1 Da gubuꞌ fus tsiraꞌ nam gada maringꞌa sib iwaꞌ intap Kanan ibi mungꞌ da waꞌan da Abraham ugu. Ibinigi da Isak intsungꞌ ifa gamp Gerar, garam Filistia king gan Abimelek gampan. 2 Yawe iwaꞌ da arangan da ini, “Agu anungꞌ ruꞌa gamp Idzip u. U bungꞌ ampai intap idzuwai Dzi bungꞌ ani da agu i mpada gin. 3 Wampa intap ani da Dzi bungꞌ arut agu da nafinti agu. I intap aruani santan Dzi bungꞌ arim da agu da u tafam rusam i sangꞌa nan Dzi tagada ruangꞌ gin da u ramanggam Abraham ugu. 4 Dzi bungꞌ autus u tafam rusam yanginggan nawaꞌ nasisungꞌ nasangꞌ ngantam narun da narim intap ani santan da ribarangan. Da mingꞌa u yangin rusam rururungan da Dzi bungꞌ afinti garam intap utup utup santan, 5 i Abraham yatangꞌ warangꞌ i Dzi da itip Dzi nan gangꞌ faidagin da nam santan Dzi santingꞌa arangan gin.”

6 Ibinigi da Isak impa imingꞌ gamp Gerar. 7 Gubuꞌ garam gamp igi guta i arangan i fininggan da arangan ini binaꞌ, “Dzi nafunggangꞌ igi.” I arangan irat da ini i wangunggan angu ibiani, “Bida dzi nida fininggangꞌ gin da garam gamp ani bungꞌ ais dzi funub i arangan, i Rebeka igi sagat mara rifirif bini.” 8 Isak impa nigi gubuꞌ ampi bingan sib raiyi, da gubuꞌ mangan Abimelek, garam Filistia king gan, imunti ungaran muantsi wagungꞌ da irarab Isak yafusa fininggan Rebeka. 9 Abimelek inuꞌ Isak iba munti i maran da ini rutin, “Aruani da dzi sruꞌgin sib. Sagat arigi u fininggam. Wain idzuwai da u ni nafunggam i arangan?”

Da Isak ini binaꞌ, “Dzi marangꞌ ifur ibi dzi bungꞌ arim runggangꞌ rai i arangan bida dzi nida fininggangꞌ gin.”

10 Da Abimelek ini, “Ibianungꞌ da u nang uwayant ibinigi da agai? Bida dzi garamangꞌ mangan dani ruta u fininggam gingꞌan, da Anutu madararu agai i u nan gam iyuꞌan igi.” 11 Abimelek ini nan babampafan da gan ampan gan ibiani, “Manga bida nanga asub yaba i garam ma sagat aruani da arangan bungꞌ amamp i mungaꞌ gan.”

12 Isak iraf gum da udzuf arigi imingꞌ intap igi da nam nidzun bitsintaꞌ bitsintaꞌ arangan ntangan da ikap nidzun 100 isangꞌ ruan santan, i Yawe ifinti arangan nidzun angu, 13 da arangan isu garam nam bunump tsiraꞌ da nam bunumpan rungꞌ yutus i ruan angu ibinigi. 14 Arangan isu wain i dumpa da makau da garam gum ampi bingan, da garam Filistia nugun iruaꞌ i arangan. 15 Ibinigi da ribigi idzufungꞌ mpui rafan santan arangan ramanggan Abraham garam guman rafan ugu. 16 Da Abimelek ini da Isak, “Aruani da aga tsanga u su garam nampangꞌ tsiraꞌ iyus agai, ibinigi da watangin aga gampangꞌ rai da wafan.” 17 Ibinigi da Isak itangin gamp igi rai da ifan da impa imingꞌ intap bump Gerar. 18 Isak itip ini da garam guman iraf mpui santan aru ramanggan Abraham garam guman rafa mungꞌ ugu. Abraham imamp sib raiyi da garam Filistia idzufungꞌ mpui santan sib. Gubuꞌ tipa rafan da Isak itip ifaringꞌ bingan aru ramanggan Abraham faringꞌa gin mungꞌ ugu. 19 Gan garam guman itip iraf mpui faꞌ mangan imingꞌ nigi da iwaꞌ da mpui maran budubuatagin. 20 Da bitsintaꞌ garam Gerar garaman mpada tayangꞌ makau gan irut Isak garaman mpada tayangꞌ makau gan isu ufuai da ruan da ini, “Aga mpui gangꞌ igi.” Ibinigi da Isak ifaringꞌ mpui rafan igi Esek (wainggan ibi ‘suda ufuai da ruan’), i ribigi irut Isak isu ufuai da ruan i mpui rafan igi. 21 Raiyi da itip iraf mpui mangan da ribigi itip irut isu ufuai i nigi impruꞌ, da Isak ifaringꞌ i binganggan Sitna (wainggan ibi ‘usuda gudzun i ruan’). 22 Isak itangin nigi rai da itip iraf mpui mangan. Da gubuꞌ arigi da garam mangan watip irut isu ufuai gin u, ibinigi da ifaringꞌ i binganggan Rihobot (wainggan ibi ‘intap utaꞌ mangan’) da ini, “Aruani da Yawe irim intap utaꞌ manga ani da agi i mpada bini da agi yangin rusangꞌ bungꞌ autus i ruan nawaꞌ nasisungꞌ namingꞌ gamp ani.” 23 Da Isak itangin nigi rai da iyab ifa mpa gamp Birsiba. 24 Da idziang arigi Yawe iwaꞌ da arangan da ini binaꞌ, “Dzi u ramanggam Abraham Anutu gan. Agu anungꞌ ratan u, i Dzi rut agu impai. Da Dzi bungꞌ afinti agu da nautus u tafam rusam nawaꞌ nasisungꞌ, i wain iruꞌ dzi yudzu nan sib da garam gumangꞌ Abraham.” 25 Isak yantungꞌ tauf tsarada nam in i nigi da itsarif Yawe gin. Da arangan yari ungaran apu rini gangan da gan garam guman iraf mpui mangan impruꞌ imingꞌ igi.

26 Gubuꞌ mangan da King Abimelek irut gan garaman rima uwayant, Ahusat, da gan garaman singa-ati gudzunggan, Fikol, imingꞌ gan gampan Gerar iba i tsanganda Isak. 27 Bawaꞌan da Isak igut i ribarangan, “Wain idzuwai da agam iba i tsanganda dzi, garam aru agam bugindan da wata rai i gam gampam ugu?”

28 Da ribarangan itip ini arangan nifunggan mungaꞌ ibiani, “Aga tsangan dzidziwandan ibiani, Yawe irut agu, ibinigi da aga ni i agi tsafa ruangꞌ da udzuda nan muntida wasaꞌ i agu da agai, 29 i agu anungꞌ nanga maisan i agai u, nabi aga tipa agu bini angu isangꞌ u tanginda aga rai da bada ruta nan maꞌan. I aruani da aga tsangan i Yawe ifinti agu.”

30 Ibinigi da Isak isu nam gadan tsiraꞌ mangan i ribarangan da igan da inum. 31 Pisa tataꞌ maratait mangan da ribarangan impruꞌ ruan da yudzu nan da itaga ruan gin i mpada bini. Da Isak itangin ribarangan rai ruta nan nufan da ifan. 32 Gubuꞌ arigi rururungan da Isak garam guman ibawaꞌ da arangan da ini rutin ibiani, “Aga raf mpui mangan da aga waꞌ da mpui sib wa.” 33 Da Isak ifaringꞌ mpui rafan igi binganggan Siba. Ibinigi da mingꞌa nigi bawaꞌan da aruani da rungꞌ ifaringꞌ gamp igi binganggan Birsiba.

34 Isau udzufan isangꞌ 40 da iyu sagat iruꞌrun, Dzudit da Basemat. Dzudit ramanggan Beri, da Basemat ramanggan Elon, rib iruꞌ igi garam Hit. 35 Sagat iruꞌ igi inang Isak da fininggan Rebeka wangun ibarabin nidzun angu.

<- Miamun 25Miamun 27 ->