1 Artwe nhenhe Esau, arritnye ikwerenhe arrpenhe Edom aneke. Ayeye nhenhe aneme ikwere-akerte alere ikwerenhe areye-arlke-akerte itne-arle inteke, re Canaan-ele anerlenge. 2 Esau-ele arelhe apmere ikwerenhe-arenye anewe aketyakenhe-arle. Kele, re arelhe apmere arrpenhe-arenye-arle anewe akeke kele Canaan-arenye-ante angkentye arrpenhe angkentye akngerre. Anewe ikwerenhe arrekwelenye Adah arritnye aneke. Re akenhe ampe Elon-kenhe-arle aneke. Elon akenhe angkentye arrpenhe angkeme, Het areye-kenhe-arle. Esau-eke anewe arrpenhe Oholibamah aneke Re ampe Anah-kenhe-arle aneke, ikwere ipmenhe akenhe Zibeon-arle aneke Zibeon akenhe Hivite-arle aneke. 3 Anewe arrpenhe Esau-kenhe aneke Basemath arritnye. Re akenhe ampe marle Ishmael-kenhe-arle aneke artwe Nebaioth-eke atyeyikwe.

4 Anewe Esau-kenhe Adah-ele ampe urreye atnyeneke Eliphaz arritnye. Yanhe-ngentyele, anewe arrpenhe Esau-kenhe Basemath-ele ampe urreye atnyeneke, arritnye ikwerenhe Reuel. 5 Anewe ikwerenhe arrpenhe Oholibamah-ele ampe urreye urrpetye atnyeneke, arritnye itnekenhe aneke Jeush, Jalam uthene Korah uthene. Alakentyele-arle alere Esau-kenhe aneke.

6-8 Nhenge itne-arle Canaan-ele anetyartenge, Esau-ele pweleke-arlke yepe-yepe-arlke atningke atnyeneke, alakenhe ante-arle kake ikwerenhe Jacob-ele atnyeneke. Itne kere atningke atnyeneke atherrke-arlke akenhe akweke anteme irreke apmere itne-arle anetyarte ikwerele. Kele, Esau aname-irreke kake ikwerenhe-ketye apmere arrpenhe merne-arlke atningke-arle aneme ikwere-werne kere ikwerenhe areye-akerte. Esau-ele anewe ikwerenhe areye akngeke, ampe marle areye, alere ikwerenhe urrkapentye akngerre nhenge areye-arlke, pweleke-arlke, yepe-yepe-arlke arne ikwerenhe arrpenhe areye-arlke. Re itnenhe akngeke arlenge anthurre Canaan-ketye apmere apwerte akngerre Seir arritnye-werne. Ikwerele itne akwete-ante anthurre anetyarte.

9 Ayeye nhenhe Esau-akerte. Esau-arle apmere Seir-werne alpeke-akerte, ikwere akwerrke areye akngerre-ame-akngerre anteme irreke itne anetyarte, itne Edom arritnye akelhewarreke. Nhenhe akwerrke Esau-ke areye: 10-13 Alakenhe-arle arrekwele intelhe-ileke, Esau-ele alere atnyeneke anewe ikwerenhe Adah-eke. Eliphaz arritnye ikwerenhe aneke. Anewe alere arrekwelenye-kenhele ampe five-pele atnyeneke: Teman, Omar, Zepho, Gatam, Kenaz uthene.

Kenhe anewe arrpenhe Timna-ke, Eliphaz-ele alere arrpenhe atnyeneke, Amalek arritnye aneke.

Yanhe iperre, anewe arrpenhe Basemath-ele ampe urreye anyente atnyeneke, Reuel arritnye aneke. Kenhe Reuel anewe akerremele, alere four-pele atnyeneke: Nahath, Zerah, Shammah, Mizzah uthene.

14 Alakenhe intelhe-ilentye aneke. Mpwepe ipenhe anewe Esau-kenhe marle Oholibamah-kenhe aneke ipmenhe Zibeon-kenhe.

Oholibamah-ele alere urrpetye atnyeneke Esau-eke itnekenhe arritnye aneke Jeush, Jalam uthene Korah uthene.

15-16 Tyerrtye Edom-arenye areyele akngerrepate itnekenhe Esau-arle aneke. Akngerrepate nhenhe itne aneke Eliphaz-kenhe areye-arle, Esau uthene Adah utheneke alere areye: Teman, Omar, Zepho, Kenaz, Korah, Gatam uthene Amalek uthene, itne Edom-arenye areyeke akngerrepate areye aneke.

17 Tyerrtye arrpenhe areye aneke Reuel-kenhe areye-ngentyele Esau uthene Basemath uthene-kenhe: Arritnye itnekenhe aneke: Nahath, Zerah, Shammah, Mizzah-arlke.

18-19 Tyerrtye arrpenhe areye aneke anewe Esau-kenhe Oholibamah-ngentyele. Itne aneke Jeush, Jalam uthene Korah uthene. Nhenhe itne Anah-eke ipmenhe areye-arle.

20-21 Urreke-arle Esau ikwerenhe areye-akerte aname-irretyenhenge, tyerrtye apmereke-artweye areye itnekenhe Seir-eke akwerrke areye-arle aneke. Artwe nhenhe Seir, Hor-arenye areye-kenhe-arle. Re-arlke tyerrtye atningkenge itne anetyarte apmere Edom-ele. Alere Seir-kenhe areye arritnye aneke Lotan, Shobal, Zibeon, Anah, Dishon, Ezer uthene Dishan uthene.

22 Lotan alere atherre-akerte, Hori uthene Homam uthene. Yaye akweke Lotan-kenhe aneke, Timna arritnye anemele.

23 Alere Shobal-kenhe areye, itne aneke Alvan, Manahath, Ebal, Shepho uthene Onam uthene.

24 Zibeon alere atherre-akerte. Aiah uthene Anah uthene. Anah yanhe rarle akenhe kwatye pintye nhenge apmere ahurratyele areke kwatye urinpe ahelhe-ngentyele arraterlenge arrule akngeye ikwerenhe-kenhe tangkeye areye arntarnte-arerle-anemele.

25 Anah ampe atherre-akerte, Dishon uthene arelhe Oholibamah uthene. Oholibamah anewe Esau-eke ante aneke.

26 Alere Dishon-kenhe areye aneke, arritnye itnekenhe Hemdan, Eshban, Ithran uthene Keran uthene.

27 Alere Ezer-kenhe areye, arritnye itnekenhe aneke, Bilhan, Zaavan uthene Akan uthene.

28 Dishan alere atherre-akerte, arritnye ikwere-atherrenhe Uz uthene Aran uthene.

29 Tyerrtye nhenhe areye Horite areyeke akngerrepate anerrirreke apmere Seir-ele aneke: Lotan, Shobal, Zibeon, Anah, 30 Dishon, Ezer uthene Dishan uthene.

31 Apmere Edom ikwerele, urreke Israel areyele Akngerrepate atnyenetyenhenge, tyerrtye arrpe-anenhe-arle akngerrepate aneke arrpenhe-ngentyele arrpenhe-werne. Nhenhe-arle akenhe arritnye itnekenhe: 32 Arrekwele apmere ikwere akngerrepate aneke Bela, Beor-eke alere. Re apmere arrpenhe Dinhabah-engentyele-arle.

33 Nhenge Bela-arle ilwekenge anteme, kenhe Jobab anteme-arle akngerrepate anerlenge, re anteme apmereke akngerrepate aneke. Re akenhe Zerah-ke alere-arle aneke apmere Bozrah-arenye.

34 Kenhe Jobab ilwekenge anteme, kele Husham anteme akngerrepate aneke. Re anteme-arle akngerrepate irreke Re akenhe apmere tyerrtye Teman-kenhe areye-ngentyele-arle.

35 Kenhe Husham-arle ilwekenge kele Hadad anteme-arle akngerrepate aneke Re anteme apmere ikwere akngerrepate aneke akngeye ikwerenhe Bedad-arle aneke, re akenhe thultye angkweye-arle aneke arrule-ngentyele, re akenhe apmere Midian-arenye thultye areye-arlke-arle atweke apmere Moab ikwere Haddad re akenhe Avith-kenhe-arle aneke.

36 Kenhe Hadad-arle ilwekenge, kele Samlah anteme-arle akngerrepate aneke. Re anteme-arle apmere ikwerenheke akngerrepate anerlenge. Re akenhe Masrekah-arenye-arle aneke.

37 Kenhe Samlah-arle ilwekenge, Shaul anteme-arle akngerrepate aneke. Re anteme-arle apmereke akngerrepate aneke. Re akenhe Rehoboth-arenye-arle aneke, apmere kwatye lhere akngerre itwele.

38 Kenhe Shaul-arle ilwekenge, Baal-Hanan anteme-arle akngerrepate aneke, Re anteme-arle apmere ikwerenheke akngerrepate aneke. Re akenhe Pau-arenye-arle aneke. Akngeye ikwerenhe akenhe Achbor-arle aneke.

39 Kele Baal-Hanan-arle ilwekenge, Hadar anteme-arle akngerrepate aneke, Re anteme-arle apmere ikwerenheke akngerrepate aneke, Anewe ikwerenhe akenhe Mehetabel-arle aneke, re akenhe ampe Matred-kenhe-arle aneke. Kenhe arritnye meye Matred-kenhe aneke Me-Zehab-arle.

40-43 Nhenhe-arle akenhe arritnye aneme akngerrepate areye Esau-ngentyele apmere Edom ikwerele-arle aneke. Timna, Alua, Jetheth, Oholibamah, Elah, Pinon, Kenaz, Teman, Mibzar, Magdiel uthene Iram uthene. Kele alere nhenhe areye amangkewarremele, itne apmere arrpe-anenhele anetyeke alherlte-iweke. Apmere arrpe-anenhele itne akngerrepate areye anerrirreke itne-kenheke-artweye areyeke apmere itnekenhe arritnye aneke alereke akngerrepate itne-arteke.

<- Genesis 35Genesis 37 ->