Mateo 4

Iwanch Jesusan pegkegchaunum dekapsamu

(Mr. 1.12-13; Lc. 4.1-13)

1 Nunikmatai Wakaní Pegkeji Jesusan juki emauwai uwegshunum, Iwanch[a] dekapsati tusa. 2 Dutikam cuarenta tsawai, cuarenta kashi, ayuná pujau asa, yapajuauwai. 3 Nunitai Iwanch Jesusa jegantun chichajak:

—Ame dekas Apajuí Uchijiyaitkumek, ju kaya aina jujú pag najankam yuakia, tau.

4 Tama Jesús ayaak:

—Agagbau awai: “Aentsuk imá pagjaigkik pujumaitsui, ashí chicham Apajuí wenin jiina nujai pujumainai” tawai, tiuwai.

5 Timatai, Iwanch Jesusan yaakat pegkejam Jerusalegka nui emauwai, dutika jega Apajuí ememattai jegamkamunum yakí nagkatkamunum iwaká awajus, 6 chichajak:

—Ame dekas Apajuí Uchijiyaitkumek tsekem iyata, wagki agagbau awai:

“Apajuí ángel aidaun awetugmattawai, dutikam dita achigmakagtatui kayá tukumkai tusa” tiuwai.

7 Tama Jesús ayaak:

—Dushakam agagbau awai: “Amina Apujum Apajuiya nu pegkegchaunum dekapsatasamek wakeyipa” tawai, tiu.

8 Timatai nuigtú Iwanch Jesusan muja tsakajunum iwakui. Dutika ashí nugkanmaya yaakat aidau shiig wiakuch senchigtin aina nuna iwaintukui, nuigtú ashí nuna imanji aina nunashkam iwaintukui, 9 dutika chichajak:

—Ashí junak amina amastajame tikishmajam emematjakminig, tau.

10 Tama Jesús ayaak:

—¡Wetá Iwanchih![b] agagbau awai: “Amina Apujum Apajuiya duke emematta, nuniakum imá nigki umigkata” tawai, tiu.

11 Tima Iwanchik ukukiuwai. Nunikmatai ángel aidau kautuawajui kuitamkagtatus.

Jesús Galileanum takatji nagkamamu

(Mr. 1.14-15; Lc. 4.14-15)

12 Jesús, Juagkan achikag egkeawaje tabaun antuk Galilea wakitkiuwai. 13 Tujash Nazaretak juwakchauwai, yaakat Capernaúm Galilea kuchajin uwetus awa nui jegaa pujusui, Zabulón, Neftalí aajakajua nuna nugke aajakua nui. 14 Aatus uminkauwai, yaunchuk profeta Isaías tibauwa nunú:

15 “Zabulogka nugke nuigtú Neftalí nugke, nayantsa yantamen batsamin aidau, Jordagka amain batsamnushkam, Galilea judiochu aidau batsata dushakam;

16 Aents aidau suwenum yujau agma nunú tsaaptinun wainkaje; tuja suwenum batsatunash tsaaptin etsantug wajantae”, tawai.

17 Nui nagkama Jesús chichagkagtak: “Tudau takatak idaikujum pujutjum yapajiatajum, wagki Apajuí aentsnum inamjatta duka tikijuch wajasé”, tau.

Jesús ni jintintaiji atinun cuatro namaká main aidaun yajuakbau

(Mr. 1.16-20; Lc. 5.1-11)

18 Jesús Galilea kuchajin wekaekamá Simón, Pedro daagtina nuna, ni yachi Andresjai namakan main asag retan kuchanum ajuntuinak yujattaman wainkau, 19 nunik Jesús chichajak:

—Minitajum wi jintintuatjime, namak maatasa yujagjum anmamtuk, Apajuí chichame etsegkujum aents aidau minai ikautjin atajum tusan, tau.

20 Nu tamawaik, ditá redjinak ukuinak niijai weajui.

21 Nunik Jesús machik kuwaesag wekamá, Jacobon yachijai Juagjai, apají Zebedeo aatus barcanum chimpimas redjin apijuinak chimpimtatman wainak, ditanash Jesús untsukú.

22 Tamawaik ditashkam:

—Barcanak ukuinak, apajinashkam ukukiag Jesusjai weajui.

Jesús Galilea chichagkagtaku jau aidau etsagakbau

(Lc. 6.17-19)

23 Jesusak ashí Galilea nugkanum wekaegas, jega ditá ijuntai aidaunum wayá jintinkagtau, nuniak yamajam chichaman Apajuí inabaujiya nuna pachis etseju nuniak ashí jatai jau aidaunash nuigtú najaibau aidaunashkam etsagau. 24 Nu dutikamua duka ashí Sirianmag antuekauwai nunikmatai itajuidau ashí jatai jau aidaun, nuigtú pegkegchau ajamu waituidaun, wakan pegkegchau egkemtuamunash, kukujiyai jau aidaun, pimpijú aidaunashkam, dutikam Jesuschakam ashí etsagakui.

25 Nunitai kuashat aents aidau galileanmaya, decapolisnumia, jerusalegnumia, judeanmaya nuigtú Jordagkan amain batsamin aidaush Jesusan saetuidau.

<- Mateo 3 Mateo 5 ->