1 [a]Minó ano ma Yisasin nan Tiyarafenu ano vei vanasi evaránen avirano van ma aní ukharé ein banta ino sen mumunan inten maen mai vetí ankan Tiyarafenu akhafana ino. Inká minó ano ma Tiyarafenu van anunu inten mai ven akhafana vá inan anunu inten mino. 2 Tiyarafenu van ma sinunu ó tifanté mai veni man baya ánain mi yakhafiyá ben akhafana vá inan tinunu iyáké afová iyá tiféuno. 3 [b]Tiyarafenu van ma anunu in nan ma siyain mai veni man baya ánain ma funtáden bákurin avúava san mi siyákan mai ída uman dakhen mino. 4 Mai fara vara seyo, Tiyarafenu akhafana ano ma Yisas Karaisintá mumunan intin maen betin ákona amintin ma vara ráke namu avúavá maman bararasí uren mantaan ákona inten mino. 5 Yisas Karaisin nan ma Tiyarafenu Anin mino siren mumunan ein kéká anon bara ráke avúavá bá ma aruviyaré ein maman bararasí uren mantaan ákona iyan mino.

6 [c]Yisas Karaisi ma monó non perein má daa unkamádantá ma vei nare vanaein má anon Tiyarafenu Anin muno sen aníen mifo non máa fo saino. Ída ino. Non má nare vá póké ino. Máan tukhan mi Kantá Aunan mano yere ma siyain mai fura vayan bákan tetin tisimiyan mino. 7 Kanú manaú daná anon Yisasin nan puran tino sen aní ukhen mino. 8 [d]Mai yaná ma vain mai Aunan ban non ban nare van ukhen mino. 9 [e]Tetí ankan ma vara ráke vantai vayará mumunan iyá tifé umpo Tiyarafenui vaya ano moéken kákaní ukhen mino. Para vara seyo, Tiyarafenu ano ve Anin nan mi sian amá uran ban mino. 10 [f]Mai vaya van mi Tiyarafenu Anintá ma mumunan iyain kayo ano mai furan tikhen ne sen afová iyan mino. Mai fara vara seyo, ída ma mumunan iyain kayo ano Tiyarafenu van kampun banta inon tiyáken ben Anini vaya ma sian amá iyain nan ída mumunan iyan mino.

11 Máan tiyan mi Tiyarafenu ano mai van tian amá ukhen mino. Be Anini avúavá ánain ma vákuriyá tiferuna kékái ayun ma fara van oriyan ban aunan Tiyarafenu ano simikhen mino. 12 [g]Máan tukhan maen iye anó Tiyarafenu Anin maman aúpin dan ban nafi mai véi fara van aunan manten mifo Tiyarafenu Anin ma ída mantein mano mai aunan ída manten mino.

13 [h]Tiyarafenu Anintá ma mumunan ukheona kayo ano ayun para van aunan manté uno sire afová ono van mi ma vompon uvaman amé uno. 14 [i]Tetí ankan ma ákonaé mumunan iyáké ma veni anunurá mana yana san inantékun maen béi setinti vaya ininten mino. 15 Inká béi inikhái inan tiyá uno ma siré afová iyáké ma inantenuna yaná mai véi kanaíen timinten mino sé afová ukhéi inanté tifanté uno.

16 [j]Tiretin pinté mana ano ma onesin e ayofi fi afá aváe fi ma furimpin ída ororen ukhein umeí ma iyanti vá amúkuantesin ná Tiyarafenu ano véin aunan ná amino. Inká purimpin ma aviren oré iyain ume váé iyan mifo mai ume ma variyain kéká amúkuantano vara siya rauno. Ída ino. 17 Minó namu avúavá ma vain mai ume ifo manáa ume kayo ano ída furimpin aviren oré iyan mino.

18 [k]Tetí ankan afová ukhé tifékun Tiyarafenui kékasí ma ukhein kayo ano ída umeí ana en oré iyan mino. Mai fara vara seyo, Tiyarafenu Anin manon betin pákaan ákona uren dafíkan mi Ban Anon mano ída kanaíen betí au aruvé iyan mino. 19 Tetí ankan Tiyarafenu akhafanan bá afová ukhé tifékun mi ma vara ma eúkukhein mai Ban Anoni ákona aránaópái vákan beni inintái minó daná bariyan mino. 20 Tetí ankan nan pura sikhein Tiyarafenu afová ino van mi ve Anin mano setin morun afova simikhá afová iyá tiféuno. Máan tukhái setí ankan ma ven Anin Yisas Karaisimpin baruna van mi Tiyarafenu fin bá tifere siyá uno. Beyáká anan pura sikhein Tiyarafenu váken ayun ma fara van oriyan ban aunan mi van mino.

21 Téi ma sinunu ukheruna iyampon kayo oe, kampun ayarafenu kayo ano Tiyarafenui varu varen tiretí aúpin kumanin nafo yafían ná ákona ono.

<- 1 Yoni 4