1 Gubuꞌ mangan Yisu rungꞌ utusa i nan da garam da fisa i sisingꞌ bini mingꞌa Ungar Mararam igi, da garam pumuꞌa Anutu wain gudzun rusan, da garam gudzupuꞌ i nan faidagin, da garam gudzun mingꞌa wasaꞌ i ampan iba da Arangan. 2 Da ribarangan ini da Yisu ibiani, “Wani da agai i u nang nam ani i manga binganggan da nampanggan? Da manga taga ruan da agu i nanga nam bida nigi?”

3 Da Yisu ini nan mungaꞌ, “Dzi binigi bungꞌ agut i agam mungꞌ i nan mangan. Wani da dzi, 4 nampangꞌ Yowanis ruruba garam in iba imingꞌ gunungun ma iba imingꞌ garam gar in?”

5 Da ribarangan ini nan da ruan ibiani, “Bida agi nida bida ani, ‘Iba imingꞌ gunungun,’ da arangan bungꞌ ani, ‘Ibianungꞌ da agam imami muarutsa arangan?’ 6 Da bitsintaꞌ bida agi nida, ‘Iba imingꞌ garam gar in,’ da garam santan bungꞌ atapu agi funub i tauf, i ribarangan imuaruts i Yowanis igi profet mangan.” 7 Ibinigi da ribarangan ini, “Aga anungꞌ isruꞌ gin i arangan nampanggan iba imingꞌ anungꞌ.”

8 Da Yisu ini da ribarangan ibiani, “Dzi binigi, dzi wasangꞌ i nidan da agam i dzi nang nam santan igi i manga binganggan da nampanggan.”

9 Yisu ini nan raman ani da ampan, “Garam mangan iraf gum wain mangan. Da irim ifa rib faingꞌ banginggan i nanga gum yaba gin. Da itip nan i ribarangan uda nam igi nidzunggan marafaingꞌ da rima faingꞌ da arangan. Ida arangan ifa gamp bingibing mangan isangꞌ gubuꞌ guntiꞌ bingan. 10 Da waꞌa gubuꞌ wain nidzun dzuban da itangin mamaꞌ guman mangan ifan da garam mpada tayangꞌ gum igi i uda wain nidzun igi arangan gan faingꞌ mingꞌa gum wain igi.. Da bitsintaꞌ garam mpada tayangꞌ gum igi yis mamaꞌ gum igi da iwat rai ifa bangi sasaꞌ. 11 Da arangan itip itangin mamaꞌ gum bits ifan. Da bitsintaꞌ ribarangan irim ub in da yis arangan ibinigi da iwat rai ifa bangi sasaꞌ. 12 Da itip itangin mamaꞌ gum isu iruꞌ da bits da ribarangan yis da irim biꞌ rutin da itapu iwaꞌ manaꞌ. 13 Ida gum wain rinunggan ini, ‘Dzi nabu nang nabianungꞌ? Dzi bungꞌ atangin narunggangꞌ marangꞌ aridagin rururungan; dzi marangꞌ ifur ibi ribarangan bungꞌ atsarif arangan.’

14 “Da bitsintaꞌ gubuꞌ garam mpada gum wain igi tsanganda garam igi narunggan badan da ini da ruan, ‘Garam igi bungꞌ asu wain i ramanggan nanggan santan. Agi nais arangan funub da gum wain ani bungꞌ asu agi gangꞌ.’ 15 Ibinigi da ribarangan itapu arangan iwaꞌ sinungꞌ gum wain igi da yis funub.

20 Ibinigi da rungꞌ itsanga Arangan ragun, da itangin garam i arangꞌa gin, inang runggan ibi garam nan nidzun. Tuasarangan maran ifur i mpunga Yisu yaba i nifun nan nidan da rima fada kiap tsiraꞌ i raruda Arangan. 21 Ibinigi da garam arangꞌa gin igut i Arangan, “Kidungwaga tsiraꞌ, aga sruꞌ gin u ni nan da u santingꞌ agai i nan rururungan. U watsarif garam mangan da u dzigin nan gin u, da bitsintaꞌ u ni nan nidzun rururungan angu da santan i santingꞌa Anutu sanaban. 22 Garam Yuda nanggan faidagin ini wai, isangꞌ agi rima takis fadan da Kaisar, ma imaꞌ?”

23 Arangan itsanga tuasaranga uwayantan iyuꞌa Arangan igi da ini da ribarangan ibiani, 24 “Wasantingꞌ dzi i moni mangan. Manga maraganunggan da binganggan imingꞌ gin?”

25 Da tuasaranga ni ibiani, “Kaisar.”

27 Utup Sadusi, nida garam mampan mamida tipa muntida marataꞌ ugu, fain iba da Yisu da igutin, 28 “Kidungwaga tsiraꞌ, Moses yakar nan faidagin ibiani da agi: bida garam manga mampan da fininggan rumpadan ruta narun ruas maꞌan, da garam igi rainggan natip nau sagat yaruf igi da narim narun rutin i faringꞌa rainggan yaba gin.[c] 29 Ibinigi da garam mangan narun rusan marub 7. Miamun iyu sagat da anungꞌ irim narun da imamp. 30-31 Da rain atsungꞌan itip iyu sagat yaruf igi da bitsintaꞌ imamp sinungꞌ sagat da narun imaꞌ. Da rain ruas santan igi yatsungꞌ ruan i sanab bida nigi da imamp sib ruta narun maꞌan. 32 Da sagat imamp bampan sib in. 33 Ibinigi da waꞌa gubuꞌ garam mampan tipa muntida marataꞌ, da sagat igi bungꞌ asu mangan igi fininggan? I garam 7 bingan iyu arangan isu i fininggan sib.”

34 Da Yisu ini da ribarangan, “Mingꞌa intap ani da garam da sagat iyu ruan. 35 Da bitsintaꞌ waꞌa gubuꞌ aga da rib Anutu tsanganda bini i tipa muntida marataꞌ sinungꞌ nam mampan wasangꞌ uda ruan. Imaꞌ. 36 Da ribarangan anungꞌ isangꞌ i tipa mampan, i ribarangan iwaꞌ ibi angira, da isu Anutu narun rusan, i ribarangan imunti marataꞌ sinungꞌ nam mampan. 37 Da Moses isantingꞌ wasi i garam mampan tipa muntida marataꞌ igi imingꞌ nan akaran yaba i dzaf gada gai maragagab, da gubuꞌ faringꞌa Nifutsarif bida ani, ‘Abraham Anutu gan, da Isak Anutu gan, da Yakop Anutu gan.’[d] 38 Da Arangan anungꞌ isu garam mampan Anutu gan. Imaꞌ, isu garam mpada maran taꞌan Anutu gan, i mingꞌa Arangan maranggan da garam santan impa marataꞌ.”

39 Da garam gudzupuꞌ i nan faidagin fain ini Arangan nanggan mungaꞌ ibiani, “Kidungwaga tsiraꞌ, u ni nan bini.” 40 I ribarangan irat i rungꞌ guta i Arangan i nan fain.[e]

41 Ida Yisu igut i ribarangan, “Ibubianungꞌ ida rib ini Kristus igi Tafit narunggan? 42 Tafit runggan ini nan igi wasi imingꞌ papiar nida Mint Tsarifa Anutu Gin,

45 Rib santan rungꞌ ringanta i nan da Yisu ini da gan riban atsungꞌa gin, 46 “Watsanga runggam sib i garam gudzupuꞌ i nan faidagin. Ribarangan maran yari i atsufa ngarukui faga guntiꞌ angu da yunga ampan maran mingꞌa mumai rantsa nam in i garam tsarifan da rima bingan tsiraꞌ rutin. Da maran yari i uda mumai miamun angu mingꞌa ungar mpruꞌa ruan gin da mingꞌa nam gadan tsiraꞌ.[g] 47 Da ribarangan yiyuꞌ sagat yaruf i wapa i ungaran da nam bunumpan santan. Da isu umpur i udagin faga guntiꞌ bingan. Garam bida nigi bungꞌ ayu nam tsakia tsiraꞌ nayus da gubuꞌ Anutu raruda garam.”