1 Da Yisu ifa mamai Oliv. 2 Da pisa tataꞌ maratait da Arangan itip ifa Ungar Mararam ntiangꞌ gan wasaꞌ. Da ampan santan iba rutin, da Arangan impai iruꞌ da yutus ribarangan. 3 Da garam gudzupuꞌ i nan faidagin da garam Farisai iyu sagat gabun bits ruta garam mangan araraꞌa i ruan iba munti ampan maran 4 da ini da Yisu, “Kidungwaga, sagat ani irut garam mangan yararaꞌ i ruan da rib itsangan arangan. 5 Moses ini i Nan Faidagin i sagat nanga asub bida ani da agi natapu funub i tauf. Da u bungꞌ ani nan idzuwai gin?”

6 Ribarangan ini nan bida nigi i intsaꞌa Yisu i nifu nan idzuwai Arangan nidan i suda ribarangan nan gan muntida yaba gin da dzura nan asub da Arangan. Da bitsintaꞌ Yisu idzuangꞌ iruꞌ da yakar nan iruꞌ intap ngaruntsuaf i bangi tsitsin.

7 Rib igi rurim udzungꞌ da Arangan da igutin babampafan i sagat igi. Da Arangan iraꞌ i ruan da ini, “Bida agamam mangan asub maꞌa gin, da arangan nasu miamun i tapuda tauf yaba i sagat ani!” 8 Ini nan igi sib da itip idzuangꞌ iruꞌ da ikakar nan iruꞌ intap ngaruntsuaf.

9 Ribarangan ringanta i nan igi da itus ruan bits bits ifa gan arun. Garam tsiraꞌ tsiraꞌ isu miamun i ruan da santan ibinigi ifa sib isangꞌ Yisu angu da sagat igi rungꞌ impai. 10 Yisu iraꞌ i ruan iyab da igut i sagat igi, “Sagat ai, garam santan bingan ugu ifa anungꞌ? Gan bits rumunti i raruda agu, ma?”

11 Da sagat igi ini binaꞌ, “Garam tsiraꞌ, imaꞌ.”

Da Yisu ini, “Da dzi binigi, dzi wasangꞌ i raruda agu u. Wafan. Aruani da fadan da anungꞌ tipa nanga asub u.”

12 Raiyi da Yisu itip ini da ampan ibiani, “Dzi su nam puatsadan arida intap sib. Manga atsungꞌa dzi da wasangꞌ yunga nam mimindan wasaꞌ u. Imaꞌ, arangan bungꞌ ayu nam puatsadan rima maran taꞌan.”

13 Garam Farisai ringanta i nan igi da ini ibiani, “U runggam ini nan wasi iyab i runggam, ibinigi da aga wasangꞌ uda u nan gam nida runggam wasi igi yaban bida nan nidzun u.”

14 Yisu itip ini da ribarangan ibiani, “Hai, dzi ni nan wasi iyab i runggangꞌ, da bitsintaꞌ nan dzi nidan ani nan nidzun, i dzi sruꞌ i gangꞌ wainggangꞌ bada gin da tipa fada gin. Da agam wasruꞌ i dzi gangꞌ bada gin da tipa fada gin u, imaꞌ! 15 Agam iraru garam i garam gar uwayantan angu. Da dzi anungꞌ iraru garam mangan u. 16 Da bida dzi raruda garam, da dzi bungꞌ araru rururungan, i anungꞌ dzi runtaꞌ angu u; imaꞌ, Ramangꞌ aru tanginda dzi badan ugu irut dzi. 17 Agam Nan Gam Faidagin ini i bida garam iruꞌrun nida nan mangan wasi sangꞌa ruan angu da nan igi nan nidzun. 18 Ibinigi da dzi runggangꞌ ini runggangꞌ wasi, da Ramangꞌ aru tanginda dzi badan ugu ini dzi wasi impruꞌ ibinigi.”

19 Rib Farisai igut i Arangan ibiani, “U ramanggam impa anungꞌ?”

Da Yisu ini binaꞌ, “Agam wasruꞌ i dzi ma Ramangꞌ u. Bida agam sruꞌa i dzi, da agam isangꞌ i sruꞌa i dzi Ramanggangꞌ bida nigi.”

20 Yisu ifis i nan da rib igi imingꞌ Ungar Mararam ntiangꞌ gan wasaꞌ mumai rima dangki gin. Da garam mangan wampung Arangan u; imaꞌ, i Arangan gubuꞌ gan anungꞌ iwarip ibawaꞌ u.

21 Da Yisu itip ini da ribarangan ibiani, “Dzi bungꞌ afan da agam bungꞌ asau dzi, da agam bungꞌ amamp nampruꞌ da nanggam maisan. Da gamp dzi fada gin da agam wasangꞌ bada gin u.”

22 Rib Yuda gudzun rusan iringant i nan igi da ini ibiani, “Wain ibi anungꞌ da ini, ‘Gamp dzi fada gin da agam wasangꞌ bada gin u’? Mani bungꞌ ais runggan funub, ma?”

23 Yisu ini binaꞌ, “Agam iba imingꞌ intap ani, da dzi ba imingꞌ wagungꞌ. Agam isu intap ani gan, da dzi anungꞌ isu intap ani gan u. 24 Ibinigi da dzi ni da agam sib wa i agam bungꞌ amamp nampruꞌ da gam nanggam maisan. Da bida agam mamida i muarutsa bida Dzi Mpa Ibi Arigi Angu,†Dzi Mpa Ibi Arigi Angu — Yisu isantingꞌ runggan wasi ibi Aranga Anutu nidzun. Watsanga:Kis 3:14; Ywn 8:28,58; 13:19 da agam bungꞌ amamp nampruꞌ da nanggam maisan igi i.”

25 Da ribarangan igutin ini binaꞌ, “Agu wai?”

Da Yisu ini ibiani, “Nan dzi nida i dzi mangan ani, da dzi ni da agam sib ugu da gubuꞌ dzi raꞌa i gumangꞌ da iba da isangꞌ aruani. 26 Nan ampi bingan rumingꞌ i dzi nidan da agam i raruda agam. Da bitsintaꞌ Aru tanginda dzi badan ugu, Arangan nan nidzun wain, da nan dzi ringanta gin mingꞌa Arangan gin, nigi angu da dzi nang da dzi ni wasi da garam intap.”

27 Rib igi anungꞌ isruꞌ i nan Arangan nidan igi ini iyab i Ramanggan. 28 Ibinigi da Yisu ini binaꞌ, “Gubuꞌ agam raꞌa i Garam Narunggan, da agam bungꞌ asruꞌ gin nabi Dzi Mpa Ibi Arigi Angu,Kis 3:14; Ywn 8:24,58; 13:19 da dzi anungꞌ inang nam i rugangꞌ uwayantangꞌ u. Imaꞌ, nan idzuwai Ramangꞌ santingꞌa dzi gin, da dzi ni wasi. 29 Aru tanginda dzi badan ugu irut dzi da watangin dzi rai u, i dzi nang nam Arangan nugun nufa gin.” 30 Gubuꞌ Yisu rungꞌ nida nan igi, da rib ampi bingan imuaruts Arangan.

31 Yisu ini da rib Yuda muarutsa Arangan igi ibiani, “Bida agam gifa dzi nan gangꞌ babampaf, da agam isu dzi ribangꞌ atsungꞌa dzi nidzun. 32 Da agam bungꞌ asruꞌ i nan nidzun, da nan nidzun bungꞌ apiraꞌ agam rai sinungꞌ gum agam nangan bida garam gum utaꞌ.”

33 Ribarangan ini Arangan nifunggan mungaꞌ ibiani, “Agai ani Abraham tafan rusan da aga sau runggangꞌ i gubuꞌ mangan da aga suda garam fain garam guman utaꞌ. Da ibi anungꞌ da u buni piraꞌa aga rai sinungꞌ gum aga nangan bida garam gum utaꞌ?”

34 Yisu itip ini binaꞌ, “Dzi ni nan nidzun bingan da agam, garam nanga nam maisan isu nam maisan garam guman utaꞌ. 35 Garam gum utaꞌ wasangꞌ ruta garam gudzunggan utupan mpada ntingan u, da bitsintaꞌ garam gudzun narunggan bungꞌ ampa utup igi nanting. 36 Da bida Narun piraꞌa agam rai sinungꞌ nam maisan, da nan nidzun bingan, agam wasangꞌ i rungꞌ mpada bida nam maisan garam guman u.

37 “Dzi sruꞌ gin i agam Abraham tafan rusan, da bitsintaꞌ agam ini isa dzi funub, i wain agam warim wasaꞌ mangan imingꞌ wangunggam i dzi nan gangꞌ mpada gin u. 38 Dzi ni da agam i nam dzi ruta Ramangꞌ mpadan da tsangandan mingꞌa i maranggan ugu, da agam inang nam agam ringanta gin mingꞌa agam ramanggam gin.”

39 Da ribarangan ini, “Aga ramanggangꞌ Abraham.”

Da Yisu itip ini, “Bida Abraham narun rusan agam, da agam madanang nam Abraham nangan. 40 Dzi ni nan nidzun aru dzi ringanta gin mingꞌa Anutu gin ugu da agam sib, da bitsintaꞌ agam inang i isa dzi funub. Da Abraham anungꞌ inang nam bida nigi u. 41 Agam inang nam agam ramanggam musa nangan.”

Da ribarangan ini, “Aga anungꞌ mamaꞌ puatsi u; aga Ramanggangꞌ da Anutu runtaꞌ angu.”

42 Ida Yisu ini, “Bida agam Ramanggam Anutu da agam maram madari i dzi, i dzi imingꞌ Anutu gin iba, i wain arigi da dzi mpa wasaꞌ i agam. Dzi waba i rugangꞌ maranggangꞌ furan u, imaꞌ. Arangan itangin dzi iba. 43 Ibi anungꞌ da agam imami dzidziwanda i dzi nan gangꞌ nidan da agam igi? Wain ibi agam yintsungꞌ ringa bampun sib i ringanta i dzi nan gangꞌ. 44 Sadang isu agam ramanggam da agam ini atsungꞌa ramanggam igi wangunggan akatsan. Miamun ugu bawaꞌan da aruani da arangan isu garam bangi biꞌ siata garam gar rai, da arangan watsungꞌ nan nidzun u, i nan nidzun imaꞌ i arangan. Gubuꞌ arangan suda umpur da nigi arangan nifu nan gan rururungan, i arangan garam umpur da nan umpur sib angu ramanggan. 45 Da bitsintaꞌ dzi nang da dzi ni nan nidzun da agam, ibinigi da agam anungꞌ imuaruts dzi! 46 Isangꞌ i agam mangan santingꞌa dzi asubangꞌ nangan wasi? Da bitsintaꞌ bida dzi nida nan nidzun da agam, da ibi anungꞌ da agam imami muarutsa dzi? 47 Anutu garaman iringant i Arangan nan gan. Da agam anungꞌ Anutu narun rusan u, i wain igi da agam anungꞌ irim ringam i gan nan gan u.”

48 Garam Yuda gudzun rusan ini Arangan nan gan mungaꞌ ibiani, “Nan nidzun bingan! Agu garam Samaria da marapayam maisan iyantsang agu!”

49 Da Yisu ini, “Imaꞌ! Marapayam maisan mangan wayantsang dzi u. Dzi tsarif Ramanggangꞌ runtaꞌ angu da agam irim ub nidzun angu i dzi. 50 Dzi wanang i tsarifa rugaꞌ binganggangꞌ yaban u, da bitsintaꞌ aru nida i ampan tsarifa dzi, Arangan garam raruda nam rururungan. 51 Dzi nani nan nidzun bingan da agam, garam atangꞌa warangꞌ i dzi nan gangꞌ da anungꞌ isangꞌ i mampan u.”

52 Rib igi ini da Yisu ibiani, “Nan nidzun bingan, aruani da aga tsanga marapayam maisan irut agu sib wa! Abraham da profet ruas imamp sib wa, da agu munti babampaf i manga atangꞌa warangꞌ i u nan gam fisagin da uda yaban, da arangan wasangꞌ i mampan u. 53 Aga ramanggangꞌ Abraham imamp sib, da u mani yusa arangan, ma? Profet ruas ibinigi imamp sib. Amaꞌ! U buni nanga runggam bida anungꞌ?”

54 Yisu itip ini rib igi nifunggan mungaꞌ ibiani, “Bida dzi tsarifa runggangꞌ da nigi nam utaꞌ. Da bitsintaꞌ dzi Ramanggangꞌ aru agam nifum faringꞌa agam Anutu gam gin ugu, Arangan itsarif dzi. 55 Agam wasruꞌ i Arangan mangan u, da bitsintaꞌ dzi sruꞌ i Arangan. Bida dzi nida dzi mamida i sruꞌa i Arangan, da dzi madawaꞌ abi garam nan umpur nabi agam. Da bitsintaꞌ dzi sruꞌ i Arangan da yatangꞌ warangꞌ i Arangan nan gan. 56 Gubuꞌ agam tafanggam Abraham maran fura i tsanganda dzi gubuꞌ gangꞌ badan ani, da nugun inuf in, da gubuꞌ arangan tsanganda sib da nugun itsiaꞌ wasi angu gin.”

57 Rib Yuda itip ini Arangan nan gan mungaꞌ ibiani, “Agu udzufam anungꞌ iwarip iwaꞌ 50 da u butsanga Abraham ibi anungꞌ?”

58 Da Yisu ini binaꞌ, “Nan nidzun bingan dzi nani da agam! Gubuꞌ Abraham rinanggan mamida i apingꞌa arangan da Dzi Mpa Ibi Arigi Angu.”Kis 3:14; Ywn 8:24,28; 13:19 59 Ibinigi da ribarangan intsungꞌ tauf i tapuda Arangan funub, da bitsintaꞌ Arangan ifingꞌ i ruan da itangin Ungar Mararam rai.

<- Yowanis 7Yowanis 9 ->