“Juju nugkanmayag waitjutsuk chichauk atsawai,

tikichjaish aneeninatsui.

Tuja minashkam iina Apajuíjiyapi tujutuinatsui.

Nuadui juju nugka juwi batsamin aidaunak

Apajuí chichaman umigkae.

2 Juju nugka juwig ayatak waitjamu,

umikchatnaitak Apajuí daaji adaisa tsanumat,

magkagtut, kasamat, nuwennush, aishinnush

antugdayas batsamtsuk ikagdaibau,

aju ajumag magkagtamu aina duke piyak awai.

3 Iman wajas au asamtai, aents aidauk buutuinawai,

nuninak kakaagchamin dekapenawai,

tuja kuntin ikamia aidaush, chigki aidaush,

namak nayantsanmaya aidaush ashí jinuinawai.”

4 Tuke Pujuu chichaak:

“¡Sacerdote aidauk makichkikesh

tikich aidaunak jiyakchati!

Tuja utugchatnakesh apujtuschati.

Wika atum sacerdote aidautigminak kajejajime.

5 Atumek tsawaish kashish,

tuke pegkegchau takamjume,

nuniakjum tikich profeta aidaush,

pegkegchau takamtikagme.

Nunin asagmin amina aentsjum aidaunak ijinattajai.

6 Mina aentsug aidauk dita Apajuíjichua nunin anenjuidau asagmatai ijinauwaitjai.

Untsu amek sacerdote mina umigtukchau asamin,

wi aminak ajapattagme,

wagki amek mina chichameg umikchaume,

nuadui atum wegantu aidaunashkam pachikchatnaitjai.

7 Kuashat sacerdote kawenakug,

imanisag pegkegchaun takainak mina shiwagmatiagmayi.

Nuadui eme anentam aina nunak,

dushiktai awajsagtatjai.

8 Tuja mina aentsug aidau

dita tudaujin tsagkugnajagtatus

kuntinun ikaunmagtai Sacerdote aidauk nuna yusa batsatu asag,

puyatjutsuk pegkegchaun takastinme tusag idayinawai.

9 Nunin asagmatai, ditanak mina aentsug aidaujai ijumjan

suwimkan susagtatjai.

10 Mina umigtutan idaisaju asag

imanik yuwinakush shiig aneasag pujuschagtinai.

Tuja uchi akiami tusag tuinakush

uchinash akiachagtinai”, tawai.

11 Nuigtushkam Apajuí chichaak:

“Israel aents aidauk nuwan yujajuinak,

vino nampe yujau asag, shiig anentaimja

pujumainjig atsujuinawai.

12 Nunin asag numi dakumka najanamu aidaun wajinjutpatig,

tuja atakea duish wajukatnukitji tusag

nuna jegantun iini yujawai.

Pakijintanak idaimainchau dekapedau asag,

mina aentsug aidauk nuna yujajuinak

mina umigtutan tupanjujag wagakag wainak yujawai.

13 Nugka nainnum wakag imanui numi ayaunum

nuna wakentin bikintunum,

kuntinu maa apenak, kugkuin incienson apenak

dita apajuímtaijin emematuinawai.

¡Dita nawanji aidauk tuja dita uchijin nuwe aidaushkam

nuwa akika dutiktai aina nujai betek ainawai!

14 Nunik pegkegchaun takamainakuish,

wika ditanak suwimkanak susashtatjai,

wagki atumshakam nuwa wainka apajuímtai

aidaun apajuímin aina nuninjai tsanijinjume.

Aents shiig anentaimsa pujutan megkaga

duka tuke beseak nuninawai.

15 Israel aents aidauwah, atum aidautijum,

wainka apajuímtai yujagjuminish,

Judá wegantu aidauk atum pegkegchau takajum nunak takaschagtatui.

¡Guilgalnum, tuja Bet-avénnumshakam

dakumka najanamu ememattai aina duka emematigpa!

¡Nuigtush Tuke Pujuu daajin umiktatjai tusagmek

tuu yujaigpajum!

16 Israel aents aidauk antakchau intimkiu,

burro nuwa unuinakchamujai betek ainawai.

Nunin aina nunash itugsag Tuke Pujuush

uwig tsakatuch chijichi pegkeg samekbau ayamunum

kuitamaina ¿imatiksash kuitamkati?

17 Israel aents aidauwah,

wainka apajuímtai aidau ememattasajum wakegakjumek

emematu yujatajum.

¿Atumek datsaamtak wakegajum,

atsa shiig anentam atak wakegajum?

18 ¡Nampenakug nuwa akika dutiktai aina nuna yujajuinawai!

Pegkeg takatnak dakituinak,

pegkegchau datsanmainun yujajuinawai.

19 Wainka apajuímtai aina nuninun

emematu yujaidau asag,

dase chijichi kagakun umpui ajapama numamtuk

ajapeam agtatui”, tiuwai.

<- Oseas 3Oseas 5 ->