1 وزَادْ يَسُوعْ ظْهُرْ مَرَّة أُخْرَى لِتْلَامِذْتُو عْلَى شَطْ بُحَيْرَةْ طَبَرِيَّة. وهَاوْ كِيفَاشْ ظْهُرِّلْهُمْ. 2 كَانْ سِمْعَانْ بُطْرُسْ، وتُومَا الِّي يْعَيْطُولُو التُّومِي، ونَثَنَائِيلْ الِّي مِنْ مَنْطَقْةْ قَانَا الجَلِيلْ، ووْلَادْ زَبَدِي، وزُوزْ تْلَامْذَة أُخْرِينْ مِنْ تْلَامِذْةْ يَسُوعْ مَلْمُومِينْ. 3 قَالِلْهُمْ سِمْعَانْ بُطْرُسْ: «آنَا مَاشِي نِصْطَادْ». قَالُولُو: «أَحْنَا زَادَا نِمْشِيوْ مْعَاكْ». خَرْجُوا وطَلْعُوا فِي الفْلُوكَة، آمَا اللِّيلَة هَاذِيكَا مَا صْطَادُوا شَيْ.

4 وَقْتِلِّي طْلَعْ النْهَارْ كَانْ يَسُوعْ وَاقِفْ عَالشَّطْ، آمَا التْلَامْذَة مَا عَرْفُوهِشْ. 5 يَاخِي قَالِلْهُمْ: «يَا شَبَابْ، مَا صْطَدْتُوا شَيْ؟» جَاوْبُوهْ: «لَا». 6 قَالِلْهُمْ: «إِرْمِيوْ الشَّبْكَة عْلَى يْمِينْ الفْلُوكَة وتَوَّا تَلْقَاوْ الحُوتْ». رْمَاوْ الشَّبْكَة ومِنْ كُثْرِةْ مَا كَانِتْ مْعِبْيَة بِالحُوتْ، مَا نَجْمُوشْ يْخَرْجُوهَا. 7 قَالْ التِّلْمِيذْ الِّي يْحِبُّو يَسُوعْ لْبُطْرُسْ: «رَاهُو الرَّبْ يَسُوعْ!». كِي سْمَعْ سِمْعَانْ بُطْرُسْ كِلْمِةْ: «رَاهُو الرَّبْ يَسُوعْ»، لْبِسْ بَرْنُوسُو عْلَى خَاطْرُو كَانْ مْنَحِّيهْ، وتِرْمَى فِي المَاء. 8 والتْلَامْذَة الأُخْرِينْ وُصْلُوا لِلشَّطْ بِالفْلُوكَة، وهِيَّ تْكَرْكِرْ فِي الشَّبْكَة المْعِبْيَة بِالحُوتْ، عْلَى خَاطِرْهُمْ كَانُوا بْعَادْ عَالشَّطْ قْرَابِةْ المْيَاةْ مِيتْرُو أَكَهَوْ. 9 ووَقْتِلِّي خَرْجُوا لِلشَّطْ، شَافُوا حُوتْ يْطِيبْ عَالجْمَرْ، وخُبْزْ. 10 قَالِلْهُمْ يَسُوعْ: «جِيبُوا مِالحُوتْ الِّي شَدِّيتُوهْ تَوَّا». 11 طْلَعْ سِمْعَانْ بُطْرُسْ فِي الفْلُوكَة، وكَرْكِرْ الشَّبْكَة المِلْيَانَة لِلشَّطْ. وكَانِتْ فِيهَا 153 حُوتَة كْبِيرَة. ورَغْمِلِّي كَانِتْ مْعِبْيَة، مَا تْقَطْعِتْشْ. 12 قَالِلْهُمْ يَسُوعْ: «إِيجَاوْ كُولُوا!» وحَتَّى وَاحِدْ مِالتْلَامْذَة مَا تْجَرَّأْ يِسْأْلُو «إِنْتِ شْكُونْ؟»، عْلَى خَاطِرْ عَرْفُوا الِّي هُوَّ الرَّبْ يَسُوعْ. 13 يَاخِي قْرُبِّلْهُمْ يَسُوعْ، وعْطَاهُمْ الخُبْزْ، وزَادْ مَدِّلْهُمْ الحُوتْ. 14 هَاذِي كَانِتْ المَرَّة الثَّالْثَة الِّي ظْهُرْ فِيهَا يَسُوعْ لِتْلَامِذْتُو بَعْدْمَا قَامْ مِالمُوتْ.

15 وبَعْدْمَا كْلَاوْ، قَالْ يَسُوعْ لْسِمْعَانْ بُطْرُسْ: «يَا سِمْعَانْ وِلْدْ يُونَا، يَاخِي تْحِبْنِي أَكْثِرْ مِلِّي يْحِبُّونِي هَاذُومَا الكُلْ؟». جَاوْبُو: «إِيْ نْعَمْ، يَا رَبْ. إِنْتِ تَعْرِفْ الِّي آنَا نْحِبِّكْ». قَالُّو: «أَرْعَى الغْنَمْ مْتَاعِي». 16 وقَالُّو يَسُوعْ مَرَّة أُخْرَى: «يَا سِمْعَانْ وِلْدْ يُونَا، يَاخِي تْحِبْنِي؟». جَاوْبُو: «إِيْ نْعَمْ، يَا رَبْ، إِنْتِ تَعْرِفْ الِّي آنَا نْحِبِّكْ». قَالُّو: «تِلْهَا بِالغْنَمْ مْتَاعِي». 17 وسِأْلُو مَرَّة ثَالْثَة: «يَا سِمْعَانْ يَا وِلْدْ يُونَا، يَاخِي تْحِبْنِي؟». حْزِنْ بُطْرُسْ عْلَى خَاطِرْ يَسُوعْ سِأْلُو مَرَّة ثَالْثَة: «يَاخِي تْحِبْنِي؟». قَالُّو: «يَا رَبْ، إِنْتِ تَعْرِفْ كُلْ شَيْ، وتَعْرِفْ الِّي آنَا نْحِبِّكْ». قَالُّو يَسُوعْ: «أَرْعَى الغْنَمْ مْتَاعِي. 18 الحَقْ الحَقْ نْقُلِّكْ: وَقْتِلِّي كُنْتْ صْغِيرْ، كُنْتْ تِلْبِسْ حْوَايْجِكْ وَحْدِكْ وتِمْشِي وِينْ تْحِبْ. آمَا وَقْتِلِّي تْوَلِّي شَايِبْ، تْمِدْ يْدِيكْ ووَاحِدْ آخَرْ يْلَبْسِكْ ويْهِزِّكْ وِينْ مَا تْحِبِّشْ تِمْشِي». 19 لَمَّحْ يَسُوعْ بِالكْلَامْ هَاذَا لِلطَّرِيقَة الِّي بِشْ يْمُوتْ بِيهَا بُطْرُسْ ولِّي بِشْ يِتْمَجِّدْ بِيهَا اللَّهْ. ومِنْ بَعْدْهَا قَالُّو: «تَبَّعْنِي!».

20 تْلَفِّتْ بُطْرُسْ، وشَافْ التِّلْمِيذْ الِّي يْحِبُّو يَسُوعْ يْتَبَّعْ فِيهُمْ، وهُوَّ الِّي إِتَّكَّى عْلَى صْدِرْ يَسُوعْ وَقْتْ العْشَاء وقَالُّو: «يَا سِيدِي، شْكُونُو الِّي بَاشْ يْخُونِكْ؟». 21 وَقْتِلِّي شَافُو بُطْرُسْ قَالْ لْيَسُوعْ: «وهَاذَا يَا رَبْ، آشْ بَاشْ يْصِيرْلُو؟». 22 قَالُّو يَسُوعْ: «إِذَا كَانْ نْحِبُّو يُقْعُدْ حَيْ حَتَّى لِينْ نِرْجَعْ، هَاذَا مَا يْخُصِّكْشْ. إِنْتِ، تَبَّعْنِي!». 23 يَاخِي طَلْعِتْ إِشَاعَة بِينْ المُؤْمْنِينْ الِّي التِّلْمِيذْ هَاذَاكَا مُشْ بِشْ يْمُوتْ. آمَا يَسُوعْ مَا قَالِشْ لْبُطْرُسْ الِّي هُوَّ مُشْ بِشْ يْمُوتْ. قَالُّو: «إِذَا كَانْ نْحِبُّو يُقْعُدْ حَيْ حَتَّى لِينْ نِرْجَعْ، هَاذَا مَا يْخُصِّكْشْ». 24 والتِّلْمِيذْ هَاذَا هُوَّ الِّي يِشْهِدْ بِالأُمُورْ هَاذِي، وهُوَّ الِّي كْتِبْهَا. وأَحْنَا نَعْرْفُوا الِّي شْهَادْتُو صْحِيحَة.

25 وفَمَّة بَرْشَة حَاجَاتْ أُخْرِينْ عْمَلْهُمْ يَسُوعْ. كَانْ تِتْكْتِبْ بِالوَحْدَة بِالوَحْدَة، مَا نْظُنِّشْ الِّي العَالِمْ كَامِلْ بِشْ يَرْفَعْ الكْتُبْ الِّي بِشْ تِتْكْتِبْ عْلِيهَا.

<- يُوحَنَّا 20