Iburu 3

Yisasi Ma Mosesin Esantakhein Baya Ino

1 *Máan tukhein nará kantasí ukheona sifá tiváeyan má tiyó má bá ano ma inarufá orono van iyaona kéká ano vá ineno. Tiyarafenui vaya varen orin banta Yisasi ma monó ánon banta kayoi ánon bantaí ukhen mino ma siyáeruna vará ineno. 2 Mai fara vara seyo, Mosesi ma Tiyarafenu oo yaiyen puntáken beni vanasirá dafíká ein an mi yen Karaisi ano mai ma véin aní uren tiantan erikhá ein Tiyarafenu oo yaiyen puntáden doren mino. 3 Mana vanta ano ma kama ukhein namun uváden maen mai vanta anon kákan bí baré iyan mifo mai namun mano ída kákan bí baré iyan mino. Máan manan en mi Yisasi anon Mosesin esantaren kákan bí baren mino. 4 Mai fara vara seyo, mana mana namun ma vain mai mana mana vanta anon uvanten mifo Tiyarafenu anon minó danasinta uvanten mino.

5 *Nam 12:7; Diu 18:15-19Mosesi ano Tiyarafenui yoran bantaí ukhen mi véin oo yaiyen puntáden beni vanasirá dafíken maen inká ínaimpáké ma Tiyarafenu ano fura vaya ma maman dákó inain avúavái aman manon an mi yakharen mino. 6 Máan tiyaren mifo Tiyarafenun Anin Yisas Karaisi anon ben oo yaiyen puntáden báken ben amáká dafíken mino. Máan tukhái mai ma Karaisi ano e siviran nain nan ma simusin iyáké ákonaé ave ukhé tiferuna kéká ano ven amá an mi yakhé tiféuno.

Ída Ma Ará Baeran Nain Kéká Ano Ma Uman Baran Nain Nan Ma Amaan Baya Sein Mino

7 Máan tukhein nan mi Kantá Aunan mano máa siyan mino,

Taréa vá beni vaya ineno.

8 *Mai ma kámá barafá ma vanasi ano Tiyarafenui vaya átakharé uren,

béin akhenóka uan oniyá ein an deya ída vá tiretíi ará pákaan ákona ono.

9 Tiretí ankan anáuyan mai foti (40) oranarái enará ukhein daná aní ékun oniyáken mifo

séin akhenóka uan oniyaren mino.

10 Máan tiyaimpin betin nan tiran nan uantádé máa sé uno,

‘Minó damú téi ma siameruna vaya me oyan amiren maen

ída sen too yaiyiyan mino.’

11 *Máa siré tiran má ákona vayafó máa sé uno.

‘Betí ankan mai séi ma sivíkiyaruna varufin ída uron mi orinten mino.’ ” Íbo 95:7-11

12 Máa seruna ifo mumunan tiyofi sifá tiváeyan noe, máan tiyare mana ano aúkáké ída mumunan esin mai avúavá ano siretí ankan aviren tavi aípá orintiya aunan bain Tiyarafenun me ampin nampo yafían ná ákona ono. 13 Máan tin nompo “Saréa”*“Taréa” e ma sikhein mai Í Bompon 95:7-8 fin ma máa sikhein mino. “Tiretí ankan ída vá Isareri kéká ano ma Tiyarafenui vaya átakharé uren ma vetíi ará pákaan ákona iyá einisá ono.” ana e ma sikhantiya ena ena yamu sá ben ákona uantan maran iyasin ná ume avúavá ano siretíi ineine ída e yarifanti vá Tiyarafenun ída me oyan ameno. 14 Mai fara vara seyo, mai ma esé araíé mumunan é tiferunaí é ma Tiyarafenurá ákona inin kauré ma oriyá maé mai Karaisin mái manafin dorá tifanté uno. 15 Máan tonté tifé umpo ákona vaya ma sikhein ída vá áun ono.

“Taréa vá beni vaya ineno.

Tiretí ankan ída vá Isareri kéká ano ma Tiyarafenui vaya átakharé uren

ma vetíi ará pákaan ákona iyá einisá ono.” Íbo 95:7-8

16 *Nam 14:1-35Intéa kéká anó Tiyarafenui vaya inikhen mifo mai vaya átakharé ukharen nafino. Mai ma Mosesi ano Isipíké iyanen erein kéka ino. 17 *1Ko 10:10Inká intéa kékasá Tiyarafenu ano foti (40) oranará aranan uantákaren nafino. Mai ma kámá barafá umei uren ma fúan kípein nanin banta ino. 18 Inká Tiyarafenu ano intéa kéka sará ída senti sivíkan barufin o feran nono sen ákona vaya sein nafino. Mai ma veni vaya átakharé iyá ein kéka san mi sein mino. 19 Máan tukhá in mi veti ma ída mumunan ein avúava san bei avíkan barufin ída orinten ne sikhái afová ukhé tiféuno.

<- Iburu 2 Iburu 4 ->