1 Raingꞌ ruas, anungꞌ isangꞌ agam ampi bingan suda garam ragida Anutu nan gan, i aga garam ragida nan da Anutu bungꞌ araru agai nasangꞌ ampap riman da agai nayus rib faingꞌ aga. 2 I agi santan inang da irunt asub i sanampun ampi bingan. Bida manga mamida i runta asub i nan gan santan nidan, da arangan isu garam rururungan nidzun da isangꞌ i mpada tayangꞌ uwayantan da riniuriatsan santan bini.

3 Da maram wafur kausiꞌ, bida agi rima ain isiꞌ manga atangꞌa kausiꞌ nifun da untapa gin, da kausiꞌ tsiraꞌ igi bungꞌ asu ringa mafrip da bungꞌ ayung atsungꞌ agi nanggangꞌ marangꞌ furan. I sanab bida nigi da agi sangꞌ i parima i kausiꞌ igi da nidzunggan santan. 4 Wau uwayant wayab i madzung. Madzung igi tsiraꞌ bingan da stiaꞌ gan igi isiꞌ aru mangan. Da bitsintaꞌ, gubuꞌ fifingꞌ yutan da garam mpada tayangꞌ stiaꞌ igi parima gin, da madzung igi irunt yatsungꞌ arangan nanggan maran furan. 5 Man ibinigi, nam isiꞌ aru mangan imingꞌ wasaꞌ i agi nidzunggangꞌ, da itsarif runggan iyus nam sib angu.

Watsangan wayab i dzaf gai fugus isiꞌ aru mangan isangꞌ i gada wap tsiraꞌ manga sib. 6 Da man ibinigi, isangꞌ dzaf, isu wain i nam maisan santan mingꞌa wasaꞌ i garam gar nidzunggan. Da inang garam nidzunggan santan ibubumpua da garam gar nanggan mpadan imais ibi dzaf gada puatsi tsiraꞌ mangan. Da dzaf igi wainggan iba imingꞌ dzaf gada ratar.

7 Apu buman santan bida apu dzufan da yungan da sruakan da apu mara maran mpada uruts santan, garam isangꞌ i tipan da suda marapakra 8 da bitsintaꞌ garam mangan wasangꞌ i mpada tayangꞌ i man gan bini u, i man igi anungꞌ impa asap i nan maisan nidan u, imaꞌ, imingꞌ angu binigi. Man igi nan gan nidan da ifungꞌ i nam maisan isa garam funub isangꞌ ibi muntsir nifu saꞌ gan.

9 I man angu da agi tsarif Ramanggangꞌ Nifutsarif Anutu, da agi man gangꞌ angu da agi pupuarap da garam gar Anutu tipa suda i maraganunggan ugu impruꞌ ibinigi. 10 Nam tsarifan da pupuarapan iwaꞌ imingꞌ nifu bampun bitsintaꞌ angu. Da raingꞌ ruas, agi anungꞌ nanga bida nigi u! 11 Isangꞌ i mpui bini da mpui ngkiangan mpruꞌa ruan waꞌa mpui maran bitsintaꞌ? 12 Raingꞌ ruas, isangꞌ gai nuwai kapa nidzun guniꞌ, ma nagauꞌ isangꞌ kapa nidzun nuwai? *isangꞌ gai nuwai kapa nidzun guniꞌ, ma nagauꞌ isangꞌ kapa nidzun nuwai?— Nan Grik ini ibiani, “...isangꞌ gai fik kapa nidzun oliv, ma bruꞌ wain isangꞌ kapa nidzun fik?” Gai fik da oliv da bruꞌ wain iyus imingꞌ gamp Israil; ibinigi da Dzems yakar nan raman ani iyab i gai aru nigi da nidzunggan. Mingꞌa agi gin da gai bida ani anungꞌ imingꞌ u; ibinigi da aga iyu nuwai da guniꞌ da nagauꞌ isu nan raman, da bitsintaꞌ nan raman wainggan bitsintaꞌ angu. Imaꞌ! Ibinigi angu da mpui bini anungꞌ isangꞌ i waꞌa mingꞌa mpui uruts u.

13 Bida agamam bits suda garam mararuru da uwayant tsiraꞌ, da nasantingꞌ nam mararuru wasi nayab i nam bida ani, nanggan yungan nawaꞌ bini nampruꞌ da nam rasuda runggan. I nam bida nigi iba imingꞌ nam mararuru gin. 14 Da bida agam nugum ruaꞌa i ruam da suda mara aba mingꞌa gam wangunggam, da agam anungꞌ tsarifa runggam i uwayantam mararuru da rasuda nan nidzun u. 15 Mararuru bida nigi anungꞌ imingꞌ gunungun iruꞌ ba u, ima! Iba imingꞌ intap da garam gar da marapayam maisan gin. 16 Gubuꞌ ampan nugun ruaꞌa i ruan da suda mara aba, da isu wangun da ruan da igagara iyus da yatsungꞌ sanampun maisan mara maran ampi bingan. 17 Da bitsintaꞌ garam uda mararuru mingꞌa Anutu gin igi da ibiani, nan miamun wangun isap, da iyafa nan, imantsing nan, isu ringa mafrip, da maran intuꞌ da ikap nidzun bini, da maran yari i garam gar santan angu da man anungꞌ isu iruꞌrun u. 18 Garam rasuda nan igi nan gan yafadan ikap nidzunggan sanab rururungan.

<- Dzems 2Dzems 4 ->