21 Makichik tsawantai apu David Joapan chichajak:

“Absalón wakitki taa pujusti tusan tajai. Nuadui weme Absalón ujakta wakitki Jerusalén taati”, tiuwai.

22 Tusa tama Joab Davitan eme anentus tsuntsuma nijayin nugka antig pujus chichaak:

“Apuh, ame mina wait anenjam nunak yamai dekas shiig dekaajai. Wi amina segabiajam nunú antugtuku asam, ame minak inatme”, tiuwai.

23 Aatus tusa, jiinki Gueshur nugkanum weuwai Absalógkan juki Jerusalén itaatatus. 24 Nunik wetai Apu chichaak: “Yamaikik Absalógkak minak waitkashtatui, tutupit niina jeen weti”, tiuwai. Tusa tibau asa Absalógkak apu pujamunmak wetsuk tutupit niina jeen weuwai.

25 Tuja Absalógjai ashí tikich Israel aents aidau ijumja diismash, niijai betek shigmauchik makichkish atsujakui. Absalógkak niina nawen nagkamas buukenish shiig shigmauch aajakui. 26 Niig maki makichik mijan amuebaunum intashin tsupimajakui, wagki intashi tsakatai tutitag dekapeau asa. Nunú intash tsupikbau dekapamak jimag kilo nagkaesau aajakui. Duka kijin dekapatai apunu aajakua duwi dekas shiig dekapa diisbau aajakui. 27 Absalógka uchijig kampatum aajakui. Untsu nawanji makichik Tamar daagtin shigmauch aajakui.

28 Absalógkak Jerusalén jegauwaitak, apu David eke waitkashti tibau asa, niina waintsuk jimag mijan pujau. 29 Nunik pujus makichik tsawantai Joapan untsukui, apu David ujatjukta, niijai chichastajai tusa. Tujash Joab dakitjauwai. Nunikmatai ataktushkam chichaman akuptukui. Tujash ataktushkam dakiajui.

30 Nunikmatai Absalón niina inake aidaun chichajak: “Joapa ajaji cebada ajakbau mina ajagjai apatdayas awa nunú wejijum ¡apejuatajum!” tiuwai.

Tusa tima shimutkag Joapa ajajin apejuawajui. 31 Dutikiagtai Joab Absalógka jegajua chichajak:

“¿Wagka amina inakem aidaush mina ajagnash apenawa?” tau.

32 Tama Absalón ayaak:

“¿Wagka wisha Gueshur pujaunush juwish taamja? Dekas imaug pujumainnas miniyagtai tajai. Tau asan amina akateakun: ‘Yamai apuh, amina wainkatasan wakegajai, tuja wi pegkegchaun takamsamu akuig mantuata tajame’ tujamui tusam apu David ujatjukta tusan awematag tai, ame dakitau asamin aunak aikajai”, tiuwai.

33 Tusa tima Joab apu Davitan ujaktatus wejiuwai. Nunik jegajua ujakam, apu David Absalógkan untsukui. Dutikam apu pujamunum jegá, apun eme anentus tsuntsuma nijayin nugka antig pujusui. Unstu apu niina kumpamak shiig anentus yapinum kugkuasui. Dutika tsagkujug ataktu nii pujusa inamtaijin awayauwai.

<- 2 Samuel 132 Samuel 15 ->