Marcos 9

1 Junashkam Jesús chichaak:

—Dekas tajime: Atum jui ijunjum juiyatijum ujumak aidautijum eke jatsuk iwaaku pujusjumek, Apajuí inama nu senchijijai minau wainkatnutigmesh ajume, tiuwai.

Jesús yapajinamu

(Mt. 17.1-13; Lc. 9.28-36)

2 Jesusak seis tsawan nagkaemakiu ai, Pedron, Jacobon, Juagkan aatus juki ditanak akanki muja yakí tsakajunum weuwai. Nui ditá eemtin, Jesusa niimé yapajinauwai. 3 Jaanchjig winchamtin, shiig puju, nugkanmaya jaanchi nijaukesh imatikag puju emamainchau aajakui. 4 Nuniai Moisés, Elías aatus Jesusjai chichaidaun wainkajui. 5 Nunik Pedro Jesusan chichajak:

—Maestroh, pegkejai jutii jui batsatag duka, nuniau asá kampatum aak aakmakagmi. Makichik aminu, tikich Moisesdau nuigtú Eliasdau, tau.

6 Nunak ni tabaujinakesh dekachiatak tiuwai, wagki ishamkaju asag. 7 Nuna taig yujagkim ijikui, nuniai yujagminmaya chichaak: “Juuwai mina uchig anetaijuk, ni antugkatajum”, tabaun antukajui. 8 Nuna taig diikmá, imá Jesusnak wainkajui nuigtú tikichik atsuidau.

9 Nunik mujanmaya akaebaunum, dita wainkamujinak Aentsmaga akiinauwa nu jaka nantatsaigkik makichik aentsnakesh ujakainum tusa akatjajui. 10 Tibau asag ditakek pachitsuk idaiyinayatak, jaka nantatsaigkik tawa nunash wajukatnunak tawa tusag iniinidau. 11 Nuninak Jesusan iniinak:

—¿Wagka maestro chicham umiktinun jintinkagtin aidaush, dekatkauk Eliasá taatnai tuinawa?, tuidau.

12 Tiagtai Jesús ditan ayaak:

—Dekaskenmag Eliasak niiyá eemak taatnai nunik ashí wají aidaunak ni ataktú iwajatnai. Tujash ¿Aentsmaga akiinau pachisaish wajintu agagbauwaita, senchi waittsatnai nuigtush dakitjamu atinai tatsuak? 13 Tujash wi tajime: Eliasak taabi, nunikmataish ashí dita wakegaina dutiksag inagkeatkiagmayi, agagbaunum niina pachis tawa dutiksag, tiuwai.

Wakan pegkegchau uchin egkemtuamun Jesús etsagagbau

(Mt. 17.14-21; Lc. 9.37-43)

14 Nunik ni jintintaiji aidau batsatbaunum jegakmá, wainkaju kuashat aents tuwajuk aun, tuja maestro chicham umiktinun jintinkagtinchakam ditajai tudayinaun. 15 Nunidau Jesusan wainkag puyatuk tupikatkiag jegaantag kumpamawajui. 16 Nunikmatai ditan iniak:

—¿Wají pachisjumea ditajaish tudaijume?, tau.

17 Tutai aents tuwakbaunmaya makichik ayaak:

—Maestroh, mina uchijun wakan pegkegchau egkemtua chichachu etugtimun amina itajuajame. 18 Junak wakan egkemtakug nugká ajinuwe, nunik saun apak, nain takegtak, ichichkam patamnuwe. Imatijutin asamtai amina jintintaijum aidaun jigtugkitajum timajai, tujash tujinkagmae, tau.

19 Tutai Jesús ayaak:

—¡Aents dekaskeapi tuchau aidauwah! ¿Wajupá dukapea atumjaish pujumainaitja? ¿wajupá dukapek dakastajime minak dekaskeapi tujuttinme tusanush? Jui uchi itantá, tiuwai.

20 Timatai uchin ejentuntaju. Dutikam wakan pegkegchaushkam Jesusan wainak uchinak waugmitkak nugká ajiaju, dutikam tadaegak saun apakú; 21 nunitai Jesús uchí apajin iniak:

—¿Junash wajutí nagkamsaya imatikawa?, tau.

Tama ni ayaak:

—Uchuch aig nagkamas. 22 Dutikau asa kuashtá jinumash patakta tinuwe, namakash ajug maata tinuwe. Ame machikish dutikmainaitkumek, jutiish wait anenkagtujam yaijatkata, tau.

23 Tutai Jesús ayaak:

—Dekaskeapi tumainaitkuminig, dekaskeapi tawa nudauk ashí dutikmain ajawai, tau.

24 Tusa taig uchí apajishkam untsumak:

—¡Dekaskeapi tajai! ¡Wi dekaskeapi tachakuish yainkata!, tiuwai.

25 Jesús kuashat aents tuwagtai wainak, wakan pegkegchaun jiyak:

—Wakan chichachu empekuwah, wi tajame: ¡Jiinkim ukuktá, ataktuk waketjukmek egkemtuawaipa!, tiuwai.

26 Tama wakanchakam untsumak uchin kujamtikak waugmitkak jiinkiuwai, nunikmatai uchik jaka iyaantu. Nunitai kuashat aents chichainak:

—Jakajamah, tuidau.

27 Tujash Jesús uwegnum achiká inankiu, dutikam wajainiu.

28 Nuna dutika Jesús jegá wayamtai, jintintaiji aidau agkan niinak iniinak:

—¿Wagka jutiish jiiktakamaish tujinkamji?, tuidau.

29 Tiagtai ni ayaak:

—Tujash ju wakania juka junisaikik jimaitsui ayuno takaaku Apajuí aujku jiimainai, tiuwai.

Jesús awentsag ni mantamnatnuji etsegkamu

(Mt. 17.22-23; Lc. 9.43-45)

30 Nuwiya jiinki Galilea wegamunum makichik aentskesh dekawainum tusa Jesús dakitau, 31 wagki ni jintintaiji aidaun jintintu asa. Nunik:

—Aentsmaga akiinauwa nunak aents aidaunum sujukagtatui, dutikawagmatai maawagtatui. Tujash jakaashkam kampatum tsawanta jui nantaktatui, tau.

32 Tutaish ditak ni tawa nunak dekamain dekapenachu, nuninakush ishamaidau asag iniaschajui.

Yaki dekas imá wagaakush atinaita tiagbau

(Mt. 18.1-5; Lc. 9.46-48)

33 Yaakat Capernaúm jegawajui, nunik nui jegá batsatbaunum Jesús jintintaiji aidaun: ¿Jintaa minisjumesh wají tudaimugme?, tau. 34 Tujash ditak chichainachu, wagki jintaa minisag ditak pempeentunikiag, yaki imá wagaakush atinaita tudaiyaju asag. 35 Nuniagtai ekeemsau, nunik jintintaiji doce aina nuna untsuká: Ni dekatkau atatus wakegauk, ashí tikich aina nuna ukujin amainai, nuniak ashí tikich aidaun takajin amainai. 36 Nuna tii uchin juki ejapen awasauwai, dutika minaaki juki chichaak: 37 Ju uchia junin aidaun mina daajui juidauk, mina jujuinawai; tuja mina jujuina duka, minakek jujuinatsui, mina awetiuwa nunash juwinawai.

Jutiin shiwagmatjamtsu duka jutiinu asa aniawai

(Lc. 9.49-50)

38 Tutai Juan chichaak:

—Maestroh, makichik wainkamji amina daagmin iwanchin jiyau, tujash jutiijai minitan dakitakui, amek aikawaipa timaji, tau.

39 Tutai Jesús ayaak:

—Atumek aikawaipa tusagmek tiigpajum. Makichik aentskesh mina daajui wainchatain iwainayatkug, pempeentugsagkek pegkegchaunak chichagtumaitsui. 40 Jutiin shiwagmatjamtsu duka, jutiinu asa nuniawai. 41 Tuja makichik aentskesh atumin mina daajui, Cristunu asagmin yumin amasú aidauk, dekas tajime, dita wají shiig pegkeg jukitnujiya nunak megkaekachagtinai.

Tikichin pegkegchau takamtikaidau tibau

(Mt. 18.6-9; Lc. 17.1-2)

42 “Makichkikesh jujú piipich aina juiya mina dekaskeapi tujutuina nuna tudaun takamtikaidauk, dekas kaya muun juki kuntugnum jigká detua nayantsa kunajin ajugká ajapmainus ajapachbau ainatai. 43 Amina uwejum tudau takamtijamkuig tsupikta, dekas pegkejai muntuch wajasá pujut tuke atina nui wayamuk, jimá uwegtin asá waitiaku pujutai, jii tuke kajinchaunum waimaina nu, 44 nuig akash jinuchu nuigtú jiishkam tuke kajinchauwa nui. 45 Tuja amina dawem tudau takamtijamkuig tsupikta, dekas pegkejai pujut tuke atina nui shutusá wayamuk, jimá nawentin asá waitiaku pujutai, jii tuke kajinchaunum ajapeam amaina nu, 46 nuig akash jinuchu nuigtú jiishkam tuke kajinchauwa nui. 47 Amina jiim tudaun takamtijamkuig ukuinkata, dekas pegkejai Apajuí inamtaijiya nui makichik jiintin wayamu, jimag jiintin asá waitut tuke atina nui ajapeam amaina nu, 48 nuig akash jinuchu nuigtú jiishkam tuke kajinchauwa nui.

49 “Wagki ashí nunú aidauk weejai kachitiama numamtuk jiiyai kachiam agtinai. 50 Week[a] pegkejai; tujash jea jeatuji megkaekamtaish, ¿utugsaiya ataktush jea jeatush emamainaita? Atuminish weega numamtin ajutjabiagti nuigtú shiig agkan tikichjai pujamush ajutjamtinme”.

<- Marcos 8 Marcos 10 ->