Lucas 24

Jesús nantakbau

(Mt. 28.1-10; Mr. 16.1-8; Jn. 20.1-10)

1 Tumig tsawagmatai shiig kashikmasag nuwa aidau kugkuin shiig pegkeg najanamujin jukiag, Jesús ukusbaunum wegaju. 2 Nunik jegakmag ukumatai kaya muuntai epenbauk ekemak atatman wainkaju; 3 nunik utuawaju, tujash Apu Jesusa iyashinak wainkachajui. 4 Nunikag puyatkag, wajukamki tusag iniininak wajainai, jimag aents jaanch winchamtinun nugkuaju ditai ayaumas wajaantaju. 5 Nuna wainkag senchi ishamkag, nugká tsuntsumá ijunainai chichajak:

—¿Wagka iwaaku pujaush jakau ukutainmash egagme? 6 Juig atsawai, nantakne. Adeagtajum ni Galilea pujus chichaak: 7 “Aentsmaga akiinauwa nunak, aents tudaugtin aidaunum sujukagtatui dutikawagmatai achijag maawagtatui, dutikam kampatum tsawanta jui nantaktatui”, tujabiajua nu.

8 Tama ditashkam Jesús chichaak nuniktatjai tibauwa nuna adeajaju. 9 Nunik ukusbaunmaya waketug jegawag, ashí dita wainkamujinak niina jintintaiji once juwakajua nuna ujakajui nuigtú tikich aidaunashkam. 10 Apóstol aidaun ujakajua duka: María magdalanmaya, Juana, tikich María Jacobo dukujiya nunú, nuigtú tikich nuwa aidau aajakajui. 11 Nuwa tusa etsejiagtaish, wainak tu yujatsuash tusag, ditak dekaskeapi tichajui.

12 Nuniagtai Pedrok jiinkug tupi tupikakua Jesús ukusbaunum jegantá, tekená diikmá imá sabananak wainkauwai, nunik anentai jegacha wajukamki tusa ane anentaimkawa jegá wakitkiuwai.

Emaús wedaun wantintukbau

(Mr. 16.12-13)

13 Nunú tsawantinig, Jesusa jintintaiji aina nuiya jimag, yaakat yaijuch Emaús tutainum wedau, Jerusalén juwaki once kilómetro awa nui jegawagtatus. 14 Nunik weenak ashí Jesús dutikamun pachisag chichai chichainakua weedau. 15 Nuna tuinak ditak tudayinai, Jesuschakam amainag ditajai ijunag ashinu. 16 Tujash ditak, wainainayatkush Jesusapita tuinachu. 17 Nudiagtai Jesús iniak:

—¿Jintá wesagmesh, wají pachisjumea chichamugme? Tau. Tama wake besekag ijuntsajui.

18 Tutai Cleofas daagtin ayaak:

—¿Imá amekek ashí wají Jerusalén nagkaemaki nunú dekatsum? Tau.

19 Tama ni iniak:

—¿Wají nagkaemakne? Tau.

Tutai: —Jesús nazaretnumia profeta aayi, takaamujish tuja chichamesh senchigtin Apajuí eemtin nuigtú ashí aents aidaunmashkam; 20 nuna, sacerdote apuji aidau nuigtú jutii gobernanteji aidaujai sujukagmae achijag maatnume tusa. 21 Tujash jutiik, niimpap Apu wajas Israel aidautinak agkanmitkagmattaji tusa dakauji. Nuna dutikawaja duka kampatum tsawan nagkaemawai. 22 Nuniamunum ujumak nuwa jutiijai yujau aidau kashikmas Jesús ukusbaunum wegaju, anentai jegamainchaun, 23 Jesusa iyashin wainkachag, waketug kaunawag, ángel aidau wainkamji nunika ajin, Jesusak iwaaku pujawai tujamaji tusa etsejiagtai, 24 ujumak jutii kumpají aidau Jesús ukusbaunum wegag, nuwa tiaja nunak imatiksag wainkaje, tujash Jesusnak wainkachaje, tuidau.

25 Tiagtai Jesús ayaak:

—¡Wagka anentainkachush ainagme nuigtush dekaskeapi tumainchauk dekapeajum ashí profeta tiajua duka! 26 ¿Atumek dekatsjumek Cristuk niina imanjiya nuwig eke waitsuk waittsatna duka?

27 Tusa, Moisés agagbauwa nui nagkamas nuigtú ashí profeta aidau, ashí agagbaunum niina pachis tawa nuna ujakajui.

28 Nunik yaakat yaijuch Emaús jegamunum, Jesusak nagkaemaki wegau, nuní atushat wegau wajukmaina numamtuk. 29 Nunitai dita chichajuinak:

—Jui jutiijai juwakta, kiyawai, tuidau.

Tiagtai Jesuschakam wayauwai ditajai juwaktatus. 30 Nunik ditajai mesanum jegantá pekagbaunum, pagkan juki Apajuin see tusa puukú, dutika susaju. 31 Nuna dutiktai dekawajui Jesusapi tusag, nuniaig nigka megkaekauwai. 32 Nunikmatai ditak pempeentunikiag:

—¿Wagkaik jintá minis Apajuí chichameg nuní awai tusa ujapakui, shiig aneasua minimag duwish anentaimjaish diischamji? tudayinau.

33 Tusag tamawaik jiinjag Jerusalén wakitkiajui, nunik jegakmag once aina nu nuigtú tikich aidaujai ijunag batsatun wainkajui. 34 Nunik kaunamtai ujainak:

—Dekas Apu Jesusak nantakne, nunik Simogkan wantintuke, tuidau.

35 Tama ditashkam jintá wesá wainkamun nuigtú pag puuká susam Jesusapi tusa dekamujin pachis ujaidau.

Jesús jintintaiji aidau wantintukbau

(Mt. 28.16-20; Mr. 16.14-18; Jn. 20.19-23; Tak. 1.4-9)

36 Nuna pachisag chichainak batsatai, Jesús ditá ejapen wajantá, chichaak: —Agkan pujamu atumnash ajutjamti, tau.

37 Tama ditak senchi ishamkaju, wakan waintsujiash tusag. 38 Nuniagtai ditan chichajak:

—¿Wagka imaanikjumesh ishamagme? ¿Wagka utujimsagmesh anentaimjutjume? 39 Mina uweg aidau diistajum nuigtú daweg aina dushakam, witjai, achigká diigsatajum; makichik wakanik nejeesh ukunchí aidaukesh atsugnai, mina ajutu wainjum junikag.

40 Nuna tii niina uwejin, dawenmashkam achiamu aajakua nuna ditan inaktusajui. 41 Dutikam wainkag shiig aneenayatak dekas nantakneapi tumainchau dekapiagtai:

—¿Yumainuk atsugtamainawak? tau.

42 Tutai makichik namak achijuamun kupik susaju, 43 dutikam niishkam juki ditá eemtin yuwauwai. 44 Nunik chichaak: Juna pachisan atumjai pujubiag duwi, Moisés chicham umiktin agagbaunum, profeta aidau agajajua nuwish nuigtú salmosnum ashí mina pachitus agagbauwa duka uminkattawai tusan ujayajime, tiuwai.

45 Nuna aatus taku Apajuí chichamen agagbauwa nuna shiig dekamtikawajui. 46 Nuna ti nuigtú chichaak: —Aaja agagbauwai, Cristuk jakatnai, nunik kampatum tsawanta jui nantaktinai, 47 nunikmatai niina daajin pachis chichagkagtuinak ashí nugkanmaya aidaush anentai yapajiawag, tudaujin tsagkugnagtinme tusag, duka Jerusalén nagkamsajum 48 atum ainagme ju ashí wainkaujum nunú etsejatin aidautigmek. 49 Tujash yamaikik Jerusalegkak juwaktajum, nuniagmin wi mina Apag Wakaní Pegkejin anagtamawajua nuna awetitjime, nunikmatai nayaimpinmaya senchi jukitajum, tiuwai.

Jesús nayaimpinum wakitkimu

(Mr. 16.19-20; Tak. 1.9-14)

50 Nunik Jesusak jintintaiji aidaun yajuak yaakta ukumtiki Betania ejegawajui, nunik nui Jesús uwejin takui: Apajuí yaimpakti, tiuwai. 51 Tusa Apajuí yaimpaktinme tamawaik yakí takuniuwai, nunik nayaimpinum wakitkiuwai. 52 Nunikmatai ememati ukuinak, shiig aneasag Jerusalén waketjajui. 53 Nunikag jega Apajuí ememattainum kashí kashinig tuke ijuntsagké aidau Apajuin emematuinak.

<- Lucas 23