Marcos 3

Tsawan ayamtai ai Jesús aents jau etsagagbau

(Mt. 12.9-14; Lc. 6.6-11)

1 Jesús ataktú jega ijuntainum wayau, nuwi aents uwejí jaka ekeemkau pujau. 2 Nunitai dii ijuntuidau tsawan ayamtai aish etsagagchatpash tusag tsanumjugtatus. 3 Nuninaig Jesús aents uwejí jaka ekeemkaun chichajak:

—Wajaktá nunikam ejapen wajantá, tiuwai.

4 Nuna ti, tikich aidaun chichajak:

—¿Tsawan ayamtai aina nuish pegkejan dutikati atsa pegkegchaun dutikati tibaukaih; etsagautskek jakati tusa idaimainait?, tau.

Tamash ditak aimainachu. 5 Nuna ti nui ijuntatman kajeká, wake besemag diisú antumtikmainchau asagmatai. Nunik nuna aentsun chichajak:

—Uwejum dakuekta, tiuwai.

Tama niishkam uwejin dakueku, nuniamuik uwejenig pegkeg wajasui. 6 Dutikamtai fariseo aidau, Herodesan aentsji aidaujai agaa jiinjag, Jesusan maatasag chichaman umigkajui.

Kuashat jau aidau Jesús etsagakbau

7 Tujash Jesusak ni jintintaiji aidaujai kuchanum weajui, nuniai kuashat aents galileanmaya aidau, Judeanmaya aidaushkam, 8 Jerusalegnumiashkam, idumeanmaya aidaush, Jordagka amain batsamin aidaushkam nuigtú Tiro, Sidón aina nuwi tikiju batsamin aidaush minitiajui, Jesús kuashat iwainaka takaamun antukaju asag wainkagtatus. 9 Nuniau asamtai, Jesusak ni jintintaiji aidaun, kuashat aents kaunainak chanuntuawainum tau asa barca yaijan shiig umis asatnume tusa ujakajui; 10 wagki kuashat jau aidaun etsagau asamtai, ashí najaimak waituidauk niina antigkagtatus awagkemtuidau asamtai.

11 Tuja wakan pegkegchau aidauk Jesusan wainkag, niina eemtin tikishmajag, senchi untsumkag:

—Amek Apajuí Uchijiyaitme, tuidau.

12 Tujash Jesusak senchi jiyau, dekajuawainum tau asa.

Jesús ni apostolji agtin aidau etejamu

(Mt. 10.1-4; Lc. 6.12-16)

13 Nunik Jesús mujanum wakauwai, nui untsukui ni wakegamu aidaun, dutikam niiní kauntajui. 14 Dutika nuanuiyan etegjauwai doce, nunú aidaunak apóstol tusa adaijauwai tuke niijai ijunja wekaesatin aidaun, niina chichame etsegkati tusa ishiaktinji aina nuna, 15 dutikak wakan pegkegchau aidau egkemtugbau jiiktinnashkam senchijin susauwai. 16 Doce etegjamua duka ju ainawai: Simón, Pedro atatme tibauwa nu, 17 Jacobo ni yachi Juagjai, Zebedeo uchijí aidaun Jesús Boanerges adaikajua nu (nunak “ipamta uchijí aidau” taku tawai), 18 Andrés, Felipe, Bartolomé, Mateo, Tomás, Jacobo Alfeo uchijí, Tadeo, tikich Simón cananeo tutai aajakua nu, 19 nuigtú Judas Iscariote Jesusan sujukua nunú.

Jesusak Beelzebú senchijin wakan pegkegchaunak jiyawai tibau

(Mt. 12.22-30; Lc. 11.14-23; 12.10)

20 Nuna dutika Jesús jegá wayauwai, nunikmatai ataktushkam aents aidau tuwagkag yujumkash yumainchau awajuidau. 21 Nuna antukag Jesusa patayí aidau jukitasag kautuawaju, anentainkachu wajas wekaetsuash tuidau asag.

22 Maestro chicham umiktinun jintinkagtin aidau Jerusalegnumia kaunawaju aidau chichainak: “Beelzebú, iwanch aidau apujiya nuna senchijin iwanch aidaunak jiyawai”, tuidau.

23 Tiagtai Jesús ditan untsuká, augmatbaun pachis ujaak: ¿Utugkaya iwanchish, iwanchnash jiimainaita? 24 “Makichik nugkanmag batsatiatak pempeentuniki maaní batsatkug megkaemain ainawai. 25 Tuja makichik jeganmag ijunag batsatiatak pempeentunikiag maaní batsatushkam megkaemain ainawai. 26 Aantsag Iwanchia dushakam pempeentuniki, maaniakug, megkaemain ainawai, nuniakug nagkanbauji jegajim nunimainai.

27 “Aents senchigtina nuna jeen wayag makichkish wajiijinak yajutmainchau ainawai nuna jigkatskek, untsu nuna jigkajá wajiijinak yajutmain ainawai.

Wakaní Pegkeji pachisa Jesús tibau

(Mt. 12.31-37)

28 “Dekas tajime, Apajuik ashí aentsú tudaujinak tsagkujatnai, niina pegkegchau chichagkau aidaunashkam, 29 tujash Wakaní Pegkejin pegkegchaun chichagkau aidauk, tuke tsagkugnagchatnai, ajumaish tudaujig tuke atinai”.

30 Nunak Jesusak: “Wakan pegkegchau ajawai” tibau asa tiuwai.

Jesusa dukují ni yachi aidaujai kautuamu

(Mt. 12.46-50; Lc. 8.19-21)

31 Nuna tusa inagnaku ai Jesusa yachi aidau dukujijai kautuawaju, nunikag agaag ijuntsag, untsugtuktajum tiajui. 32 Tuinam Jesusan tenteawag pekajuidau ujainak:

—Amina duku, yatsum umaim aidaujai agaa ijunas egapainawai, tuidau.

33 Tusá ujaam ni ayaak:

—¿Yaita mina dukug, mina yatsug aidaush?

34 Nuna tusa nui pekajuidaun ayampatua:

—Jujú ainawai mina dukug, mina yatsug aidauk. 35 Ashí aents Apajuí wakejamun takaina nuuwai mina dukug, mina yatsug, mina ubag aidauk, tiuwai.

<- Marcos 2 Marcos 4 ->