1 Ida garam utup tsiraꞌ igi yuriꞌ da iyu Arangan ifan da Pilatus, Rom gabman gan tsiraꞌ mpada tayangꞌ intap Yudia. 2 Da ribarangan idzaꞌ nan i Yisu da ini, “Aga tsanga garam arani iyu agi ampanggangꞌ ifa asub. Arangan ini i ribarangan anungꞌ rima takis fadan da Kaisar, da ini runggan Kristus, Garam Anutu ragadan, da king.”
3 Ibinigi da Pilatus igut i Yisu ibiani, “Agu Yuda king gan, a?”Mt 27:11; Mk 15:2; Ywn 18:33,37
4 Ida Pilatus ini wasi da garam pumuꞌa Anutu wain gudzun rusan da garam santan igi ibiani, “Dzi sau garam ani asuban.”
5 Da bitsintaꞌ rib igi rungꞌ irim udzungꞌ da ini, “Arangan nan gan fisa gin mingꞌa Yudia gampan santan iraꞌ i garam wangun i suda ufuai da Rom gabman gan. Arangan iraꞌ gin imingꞌ Galili da ibawaꞌ ani.”
6 Pilatus iringant i nan igi da igutin, “Garam igi garam Galili, ma?” 7 Gubuꞌ arangan sruꞌa gin bida Yisu garam Galili da mpada warangꞌ i Herot nanggan mpada tayangꞌ gin, da itangin Arangan ifan da Herot, i Herot impa Yerusalem da gubuꞌ arigi.
8 Gubuꞌ Herot tsanganda Yisu da nugun inuf wasi gin, i gubuꞌ guntiꞌ bingan da arangan ini tsanganda Arangan. I wain, Herot iringant i Yisu sisingꞌ gan da ini tsanganda Arangan nanga nam maran mangan. 9 Herot irim nan guta gin ampi bingan ifan da Yisu, da bitsintaꞌ Yisu anungꞌ ini nan mungaꞌ da arangan u. 10 Da garam pumuꞌa Anutu wain gudzun rusan da garam gudzupuꞌ i nan faidagin rungꞌ muntida nigi isu gudzu uris i nan ampi bingan dzura yaba i Arangan. 11 Ida Herot da garaman singaari irim umpur i Yisu da igira Arangan i ngarukui bini bida king ruas gan, da itip itangin Arangan ifa da Pilatus.Mt 27:27-31; Mk 15:16-20; Ywn 19:2-3 12 Da gubuꞌ arigi angu da Herot da Pilatus isu rinun i ruan, i mungꞌ da ribarangan irim ipiap i ruan.
13 Pilatus inuꞌ garam pumuꞌa Anutu wain tsiraꞌ da garam gudzun da garam santan impruꞌ, 14 da ini da ribarangan, “Agam ini garam arani garam mungꞌa i garam i sanab asub, da agam iyu iba da dzi. Da bitsintaꞌ dzi yintsaꞌ arangan i nan guta gin imingꞌ agam maranggam, da dzi wawaꞌ da asub mangan ibi agam nidan. 15 Herot ibinigi isau da itip itangin iba da agi, da waringantin, arangan wanang asub mangan i mampan u. 16 Ibinigi da bungꞌ aripi arangan da dzi natangin arangan nafan.” 17 *Nan bida ani imingꞌ papiar ratar fain: Waꞌa udzuf santan da waꞌa nam gadan tsiraꞌ igi da arangan sanaban rumingꞌ i uda garam bitsintaꞌ sinungꞌ karabus da tanginda fadan da ribarangan.
18 Da bitsintaꞌ garam santan igu ruan nuꞌan bida ani, “Wais garam arigi funub da watangin Barabas naba da agai.” 19 (Barabas impa karabus i nanggan ruta gabman isa ruan mingꞌa gamp tsiraꞌ igi da isa garam funub.)Mt 27:16-21; Mk 15:7-11; Ywn 18:39-40 20 Pilatus ini tanginda Yisu fadan, ibinigi da itip igut i ribarangan.
21 Da bitsintaꞌ ribarangan rungꞌ inuꞌ ibiani, “Wais arangan nayab gai! Wais arangan nayab gai!”
22 Pilatus itip ini nan da ribarangan isu iruꞌ da bits ibiani, “I wain idzuwai? Da garam ani inang asub idzuwai? Dzi wawaꞌ da arangan asuban mangan i mampa gin u. Ibinigi da bungꞌ aripi arangan da dzi natangin arangan nafan.”
23 Da bitsintaꞌ ribarangan iyaiꞌ da inuꞌ tsiraꞌ bingan irim udzungꞌ i isa Yisu yaba gai mpara i ruan. Da ribarangan nan gan yaiꞌan irasu Pilatus nan gan.Mt 27:22-23; Mk 15:12-14; Ywn 19:6,14-15 24 Ibinigi da Pilatus yatsungꞌ ribarangan nan gan. 25 Da arangan itangin Barabas, garam mpada karabus i nanggan ruta gabman isa ruan da isa garam funub, iwaꞌ ibi ribarangan nidan. Da itangin Yisu ifa garam singaari banginggan yatsungꞌ ribarangan maran furan gan.Mt 27:26; Mk 15:15; Ywn 19:16
26 Gubuꞌ ribarangan uda Yisu fadan, da garam singaari impung Saimon garam Sairini bungꞌ bada gamp tsiraꞌ igi. Da yusu arangan i buaringꞌa Yisu gai mpara i ruan gan atsungꞌa Yisu. 27 Da garam utup tsiraꞌ bingan yatsungꞌ Arangan, impruꞌ da sagat rangan. 28 Yisu itaning da ini da ribarangan ibiani, “Sagat Yerusalem, agam anungꞌ ranga i dzi; agam warang i runggam da narum rusam. 29 I bungꞌ awaꞌ gubuꞌ mangan da agam bungꞌ ani nan nabiani, ‘Sagat yami, mamida rima narun, da mamida rima sisun da mamaꞌ narun, ribarangan nugun natsiaꞌ.’ 30 Da garam bungꞌ ani da mamai nabiani, ‘Wagruꞌ ruam ragun i agai,’ da bungꞌ ani da mamai yun, ‘Wabuafir aga sib.’ 31 I bida garam nanga bida ani da gai pisia da bu bida anungꞌ da gai maringꞌ?”†gai pisia...gai maringꞌ - Yisu iram runggan, garam asub maꞌan, da gai pisia, da iram garam asub da gai maringꞌ. Bida garam nanga nam maisan bida nigi da garam asub maꞌan, da bungꞌ anang nam maisan nayus da garam asub.
32 Da iyu garam maisan iruꞌ impruꞌ da Arangan ifa i isa funub yaba gai. 33 Gubuꞌ ribarangan fawaꞌa mumai nida Gudzu Urun,Mt 27:33; Mk 15:22; Ywn 19:17 da idintip Arangan iyab gai mpara i ruan, impruꞌ da garam maisan ugu, mangan i bangin bini da mangan i bangin yas.Mt 27:38; Mk 15:27; Ywn 19:18 34 Da Yisu ini, “Ramangꞌ, wasiat ribarangan nanggan maisan rai, i tuas arangan wasruꞌ i nam idzuwai ribarangan nangan.” Da garam singaari yantungꞌ rarub i Arangan ngarukui gan da ifab i ruan.Yon 1:7; Mt 27:35; Mk 15:24; Lk 1:8-9; Ywn 19:24; Ap 1:26 35 Da garam santan rung muntida raraban, da garam gudzun ipus mun da irim umpur in da ini, “Arangan irim garam fain sib, da arangan narim runggan sib, bida arangan Kristus aru Anutu ragadan.” 36 Garam singaari ibinigi irim umpur in da irim wain gurun giriripan da Arangan.Mt 27:48-49; Mk 15:36; Ywn 19:29 37 Da ini, “Bida garam Yuda king gan agu, da warim runggam sib.” 38 Da nan akaran mingꞌa wagungꞌ i Arangan ini ibiani, “Nani garam Yuda King gan.”
39 Garam maisan tupriꞌan nigi mangan ini nan asub i Yisu ibiani, “Agu Kristus, Garam Anutu ragadan, a? Warim runggam sib da warim agai sib nampruꞌ nabinigi!”
40 Da bitsintaꞌ garam maisan mangan igi impiꞌ mangan igi da ini, “U yu barabin isangꞌ garam ani gan udan, da u rat i Anutu pas, ma? 41 Agi yu barabin ani isangꞌ agi asubangꞌ nangan rururungan, da bitsintaꞌ garam ani anungꞌ inang asub mangan u.” 42 Ida arangan ini, “Yisu, maram wafur dzi da gubuꞌ u suda king.”
43 Da Yisu ini nan mungaꞌ ibiani, “Dzi nani nan nidzun da agu, gubuꞌ aruani da agu bungꞌ arut dzi nampai Paradis, gamp bini mpada nugun nufan.”
44-45 Gubuꞌ maran ibawaꞌ ibi gubuꞌ muntida wasaꞌ, da gubuꞌ anungꞌ ipuꞌ yari, da nam mimin tsiraꞌ ibuafir intap santan sib isangꞌ 3 kilok nam nufan. Da bruꞌ tsiraꞌ mingꞌa Ungar Mararam wasaꞌ igari ruan farab isu iruꞌrun.‡Da bruꞌ tsiraꞌ mingꞌa Ungar Mararam wasaꞌ igari ruan farab isu iruꞌrun. - Bruꞌ tsiraꞌ igi imingꞌ wasaꞌ i Mumai Mararam da Mararam Nidzun. Garam Yuda santan maran ifur Mumai Mararam Nidzun igi isu Anutu mumai gan mpada gin mingꞌa intap ani (Kisim Bek 26:31-33). Garam pumuꞌa Anutu wain tsiraꞌ angu isangꞌ atangꞌa Mumai Mararam Nidzun igi gubuꞌ bitsintaꞌ bitsintaꞌ angu da udzuf santan. Da iyu garam Yuda maranggan da irim biꞌ isu dangki ifan da Anutu i siata ribarangan nanggan maisan rai (Wok Pris 16:15-16). Gubuꞌ Yisu mampan da isu dangki ifan da Anutu i siata agi nanggangꞌ maisan rai. Da aruani garam pumuꞌa Anutu guman tsarada nam da rima dangki fadan da Anutu intsup sib. Gubuꞌ bruꞌ tsiraꞌ garida ruan da isantingꞌ wasi ibi nam mangan ruwamingꞌ wasaꞌ sib i garam gar da Anutu u. Aruani da garam muarutsan santan isangꞌ fada rururungan angu da Anutu (wafaris Hibru 6:19-20; 9:1-15; 10:19-22; Efesus 2:18; 3:12). 46 Da Yisu inuꞌ nifun tsiraꞌ ibiani, “Ramangꞌ, dzi rim ganunggangꞌ ibiaꞌ u banginggam.” Gubuꞌ Arangan nida bida nigi sib da imamp.Mt 27:50; Mk 15:37; Ywn 19:30
47 Gubuꞌ garam singaari gudzunggan tsanganda nam waꞌan igi, da arangan itsarif Anutu da ini, “Nan nidzun bingan, garam ani garam rururungan nidzun bingan.” 48 Rib santan waꞌa i furisan igi, gubuꞌ tsanganda nam igi waꞌa bida nigi, da itsiats nugun ruta nam gaiban tsiraꞌ bingan ifa gampan. 49 Da bitsintaꞌ rib aru sruꞌa i Yisu, mpruꞌan da sagat fain atsungꞌa gin mingꞌa Galili badan ugu, imunti ruguntiꞌ da irarab sib.Mt 27:55-56; Mk 15:40-41; Ywn 19:25
50 Da garam mangan binganggan Yosef, arangan garam bini da rururungan. Arangan Yuda garam gudzunggan manga mingꞌa wasaꞌ i utup nan tipan,Mt 26:59; Mk 14:55; 15:1,43; Lk 22:66; Ywn 3:1; 7:50; 11:47; 19:38-42; Ap 4:5,15; 5:21,27,34,41; 6:12,15; 22:30; 23:1,6,15,20,28; 24:20 51 da bitsintaꞌ arangan anungꞌ yatangꞌ warangꞌ i ribarangan uwayantan rantsan da sanaban nangan. Arangan gampan wain Arimatia mingꞌa Yudia, da impa ifangꞌ i Anutu nanggan mpada tayangꞌ gan garaman. 52 Arangan ifa da Pilatus da igutin i uda Yisu rini uriatsan.Mt 27:57-58; Mk 15:43-45; Ywn 19:38 53 Da arangan iyu iruꞌ da ipatiꞌ sib i bruꞌ sap da irim yatangꞌ tauf bampun mamida rima manga gin.Mt 27:59-60; Mk 15:46; Lk 23:53 54 Nigi gubuꞌ tipa ruan;Mk 15:42; Ywn 19:42 nam inuf sib da gubuꞌ Sabat inang i waꞌan.
55 Da sagat ruas ruta Yisu mingꞌa Galili badan ugu yatsungꞌ Yosef da itsanga tauf bampun da irim Arangan rini uriatsan ibi anungꞌ. 56 Ida tuas arangan itip ifan da itip nam rini gaunt bini i rima i Yisu rini uriatsan. Da bitsintaꞌ impa asap da gubuꞌ Sabat yatsungꞌ nan faidagin.
<- Lukas 22Lukas 24 ->- ~3~ Nan bida ani imingꞌ papiar ratar fain: Waꞌa udzuf santan da waꞌa nam gadan tsiraꞌ igi da arangan sanaban rumingꞌ i uda garam bitsintaꞌ sinungꞌ karabus da tanginda fadan da ribarangan.
23:19: Mt 27:16-21; Mk 15:7-11; Ywn 18:39-40
23:23: Mt 27:22-23; Mk 15:12-14; Ywn 19:6,14-15
- ~7~ gai pisia...gai maringꞌ - Yisu iram runggan, garam asub maꞌan, da gai pisia, da iram garam asub da gai maringꞌ. Bida garam nanga nam maisan bida nigi da garam asub maꞌan, da bungꞌ anang nam maisan nayus da garam asub.
23:33: Mt 27:33; Mk 15:22; Ywn 19:17
23:33: Mt 27:38; Mk 15:27; Ywn 19:18
23:34: Yon 1:7; Mt 27:35; Mk 15:24; Lk 1:8-9; Ywn 19:24; Ap 1:26
23:36: Mt 27:48-49; Mk 15:36; Ywn 19:29
‡23:44-45: Da bruꞌ tsiraꞌ mingꞌa Ungar Mararam wasaꞌ igari ruan farab isu iruꞌrun. - Bruꞌ tsiraꞌ igi imingꞌ wasaꞌ i Mumai Mararam da Mararam Nidzun. Garam Yuda santan maran ifur Mumai Mararam Nidzun igi isu Anutu mumai gan mpada gin mingꞌa intap ani (Kisim Bek 26:31-33). Garam pumuꞌa Anutu wain tsiraꞌ angu isangꞌ atangꞌa Mumai Mararam Nidzun igi gubuꞌ bitsintaꞌ bitsintaꞌ angu da udzuf santan. Da iyu garam Yuda maranggan da irim biꞌ isu dangki ifan da Anutu i siata ribarangan nanggan maisan rai (Wok Pris 16:15-16). Gubuꞌ Yisu mampan da isu dangki ifan da Anutu i siata agi nanggangꞌ maisan rai. Da aruani garam pumuꞌa Anutu guman tsarada nam da rima dangki fadan da Anutu intsup sib. Gubuꞌ bruꞌ tsiraꞌ garida ruan da isantingꞌ wasi ibi nam mangan ruwamingꞌ wasaꞌ sib i garam gar da Anutu u. Aruani da garam muarutsan santan isangꞌ fada rururungan angu da Anutu (wafaris Hibru 6:19-20; 9:1-15; 10:19-22; Efesus 2:18; 3:12).
23:46: Mt 27:50; Mk 15:37; Ywn 19:30
23:49: Mt 27:55-56; Mk 15:40-41; Ywn 19:25
23:50: Mt 26:59; Mk 14:55; 15:1,43; Lk 22:66; Ywn 3:1; 7:50; 11:47; 19:38-42; Ap 4:5,15; 5:21,27,34,41; 6:12,15; 22:30; 23:1,6,15,20,28; 24:20
23:52: Mt 27:57-58; Mk 15:43-45; Ywn 19:38
23:53: Mt 27:59-60; Mk 15:46; Lk 23:53
23:3: Mt 27:11; Mk 15:2; Ywn 18:33,37
23:11: Mt 27:27-31; Mk 15:16-20; Ywn 19:2-3