡Pujut sukagtusta ima aminig

kajitmamsa batsamsagmi!

19 Chah, Tuke Pujuuwah, ametme

Apajuí ashí senchigtinmek,

nuadui ¡iina pujutji yapajiam

yaunchuk ayag iman ekagtita!

¡Dutikagtuawaminig jutiishkam uwemjagtatji!

<- Salmos 79Salmos 81 ->