Pol Uqa Jaqec Je Osoldoc

Korin Tamanec Jaqiaden
Aqunec Je
Pol uqana saenna Korin eu taun ben oso eu Akaia hatuna nijen. Akaia eu Grik agena hatu naha oso. Pol uqa Korinna Jisasnu me je qasali madec dana ben, odocob uqa Krais tamanec oso ono sanan men. Euqa uqa tamanec eu culadi nuimei hatu osona cabi on saen euna culumen filfil Korin tamanec gemona calen. Odocob Pol uqa agena cisdoc dado mudecnuca, culumen eu tutuc mudecnuca jaqec je i jaqiaden.
Pol uqa Korin tamanec agena wawaga meleec an daneiaunnuca, agena me odoc me qee meiaunnuca jaen qon. Eunu uqa tamanec age qatanadec cain biluwain, age wal kobol cain odowain, ec jaqiaden. Odimei uqa dana cajaca ocobocobec eunuca, sab dana age kadan tibudnu ihanein eunuca, cuha fec kobol eunuca, Kis Gunna dumanaga adec eunuca, Kristen age cal mecnadec ceseli cajoqagan eunuca je jaqen.
Jaqec je i uqana naha oso Kristen age gale adena, eu dac 13. Dac 13na Pol uqa nalunuga mec kobolnu madena. Eu bagol me bahic Anut uqana dana cajaca adena. Eu Kis Gunna dumanaga adec cunug wooladena.
Je Dunuhnu Dado Mec
1. Aqunec je (1.1-9)
2. Korin tamanec age qatanadec bilegina (1.10-4.21)
A. Pol uqa Korin tamanec age qatanadec bilegina ec don (1.10-17)
B. Tamanec qatanadec bilegina uqana gug (1.18-4.13)
1. Korin tamanec age Kraisna me je qee du cuhadogina (1.18-3.4)
2. Korin tamanec age Kraisna cabi oc qee du cuhadogina (3.5-4.5)
3. Korin tamanec age Kristen coboc qee du cuhadogina (4.6-13)
C. Pol uqa Korin tamanec age qatanadec cain biluwain ec jaqena (4.14-21)
3. Wal kobolca, kobol tutuc qeeca eu Korin tamanec dunuh bilia (dac 5-6)
A. Korin tamanec agena dana oso uqa wal kobol odona, euqa tamanec age cois egina (dac 5)
B. Kristen dana uqa cotig gesilec jona muden (6.1-11)
C. Kristen dana cajaca age wal kobol cain odowain (6.12-20)
4. Dana cajaca ocobocobecnu dado madec je (dac 7)
A. Gemugailca aidagailca eunu dado madec je (7.1-7)
B. Dana cajaca ocobocobec bilegina agena culumen (7.8-24)
C. Dana cajaca ocobocobec qee bilegina agena culumen (7.25-40)
5. Kobol leih eu coisfo, qeefo eunu dado madena (8.1-11.1)
A. Sab kadan tibudnu ihanein eunu dado madena (dac 8)
B. Pol uqa uqana kobolnu madena (dac 9)
C. Age Isrel wele odoin eu cain odowain (10.1-22)
D. Ege cel ceteh odoqona eu ege Anut binan sulecnu odoqale (10.23-11.1)
6. Cuha fec kobolnu dado madec (11.2-14.40)
A. Pol uqa cuha fec ilomoga jahuldoc kobolnu madena (11.2-16)
B. Tibudna bred wain gabinca jecnu dado madec (11.17-34)
C. Kis Gunna dumanaga adec (dac 12-14)
1. Age Kis Gunna dumanaga adec temadeiga (12.1-3)
2. Ege cabi ocnu dumanige igec filfil nijia qa dumanige igec Kis eu uqa osol bilia (12.4-11)
3. Krais tamanec eu osol qa dumanige igec eu filfil (12.12-31a)
4. Ege dana cajaca cunug dumanige igecna nalunuga moqale (12.31b-13.13)
5. Je hahun madecnu dumanige igec eu beilah fil osona je madecnu dumanige igec wooldona (14.1-25)
6. Cuha fecnu cabi cunug eu tutuc caligian (14.26-40)
7. Cal mecnadec ceseli cajecnu je dado madena (dac 15)
A. Kristen dana cajaca age mele bahic cal mecnadec ceseli cajoqagan (15.1-34)
B. Leih age dana cal mein adi tuliadeceb ceseli cajoqagan? egina eunu Pol jejenega hewi maadena (15.35-57)
C. Age gagadic taweigale (15.58)
8. Cit qoc je: Pol uqana cetehnu sisiladimei feele adena (dac 16)

1 Ija Pol, Anut uqana cisdocna utateceb ija Krais Jisasna aposel calem. Ijaca ege wawige meleec cotige, Sostenisca 2 ele Anutna tamanec Korin bilegina eu age jaqiadowona. Anut uqa ageca dana cajaca age mahana cunug egena Tibud Jisas Krais inondudu ijannu cuha feginaca age Anutna dana cajaca qagu biluqagannu utaaden. Jisas Krais uqa agena Tibud, eu egena Tibudha. Krais Jisas age uqaca gabanadeceb age qagu bilegina. 3 Memige Anutca Jisas Krais Tibudca alena eelgec uum igecca malol bilecca adesiale.

Pol uqa Anut hetaga don

4-9 Age Kraisca gabandoc euna uqa je madec cunugca doc cunugca eunu osoben cehewanagaca maden. Uqa age ceteh cunugnu cehewanagaca maden. Odocob Kraisnu je eu age wawaga dunuh wele gagadic men bilia. Eunu qila age egena Tibud Jisas Krais camasac migiannu susumudi bilegina. Susumudi bibileig age Kis Gun uqana bagol adec eunu oso qee gohic melein. Jisas Krais uqa agena wawaga meleec gagadic mudeceb li qee mec gadacna age egena Tibud Jisas Kraisna deelna age cahuldocca qee tawoqagan. Anut uqa age Melah Jisas Krais egena Tibudca gabandu biluqagannu utaaden. Odocob Anut uqa ceteh odocnu maden uqa odi odigian. Eunu Anut uqa Krais Jisas umna uum aden eunu ija gaid agenu Anut hetaga dugina.

Anutna tamanec qatanadec bilen

10 Ija wawige meleec cotiel, ija egena Tibud Jisas Krais ijanna age gemona cel je madegina eu age wawaga osol migiannu niniadigina. Eunu age gemona qatani nahanaha doc cain biluwain. Age cisdoc osolca wawaga osolca gabandoigale. 11 Ge, ege caja cotige Klowi uqana tal leih age qatanadec bilec Korin tamanec gemona nijia ec matein. 12 Ija age qatanadec bilec age gemona nijia eunu maadigina uqana gug eu odi. Age oso madena, “Ija Pol toodugina,” ena. Odocob oso madena, “Ija Apolos toodugina,” ena. Odocob oso madena, “Ija Pita toodugina,” ena. Odocob oso madena, “Ija Krais toodugina,” ena. 13 Krais uqa nahanaha qatanadec bilia eginafo? Eu Pol uqa agenu na babalecna tuitu qocobil cal men eginafo? Age Pol ijanna wa joaden eginafo? 14-15 Dana oso age ija ijanina wa joc adem ec madeiaunnu, ija Krispas Gaiasca dih wa joalem. Euqa ija agenadec oso qee wa joudelem eunu ija Anut hetaga dugina. ( 16 Eu mele, ija Stefanas uqana talca gamiha wa joadem qa ija in oso wa joudemfa eu ija cisdocwe qee.) 17 Ge, Krais ija wa joadecnu qee sultel, ija me je qasali maadecnu sulten. Odocob Kraisna na babalec uqana gagadic odoc qee mudigaunnu ija dana agena cisdoc sileccana me je qasali maadecnu qee sultel.

Krais uqa Anutna gagadic odocca cisdoc silecca

18-19 Anutna jaqec je odi madena:

“Ija cisdoc dana agena cisdoc silecca qee mudigen.

Odimig dana docnu gesis agena doc eu gesacna migen,” ena. (Aisaia 29.14)

Eunu dana age fadaladecnu dodoladena eu agenu na babalecnu je eu gad je ec cisdogina qa ege Anut cahahagecnu odona eu egenu na babalecnu je eu Anutna gagadic odoc bilia ec doqona. 20 Aria, dana age cisdoc silecca eu adi bilegina? Loo je iwaladec dana age Anutna jaqec je du cuhadogina eu adi bilegina? Dana age mahanadec jena cadegina eu adi bilegina? Anut uqa maha ina cisdoc silecca eu ceteh gad ec ihacaden.

21-25 Anutna gad je eu dana agena cisdoc silecca wooldona. Odocob Anutna lasdoc eu dana agena gagadic wooldona. Anut uqana cisdoc sileccana dana cajaca odadeceb age uqanu docnu eu agena cisdoc sileccana agedodoc docnu ihoc qee. Eunu ege me je eu age gad je egina eu qasali maadoqona euna Anut uqa dana cajaca wawaga meleena eu cahahaadecnu cisdon. Juda age kobolkobol odoc fecnu gagadic megina. Odocob Grik age cisdoc silecca walegina. Euqa ege age Krais na babalecna tuitu qocobil cal men eunu je qasali maadoqona. Je eu Juda agenu eu meen cinigwe age jaimagana qeti aqeceb toni aqena. Odocob je eu Juda dana qee eundec agenu eu gad je. Euqa leih Anut utaaden, eu Juda Grikca osoben agenu, je eu Krais, uqa Anutna gagadic odoc, odocob uqa Anutna cisdoc silecca.

26 Ija cotiel, Anut utaaden saen euna age adi bilein eunu qila cisdoiga. Age mati age dana mahanadec amagana docca qee biloloig. Age mati age dana mahanadec amagana gagadic odocca qee biloloig. Age mati age dana mahanadec amagana ijanagaca qee biloloig. 27 Euqa Anut uqa mahanadec dana cisdoc silecca eu majanaga hewadigiannu dana eu gad egina eu nesili cedaden. Odocob Anut uqa mahanadec dana gagadic odocca eu majanaga hewadigiannu dana eu lasdoc egina eu nesili ehaden. 28 Anut uqa dana maha ina ijanagaca qee nesili cedaden. Dana mahanadec age dana eundec eu dana gauc ec cisdogina. Dana mahanadec age dana eundec cewadegina. Anut uqa dana ijanagaca gagadic odocca eu qee moqagannu odi odon. 29 Anut uqa dana oso uqa binan eu Anut amegna qee suliaunnu odi odon. 30 Odocob Anut uqa age Krais Jisasca gabanadeceb bilegina. Odimei Anut uqa Krais Jisas eu egena cisdoc silecca muden. Odimei uqa Krais Jisas umna ceseli fajigen. Odimei uqa Krais Jisas umna ege dana cajaca ititom ec maden. Odimei uqa Krais Jisas umna ege dana cajaca qagu biluquna ec maden. 31 Eunu Anutna jaqec je odi madena:

“Dana oso uqadodocnu culai madecnu gale dona eu uqa Tibudnu culai madeiale,” ena (Jeremaia 9.24)

eu odi ege odoqale.

1 KORIN 2 ->