1 Nam rangan iyab Yosef sib imingꞌ garam guman maran, da iwat ribarangan ini binaꞌ, “Agam santan wawaꞌ sinungꞌ dzi maranggangꞌ.” Ibinigi da mangan warut Yosef impai da gubuꞌ arangan santingꞌa runggan wasi da rain rusan. 2 Da arangan irang nifun tsiraꞌ bingan da garam Idzip iringantin, da king da riban santan mpada king ungaran iringant i nan igi. 3 Da Yosef ini da rain rusan ibiani, “Dzi Yosef! Dzi ramanggangꞌ rungꞌ impai ma imaꞌ?” Da bitsintaꞌ rain ruas wangun isantan ruan sib, da irat i arangan da wasangꞌ i nida nan mangan u. 4 Da Yosef ini da rain rusan ini binaꞌ, “Agam waba uts angu da dzi.” Ribarangan iba uts da rainggan Yosef da arangan ini ibiani, “Dzi Yosef, agam rainggam aru agam uda nam ntsuman gin da tangindan da garam nam bunump uda bada Idzip ugu ani! 5 Da aruani da agam wangum anungꞌ barabindan da tsakiada i runggam tuaꞌ i tanginda dzi bada ani u, imaꞌ. Anutu itangin dzi imungꞌ iba ani i agam i rima santan angu sib. 6 Gubuꞌ fus nam gadan maꞌan imunti isangꞌ udzuf iruꞌ angu da aruani, da udzuf 5 rumingꞌ da garam mangan wasangꞌ i suda gum da waꞌa da nidzun u. 7 Anutu itangin dzi imungꞌ iba i agam i rima agam sib i rungꞌ utusa i agam da yangin rusam nanggam mpadan. 8 Da agam anungꞌ itangin dzi iba ani u. Imaꞌ. Anutu angu. Da itangin dzi su king garaman santingꞌa sanab da mpada tayangꞌ king gampan da intap Idzip santan. 9 Aruani da agam wafa sung angu da ramangꞌ da wani rutin, ‘U narunggam Yosef ini ibiani: Anutu itangin dzi isu garam gudzun tsiraꞌ da dzi mpa tayangꞌ intap Idzip santan. Wauriꞌ da waba sung. 10 U bungꞌ aba mpa namingꞌ intap Gosen uts da dzi i nangan da dzi tsanganda agu ragun— agu da narum rusam da rumpum rusam da gam dumpa gam, nuning gam, makau gam da nanggam santan u suda wain gin. 11 Waba mpa nigi i dzi rima agu sib. Gubuꞌ tsiraꞌ nam gadan maꞌa sib ani rubungꞌ amunti nasangꞌ udzuf 5, da dzi bugin i agu da gam utupam da apu gam santan sauda nam gadan.’ ”

12 Da Yosef ini, “Agam da dzi rainggangꞌ Benyamin watsangan da wasruꞌgin i dzi Yosef rururungan ani ini nan da agam. 13 Agam wani da dzi ramanggangꞌ i bingan tsiraꞌ dzi udan mingꞌa Idzip da nam santan agam tsangandan. Da agam wau ramangꞌ naruꞌ ba ani sung.”

14 Arangan impung rainggan Benyamin da irang funub angu, da Benyamin impung arangan da irang impruꞌ ibinigi. 15 Rungꞌ irang da itsutsuf rain ruas igi santan ibafan. Intsup sib da rain ruas imus ruta fisa i nan da ruan.

16 Gubuꞌ sisingꞌ waꞌa da king mingꞌa gan ungaran tsiraꞌ i Yosef rain rusan bawaꞌan, da king da gan garam gudzun gudzun gan nugun itsiaꞌ gin. 17 Arangan ini da Yosef ini binaꞌ, “Wani da raim rusam i tipa dongki gan da tipa fada intap Kanan. 18 Wani da ribarangan i uda ramanggam da gan utupan da tipa bada ani. Dzi bungꞌ arim intap ngarubini bingan mangan yusa intap santan mingꞌa Idzip i ribarangan mpada gin da gada nam bini bini gin. 19 Wani da ribarangan nampruꞌ i uda karis fain mingꞌa Idzip ani nafan i uda narun rusan da finin rusan da ramanggam naba ani. 20 Maran anungꞌ fura nan ampi bingan i nam bunumpan tanginda rai mingꞌa intap Kanan igi u, wain ibiani, dzi bungꞌ arim nam bini bini ampi bingan mingꞌa intap Idzip ani da ribarangan.”

21 Ibinigi da Israil narun rusan inang ibi king nidan. Yosef irim karis fain da ribarangan yatsungꞌ king nifunggan nidan. Da irim nam gadan da ribarangan i gan sanaban tipa fadan. 22 Da irim ngarukui faꞌ faꞌ isangꞌ ribarangan santan. Da bitsintaꞌ Yosef irim ngarukui 5 impruꞌ da 300 silva, barabin gan isangꞌ 3.5 kilogram, da Benyamin. 23 Da arangan iyu nam bini bini ampi bingan mingꞌa Idzip da itangin iyab dongki arapuꞌ 10 ifan da ramanggan, da itangin nam gadan rima i ramanggan sib i sanab tipa badan iyab i dongki rinan 10. 24 Yosef itangin rain rusan ifan da ifai nan i ribarangan ibiani, “Agam anungꞌ suda ufuai da rungam mingꞌa sanab fadan u.”

25 Ibinigi da ribarangan itangin gamp Idzip rai da itip ifan da ifawaꞌ da ramanggan Yakop imingꞌ intap Kanan. 26 Waꞌa sib da ramanggan da ini rutin ibiani, “Ramangꞌ, Yosef wamamp u; rumpa marataꞌ! Arangan isu garam gudzun tsiraꞌ impa tayangꞌ intap Idzip santan.” Yakop iringantin da wangun isantan ruan sib, da wamuaruts nan igi u. 27 Da bitsintaꞌ gubuꞌ ribarangan fisa i nan santan Yosef nidan da tsanganda karis Yosef tanginda badan i uda arangan tipa fadan igi, da arangan itangin wangun iruꞌ. 28 Da Israil ini ibiani, “Nan nidzun bingan! Dzi narunggangꞌ Yosef rungꞌ impa marataꞌ. Dzi nafan da natsanga arangan sib raiyi, ida dzi namus mampan.”

<- Miamun 44Miamun 46 ->