Hebrews 3

Jesus kwenhe Moses-enge akertne ulkere-arle aneme

1 Atyewe Ngkarte-kenhe atyinhe areyaye, Ngkartele arrenhantherrenhe akalkelhe-ileme akngakeke Ikwere Renhe akwete arratye itelarerlte-anemele anetyeke akwete. Alakenhe ikwerenge anteme anwerne Jesus-eke akwetethe itirrerlte-anemele anetyeke. Ngkartele renhe nhenhe-werne yerneke re apeke-arle anwerneke Ngkarteke aharlperre angketyenheke, kwertengerle tyeperre tyatye-arenye-ingarle. 2 Jesus-arle apmere ahelhe nhenhele nhenge aneke, re Ngkarteke warrke-irretyarte akwete anthurre Moses-arle aneke-arteke arrpe-anenheke Ngkartele layekerlenge.

3-4 Anwerne Moses-arle atheke-atheke-irremele utyernewarretyarte, anwerne imerte Jesus anteme utyernemele tnakewarretyeke Moses-enge awethe-ulkere. Awerrirraye, artwele apele apmere arteme, arrantherre-ame apmere-arle tnakeme apmere-arle artekeke alkngwirremele? Alakenhe kwenye-aye! Apmere-arle arteke artwe renhe arrantherre tnakewarretyeke. Jesus anteme alakenhe apmere artenhe-artenhe-arteke aneme Rarle arne arrpe-anenhe arteke. Alakenhe athewe, anwerne Moses tnakewarretyale anetyeke-arle, Jesus-ante ware utyernemele tnaketyeke.

5 Arrule anthurre-arle Moses itethe aneke, re akwete anthurre aneke Ngkarteke aywerrkele warrke-irremele apurrke-arlke-irretyakenhele. Re Ngkarte-kenhe areye ingkerreke mwantyele arntarnte-aretyarte. Rarle akwele alakenhe itneke angketyarte, “Urreke kwenhe, Ngkarte angketyenhe arne arrpe-anenhe imernetyenhe.” 6 Moses kwenhe warrkene Ngkarte-kenhe ware aneke, kenhe Jesus Christ akenhe Alere Ikwerenhe-arle, rarle akwetethe-arle tyerrtye ikwerenhe areye arntarnte-arerle-aneme. Alakenhe ikwerenge anteme anwerne Jesus Christ arratye itelaretyeke atere-irretye-kwenye akwetethe renhe apentemele anetyeke apurrke-irretyale. Anwerne ikwere akangkemele akarelhetyeke.

Ngkarte ahentye-aneme tyerrtye areye Ikwerenge anetyeke apmere-melangke Ikwerenhele

7-8 Kele nhenhe anteme awerrirraye, angkentye nhenhe Utnenge Ngkarte-kenhe-ngentyele arrule anthurre pipeke-arle intelhe-ileke,

“Lyete anteme arrantherre Ngkarte awerrirremele anetyeke, renhe awaye arrekantherre-arle angkerlenge.

Ankerle-irretyale, arrekantherre-artweye arrwekelenge areye-arteke-arle arrulenge-arle itne Ngkarte-ketye untyeme-irremele iwerre arrpenhele alherlte-iweke.

Itnenhe arrantherre angwaretyale anetyeke. Nhenge Re arrekantherre angkerlenge, Renhe irlpe artepele awetyale anaye, itne-arteke, Renhe-ante awerrirraye.”

9 Itelaraye, Ngkarte-arle alakenhe angkeke,

“Arrule anthurre-arle itne apale-apale irremele unthetyarte apmere arrangkethe nhenhe ikwerele year 40-eke-atwetye. Tharle arne arrpenhe renhe arratye mwerre ilemele itneke, itne apeke arratye aremele itelaretyenhenge.

Kele areke-arle iperrele, itne ilkelhetyakenhe-arle anerrirreke. Itne ayenge akwetethe uternetyarte awethe arne mwerre arrpenhe mpwaretyeke nhenge itne aretyenhenge.

10 Alakenhe ikwerenge anteme Ayenge tyerrtye yanhe areyeke arewampe-irreke, alakenhe ikwerenge anteme Moses-eke ayenge angkeke,

‘Tyerrtye nhenhe areyele kwenhe Ayenge angkerlenge-arleke awetyakenhe. Itne-arle untyeme-arrpe akwete-arle anerlte-aneme Atyenge-ketyenge. Itne-arle arratye alkngwirreke angkentye Atyinheke iwerre arratyele anetyeke-akerte.’

11 Ayenge anteme itneke ahele ilkelhetyakenhe anemele, Ayenge-arrpe alakenhe uternelheke,

‘Tharle tyerrtye nhenhe areye ayaketyenhe apmere Canaan-werne alhetyeke arrangkwe-arle itne anetyenhe, apmere Tharle itnenhene arrekwele alhilekeke, ltyerremele-arle itne anetye-alhetyenhe apmere mwerrele.’ ” Psalm 95:7-11.

12 Atyewe Ngkarte-kenhe atyinhe areye, mwantye arntarnte-arelheme arelhewarraye, arntarnte-arerremele. Angwenhe apeke-arle arrantherrenge-amperle aneme imarte apale itirremele akurnentye-ketye, akngakelhemele-anteme Ngkarte-ketye. Alakenhe re apeke aneketye arntarnte-arelhemele anerraye, impene-impene anthurre. 13 Arlte arrpe-anenhele, itethe-itethe akwete-arle arrantherre anemenge, angkerremele anerrirraye, lterrke-ilelhemele anetyeke. Ngkarte akwete awerlte-anaye arrentye Satan-ele-arle arrenhantherrenhe ularele Ngkarte-ketye iwerre arrpenhele akngeketyenge, alkngwilemele Ngkarte arrekantherre angkerlenge aweme-ketye. 14 Anwerne-arle Jesus Christ-akerte aweke, anwerne kwenhe renhe itelareke arratye, kwenhe anwerne renhe akwetethe apentemele anetyeke anwerne ilwetyeke-atwetye. Anwerne Christ-kenhe ingkirreke anwerneke-arle re mpwareke iperrenge. 15 Awethe itirraye ayeye pipe-le aneme-akerte, alakenhe-arle ileme-akerte,

“Lyete, arrantherre Ngkarte angkerlenge awemele arrekantherre,

ikerlte-irretyale anaye.

Arrwekelenye arrekantherre-artweye areye-arteke anetyale anaye,

Ngkarte-ketye-arle iwerre arrpenhele alherlte-iweke arrule anthurre.” Psalm 95:7-8.

16 Angwenhe areye-ame tyerrtye itne Ngkarte angkerlenge aweke, aywerrke-irretyakenhele aneke? Itne kwenhe itne aneke Moses-elarle Egypt-ngentyele akngeke. Ikwere-iperre imerte itne-arle Ngkarte-ngentyele artepele untyemurle awenhemele alheke. 17 Angwenhenge-ame Ngkarte-arle ilkelhetyakenhe aneke year 40-eke-atwetye? Kele, itne kwenhe aneke! Yanhe areyele akwele awetyakenhe-arle aneke, arne arrpenhe akurne-ilemele apmere ahurratye ikwerenge. Arrantherre itelareme, itne-arle ingkirreke ilwerrirreke apmere arrangkethele. 18 Ngkarte ahele angkeke alakenhe itneke, “Arratye, The kwenhe arrenhantherrenhe ayaketyenhe apmere Canaan-eke irrpeme-ketye. The apeke-arle arrenhantherrenhe akngemere apmere yanhe-werne mwerre apeke-arle atyene anetyenheke Atyengenge ularre, arrangkwe. Arrantherre-arle ayenge awetyakenhe-arle aneke.” Alakenhe-arle Ngkarte itneke angkeke. 19 Anwerne ayeye yanheke itirretyeke. Anwerne-arle itelareme nhenge Ngkartele itnenhe ayakeke apmere Canaan-werne alheke-ketye itne-arle Ngkarteke awelhetyakenhe anekenge.

<- Hebrews 2 Hebrews 4 ->