1 Gubuꞌ Yisu nida nan igi sib, da idantangꞌ iyab gunungun da yugin ibiani, “Ramangꞌ! Gubuꞌ maran ibawaꞌ sib. Warim bingan tsiraꞌ da Narunggam, i U Narunggam bungꞌ arim bingan tsiraꞌ da Agu. 2 I U rim nampang da arangan sib i suda wain i garam gar sib angu, i arangan rima nam mpada ratar ntingan angu da rib santan aru Agu runggam tangindan da arangan ugu. 3 Nam mpada ratar ntingan angu igi ibiani, sruꞌa i Agu, Anutu wain bitsintaꞌ nan nidzun angu, mpruꞌan da Yisus Kristus aru Agu tanginda badan ugu.

4 “Dzi santingꞌ Agu nampanggam da binganggam tsiraꞌ wasi imingꞌ intap ani sib iyab i gum U riman da dzi i nangan da dzi ntsupa sib. 5 Ramangꞌ, gubuꞌ intap mamida waꞌan ugu, da dzi rut Agu impruꞌ ruangꞌ mpadan da dzi yu bingan tsiraꞌ impruꞌ. Da aruani da watip warim bingan tsiraꞌ igi da dzi da gubuꞌ dzi tipa ruta Agu mpadan.

6 “Dzi kupis Agu wasi da rib U runggam piriangꞌan sinungꞌ garam intap ani da tangindan da dzi. Ribani su Agu gam, da U tangin da dzi, da ribarangan isu ringa mafrip da yatsungꞌ i Agu nan gam. 7 Aruani da ribarangan isruꞌ gin i nam santan U tangindan da dzi igi iba imingꞌ Agu runtaꞌ angu gin. 8 I dzi santingꞌ ribarangan i nan santan U riman da dzi ugu, da ribarangan iyu iyab da isruꞌ gin nidzun angu ibi dzi rut Agu impai da dzi ba. Da ribarangan imuaruts ibi U tangin dzi iba.

9 “Dzi yugin i ribarangan da anungꞌ garam intap santan u, rib aru U riman da dzi ugu angu, i ribarangan isu Agu gam. 10 Rib santan mingꞌa dzi gin isu Agu gam, da rib santan mingꞌa Agu gin isu dzi gangꞌ. Da ribigi irim bingan tsiraꞌ da dzi sib.

11 “Dzi wasangꞌ rumpada intap ani u, da bitsintaꞌ ribani rubungꞌ ampa intap ani, da dzi bungꞌ abiaꞌ da Agu. O Ramangꞌ Mararam Wain, wampa tayangꞌ ribani i U binganggam aru U riman da dzi ugu rini urun gan, i ribarangan suda bitsintaꞌ bida agi su bitsintaꞌ. 12 Gubuꞌ aru dzi ruta ribani mpadan da dzi impa tayangꞌ ribarangan bini i bingan aru U riman da dzi ugu rini urun gan. Da ribarangan santan impa bini, da garam bitsintaꞌ angu aru U tagada mungꞌ ugu, arangan runtaꞌ irim runggan rai. Nigi iwaꞌ i nanga U nan gam kakaran suda nidzun.

13 “Gubuꞌ aruani da dzi nang i biaꞌan da Agu, da dzi ni nan tuas aruani da gubuꞌ dzi rungꞌ mpada intap ani, i dzi nugungꞌ tsiaꞌan gangꞌ sisungꞌa ribani wangunggan ntingan angu. 14 Dzi ragi U nan gam wasi da ribani sib, da garam intap ani irim ipiap i ribarangan, i ribarangan wasu intap ani gan ibi dzi wasu intap ani gan u. 15 Dzi wagut i Agu i U uda ribani sinungꞌ intap ani u, da bitsintaꞌ U mpada tayangꞌ ribarangan bini i Garam Maisan anungꞌ wayada ribarangan u. 16 Ribani anungꞌ isu intap ani gan u, ibi dzi anungꞌ isu intap ani gan u. 17 Agu nan gam igi nan nidzun bingan. Da wanang ribani nasu U nanggam mararam i U nan nidzun gam. 18 Ibi aru U tanginda dzi bada intap ani ugu, da dzi tangin ribani ifa intap da intap. 19 Da dzi rim runggangꞌ santan da Agu i ribarangan bida nigi suda U garamam mararam rururungan i nan nidzun.

20 “Dzi anungꞌ yugin i ribarangan angu u, dzi yugin i rib ringanta i dzi nan gangꞌ mingꞌa ribani nifunggan fisa gin da muarutsa dzi, 21 i ribarangan sib angu suda bitsintaꞌ, bida Ramangꞌ U mpa dzi wasaꞌ da dzi mpa Agu wasaꞌ. Da ribarangan nampa Agu da dzi wasaꞌ, i garam intap tsangandan da muarutsa bida U tangin dzi iba. 22 Dzi rim bingan tsiraꞌ aru U riman da dzi ugu sib da ribarangan i suda bitsintaꞌ bida Agu da dzi suda nam wain bitsintaꞌ ugu. 23 Dzi mpa ribarangan wasaꞌ da U mpa dzi wasaꞌ, i ribarangan suda bitsintaꞌ nidzun angu. I sanab bida nigi da garam intap santan nasruꞌ gin nabi U tangin dzi iba da U maram yari i rib muarutsa dzi isangꞌ ibi U maram arida i dzi.

24 “Ramangꞌ, dzi ni rib U riman da dzi ugu i ruta dzi mpada gamp dzi mpada gin aga da tsanganda dzi nampanggangꞌ da binganggangꞌ tsiraꞌ aru U riman da dzi mungꞌ ugu. U rim da dzi, i wain, U maram yari i dzi da gubuꞌ intap mamida i waꞌan. 25 Ramangꞌ rururungan wain, garam intap wasruꞌ i Agu u, da bitsintaꞌ dzi sruꞌ i Agu. Da dzi ribangꞌ tuas arani isruꞌ gin ibi U tangin dzi iba. 26 Dzi ni Agu wasi da ribarangan, da dzi rubungꞌ asantingꞌ Agu wasi nabinigi, i U nanggam maran aridan aru U maram arida i dzi igi namingꞌ ribarangan wangunggan da dzi nampa ribarangan wasaꞌ gan.”

<- Yowanis 16Yowanis 18 ->