Miamun 9

Anutu Yudzu Sanab Faꞌ Impruꞌ da Noa

1 Anutu ifinti Noa da narun rusan i nan ani da ini ibiani, “Warim narum rusam nayus, i gan yanginggan utusa i ruan da mpada sangꞌa intap santan. 2 Apu marantaꞌan mara maran sib angu mpada intap, tsiraꞌ da isiꞌ, dzufan da yungan da sruaka intap da mpada uruts wasaꞌ bungꞌ arat natsuarupin i agam da agam bungꞌ asu wain i ribarangan. 3 Apu santan igi da dzi tangin da agam i agam gadan ibi bus yafan da nam gadan dzi riman da agam tafam rusam ugu. 4 Nam bitsintaꞌ dzi paꞌa agamin ibiani: anungꞌ gada apu biꞌ rungꞌ mingꞌa gin, i wain biꞌ igi irim nam marantaꞌan. 5 Da bida garam mangan ma apu mangan yatsa garam manga biꞌgan rai, da dzi bungꞌ arim nam mungaꞌ da arangan nasangꞌ i gan asuban nangan.

6 “Bida manga yatsa garam manga biꞌ gan rai,

da namamp i gan mungaꞌ gan namingꞌ garam gar banginggan,

i arangan iyats garam Anutu tipa sangꞌa maraganunggan ugu biꞌ gan rai.

7 “Mingꞌa agam da agam warim narum rusam nayus, i agam narum rusam yangin rusan utusa i ruan da mpada sisungꞌa sangꞌa intap santan.”

8 Da Anutu ini da Noa da narun rusan ibiani, 9 “Waringantin! Aruani da dzi runggangꞌ dzi ni udzuda nan gangꞌ utusa i ruan gin da agam da yanginggam taptap 10 mpruꞌan da apu mara maran, dzufan da mpada intap, pagraꞌ da buman, ruta agam mpruꞌa ruam waꞌa madzung ba igi, nampruꞌ da apu santan narun rusan taptap nautus i ruan namingꞌ intap nabinigi. 11 Dzi tangin nan gangꞌ udzudan da agam ibiani: Dzi wasangꞌ i tipa tanginda mpui tsiraꞌ mangan i wayada intap mpruꞌan da nam marantaꞌan santan u, imaꞌ.” 12-13 Da Anutu ini, “Dzi tangin umpum impar i ruan imingꞌ maraum isu bir i nan utusa i ruan gin, dzi nanga mingꞌa wasaꞌ i dzi da agam da gam yanginggam taptap, mpruꞌa da apu sib angu mingꞌa intap, da bungꞌ amingꞌ ratar nanting angu. 14 Gubuꞌ dzi tanginda maraum buafira intap da umpum bungꞌ ampar i ruan namingꞌ wasaꞌ, 15 da dzi marangꞌ bungꞌ afur dzi nan gangꞌ udzudan mpruꞌan da agam da apu marantaꞌan, i wasangꞌ i mpui tsiraꞌ tipa waꞌan da wayada nam marantaꞌan santan u. 16 Da bida gubuꞌ dzi tsanganda umpum waꞌa maraum da dzi marangꞌ bungꞌ afur dzi nan gangꞌ udzudan mingꞌa ratar tingan aru mingꞌa wasaꞌ i dzi da nam marantaꞌan mara maran sib angu mpada intap.” 17 Ibinigi da Anutu ini da Noa ibiani, “Watsangan! Nigi Dzi birangꞌ nan utusa i ruan dzi tanginda muntida wasaꞌ i dzi Anutu da nam marantaꞌan sib angu mingꞌa intap.”

Noa Narun Rusan

18 Noa narun rusan ruta mpruꞌa ruan waꞌa madzung ba ibiani, Sem, Ham da Yafet. (Da Ham isu Kanan ramanggan.) 19 Da garam mpada sangꞌa intap sib angu wainggan iruꞌ Noa narun rusan iruꞌ da bits igi gin.

20 Da Noa garam rafa gum da isu garam miamun i ntanga gum wain. 21 Gubuꞌ mangan da arangan inum wain gurun arangan runggan ntangan da tipan da maran ididirunt da igingꞌ ragi dangunt imingꞌ ungaran wasaꞌ. 22 Ham, Kanan ramanggan, yatangꞌ ba da itsanga ramanggan gingꞌa ragi dangunt da itip iwaꞌ ifan da ini da rain rusan iruꞌ igi. 23 Sem da Yafet iyu bruꞌ da igif i barun da ifa barun barun gin da ibuafir ramanggan sib. Tuasarangan irarab nam intiꞌ i anungꞌ tsanganda ramanggan ragi dangunt igi u. 24 Gubuꞌ Noa maran dzidziwandan da iringant i nan narun bampa sib, Ham, nanggan tsanganda arangan gingꞌa utaꞌ da fisagin. 25 Ibinigi da Noa ipupuarap da Ham narunggan ibiani,

“Barabin tsiraꞌ nais mara wafir i Kanan nanting.

Da bungꞌ asu rain rusan mamaꞌ guman utaꞌ angu.”

26 Da itip ini,

“Dzi natsarif Yawe, Sem Anutu gan.

Kanan nasu Sem mamaꞌ guman utaꞌ angu.

27 Anutu nautus i Yafet yanginggan nawaꞌ nasisungꞌ

da gan yanginggan narut Sem yanginggan nampruꞌ ruan nampa bini,

da Kanan nasu Yafet mamaꞌ guman utaꞌ angu.”

28 Gubuꞌ mpui tsiraꞌ ntsupan da Noa itip impa isangꞌ udzuf 350, 29 da mpruꞌa Noa udzufan mpadan da isangꞌ 950 da arangan imamp.

<- Miamun 8 Miamun 10 ->