HIBRU 3

Jisas ijan eu Moses ijan wooldoc

1 O cotiel gun, Anut sao jobon bilina uqa ageha cahahaadec inu utaaden. Eunu age Jisasnu cisdu cuhadoigale. Uqanu wawige meleec ege qasali madoqona eu uqana nawel tawec ihanec dana iloca aposelca cabi ocnu Anut suldocob nen. 2 Anut uqa cabi inu ehuden. Odocob uqa Anut co toodu cuhadon. Eu odiwe Anut wele Moses uqa Anutna tamanecnu cabi ocnu ehuden. Odocob uqaha Anut co toodu cuhadon eu odi odon. 3 Anutna tamanec eu Anutna jo cinigwe. Dana jo cehena binan eu jo uqana binan wooldoc. Eu odiwe Anut uqa Jisas binan ben eu Moses binan ben eu wooldoc ec cisdon. 4 Jo cunug eu dana cehec himec. Odocob ceteh cunug muden eu Anut uqadodoc himec muden. 5 Moses uqa Anutna cewel utoc dana uqa Anutna jona cabi on. Uqa Anut co toodu cuhadon. Uqa Anut ceteh hibna madigiannu ninijen je casac qasali maden. 6 Euqa Krais uqa Anut Melah eunu uqa Anutna jo cofdoc cabi uqa melahnu Anut co toodu cuhadon. Ege ceteh wawige meleec susumudi gagadic hehewi culaug oqonafi egeha Anutna jo biluquna.

Dana cajaca age Anutna je hibemdoin eu age malol qee biluwain

7 Eunu ege Kis Gunna je dah moqale. Eu odi madena:

“Qila age Anut jejeg dah mifeig 8 age wawaga gagadic bahic cain menowain.

Wele bahic dana cajaca fileeeig Anut jejeg wooldumeig odoin odi cain odowain.

Age hatu danaca qeena isec bibileig temtein.

Saen euna agedodoc wawaga menein.

9 Hatu euna age jajanagail cabi gel 40 eu cunugna ceteteh cunug odom eu fein.

Euqa eunu qee cisdoloin eu age temtecna mitein.

10 Eunu ija dana cajaca sihul eunu gemani geh ben odimig madem,

‘Saen cunugna wawaga jic bahic toodoc cuculi qolocdona.

Age ijana jic coboc kobol eu qee toodogina,’ em.

11 Odocob ija gemani beceb cagoc je madem,

‘Eu age ijana jaen mudec cudun dunuh qee bahic qee lowain!’ em,” Kis Gun odi madena. (Buk Song 95.7-11)

12 O wawige meleec cotiel, agedodoc cofdu cuhadoiga. Qee fefeig cotoga age gemona oso uqa waugna cisdoc me qeeca culdecebil waug meleec eu felacucudi Cebac Bilec Anut eu hibemdoiaunnu. 13 Saen i eu Anut uqa qila ena uqa gaid bilia eunu deel cunugna age cotogail je meme himec maaadeig cisdoc fogo duadeiga. Qee fefebil silail kobol age gemonadec oso uhuldocob waug gagadic meneiaunnu. 14 Ege hahawan wawige meleen gagadic hewom. Eunu ege qila wawige meleec eu gagadic hehewi li egena cal mec gadac gulucdoqale. Ege eu odi odifeb ege Krais cotugul hijagul biluquna.

15 Ege doqona, Anutna jaqec je madena:

“Qila age uqa jejeg dah mifeig age wawaga gagadic bahic cain menowain.

Wele bahic dana cajaca fileeeig Anut jejeg wooldumeig odoin odi cain odowain,” ena. (Buk Song 95.7-8)

16 Wele inni age Anut jejeg doin odimeig fileeeig uqa jejeg wooldoin? Eu dana cajaca cunug Moses ehadeceb Isip hatu cuculi belein eu age. Eu age himec kobol eu odi odoin. 17 Cabi gel 40 cunug eu Anut uqa innu gemag ben? Uqa dana cajaca silail moloig eu agenu gemag ben odocob cal mein eu age dewenega ganac hatu danaca qeena nijein. Anut uqa eu agenu himec gemag ben. 18 Anut uqa inni eu age cagoc je madi, uqana jaen mudec cudun dunuh qee bahic qee lowain, en? Eu dana cajaca uqa jejeg qee toodoloin eu age. Uqa eu agenu himec maden. 19 Eunu ege foqona, eu age wawaga qee meleelnu Anutna jaen mudec cudun dunuh qee lowain.

<- HIBRU 2 HIBRU 4 ->