1 Apajuíjuh,

ametme mina Apajuígmek,

Yama tsawamuik kashikmasan

wakejusan segajame,

wika amina wainkatasan wakegakun

kitamaku wajuktayama imaniajai.

Tuja yumi yutushtai nugka buku wajas,

yumin atsumak wajukchawash imaniawai,

mina iyashjuk amina atsumjamak.

2 Amina jem pegkegma nuwi wayan,

amina imanjumea nuna

senchigmijai wainkatasan wakegajai,

3 wagki amina anenkagmea duka

pujutan nagkaesauwai,

nuadui kantamkun ememattatjame.

4 Wika aminak tuke ememattinaitjame,

nuniakun mina uwejun takuin

amina aujtatjame.

5 Aents yutai pegkejan yuwa

shiig aneas pujuuwa numamtuk wika shiig aneasan pujuttajai,

nuadui shiig aneasan

kantamkun ememattatjame.

6 Kashi kanaku tepesnush

aminí anentaimsanuk tepajai.

7 Ametme mina yaintumek;

nuadui aminí yunumsan

ame kuitamjusamin shiig aneasan pujujai.

8 Ashí mina pujutjua nunak

amina amaajai, wagki ame minak

amina senchigmin kuitamjame.

9 Mina mantuawagtatus

wakejutuina duka ijinata,

dutikam initak yutuam emegkagta.

10 ¡Ditak nagkí iju maam agtinai,

dutikamun ikamia yawá yukagtin aidau

ditá iyashinak yuwawagtinai!

11 ¡Untsu apuk, Apajuíyai shiig aneastinai!

¡Tuja ashí aents Apajuín daajin chichau aidaushkam

shiig anentsag kantamjuawagtinai!

Untsu waitjin aina nuna weninak

Apajuí ashí epetjatnai.

<- Salmos 62Salmos 64 ->