Link to home pageLanguagesLink to all Bible versions on this site
3
Nan Faidagin Fadan da Garam da Sagat Uda Ruan Sib
1 I sanab bida nigi da agam sagat gabun watangꞌ warangꞌ i gabum rusam.[a] Da bida ribaranga gan faingꞌ buginda i muarutsa Anutu nanggan, da tuasaranga natsangan uwayant bini finin rusan agam nangan da naparim i ruan ruta nan maꞌan mingꞌa agam in 2 da gubuꞌ ribarangan raraba bida agam sagat nangan da yunga rururungan da mpada warangꞌ i ribarangan. 3 Agam anungꞌ girada riniuriats manaꞌ angu u i uwayant fira gudzum yusa ampap girada ruan da atsufa rini gira gol da nam bini bini, imaꞌ. 4 Da bitsintaꞌ agam wagira ganunggam wasaꞌ i rini gira mamida i ntsupan i uwayant bida mantsingꞌa nan da mpada wangun nufan. Rini gira bida nigi iwaꞌ bini funub i Anutu maranggan. 5 I sanab bida nigi da sagat mararam ruas aru mpada mungꞌ da rima maran i nam bini bini Anutu nida nangan ugu inang da igira runggan i uwayant bida nigi da yatangꞌ warangꞌ i gabun rusan, 6 ibi Sara yatangꞌ warangꞌ i nan Abraham nidan da ifaringꞌ arangan “garam tsiraꞌ.” Bida agam nanga uwayant bini da mamida i rata nidzun i nam mangan, da agam iwaꞌ ibi Sara narun rusan.

7 Agam garam uda finim, agam wasruꞌ bini i finim rusam wangunggan da warut wampa bini, i sagat riniurunggan anungꞌ isangꞌ ibi garaman u. Da agam watsarif ribarangan da wanang uwayant bini, i wain, sagat ruas impruꞌ ibinigi bungꞌ arut agam nayu nam mpada maran taꞌan aru Ramangꞌ Anutu riman da gan narun rusan agi i gan maraampi gan. Watsungꞌ uwayant bida nigi i nam mangan anungꞌ muntida sib i agam nanggam udagin.

Uda Tsakia i Uwayant Bini Nangan
8 Nan ani bampanggan ibiani, agam santan wangunggam nasu bitsintaꞌ, da wagaib rib fain, da maram wari i runggam ntuaꞌ, da maram wantuꞌ i garam santan, da warasu runggam. 9 Bida garam faingꞌ nanga maisan i agam, da agam anungꞌ rima mungaꞌ u. Bida rib nida nan maisan i agam, da agam anungꞌ nida i nanggan maisan mungaꞌ u. Da bitsintaꞌ agam wayugin da Anutu i nanga bini i ribarangan, i wain, Anutu inuꞌ agam i nanga bida nigi, i agam uda nam bini bada mingꞌa Ramangꞌ Anutu gin. 10 I nan akaran ini,
“Bida garam mangan maran fura i nanggan mpadan waꞌa bini,
da nida tsanganda gubuꞌ bini,
da nanang nabiani, arangan anungꞌ nida nan maisan
da anungꞌ nida nan umpur u.
11 Arangan narim barun da uwayant maisan
da natsungꞌ uwayant bini angu.
Arangan nanang runggan nawaꞌ nabi garam rima wangun mpruꞌan da garam da sagat faingꞌ
da nanang gum babampafan i atsungꞌa uwayant bida nigi.
12 I wain, Nifutsarif inang da impa tayangꞌ garam da sagat rururungan,
da inang da irim ringan i ribarangan nanggan uda gin.
Da bitsintaꞌ Nifutsarif irim ipiap i rib nanga maisan.”[b]

13 Bida agam nanga gum babampafan i nanga uwayant bini, da manga bungꞌ anang maisan i agam? 14 Da bitsintaꞌ bida agam nanga uwayant bini, da agam uda tsakia gin, da agam nugum natsiaꞌ. Bida rib faingꞌ nanga nam i rima ratan da agam, da agam anungꞌ ratan i ribarangan u. Da agam anungꞌ runta fafun da wangum barabindan u. 15 Mingꞌa agam wangunggam da agam watsarif Kristus runtaꞌ nasu agam Nifutsarifam mararam. Da wampa mungꞌ da gubuꞌ santan i dziwara i nam bini aru agam mpada rima maram gin ani wainggan da rib santan aru guta agam gin igi. 16 Da bitsintaꞌ agam wani nan igi ruta nan yafadan da nan tsarifan. Da gubuꞌ sib angu da agam wampa rururungan i agam rinim anungꞌ miaꞌan i gam uwayantam u, da garam tuasaru nida nan maisan da nan barun i uwayant bini agam nangan i atsungꞌa Kristus gin igi rinin bungꞌ amiaꞌ i nan ribarangan nidan. 17 Bida Anutu nida agi uda tsakia i uwayant bini agi nangan, da nan imaꞌ. Da bida agi uda tsakia i uwayant maisan agi nangan, nigi su asub.

18 I wain, Kristus ibinigi iyu tsakia da imamp i uda agam badan da Anutu. Arangan garam rururungan, da bitsintaꞌ iyu garam mais mais mumai gan da imamp i siata i nanggan maisan rai. Arangan imamp gubuꞌ bitsintaꞌ angu, da anungꞌ isangꞌ i tipa mampan u. Rib yis Arangan riniuriatsan funub, da bitsintaꞌ Anutu inang Arangan marapayaman imunti marataꞌ da impa ratar. 19 Arangan impa ibi marapayam da ifa i fisa i nan da marapayam mpada karabus. 20 Marapayam tuasarigi anungꞌ isu ringa mafrip da Anutu da Noa gubuꞌ gan ugu. Da bitsintaꞌ Anutu anungꞌ irim nam mungaꞌ sung u, imaꞌ. Arangan impa isangꞌ Noa itip madzung gan sib. Da rib iruꞌ angu isangꞌ rib 8, tuasarangan yatangꞌ ifa madzung da mpui tsiraꞌ yufi ribarangan da Anutu irim ribarangan sib da impa bini. 21 Da mpui arigi da iram iyab i mpui ruruban, i wain Anutu irim agam sib da yu agam sinungꞌ nam maisan i mpui ruruban. Mpui ruruban anungꞌ yadzuꞌ rini bubumpua i riniubit u, imaꞌ. Mpui ruruban igi nam agam nanga i guta i Anutu i nanga agam wangunggam dzidziwandan.[c] Da Anutu irim agam sib i mpui ruruban igi iyab i sanab raꞌa i Yisu Kristus mingꞌa garam mampan gampan, 22 da Kristus itip ifa gunungun sib, da ifa mpa Anutu banginggan bini. Da angira ruas da marapayam riniurun da nam riniurun sib angu yatangꞌ warangꞌ i Arangan.

<- 1 Petrus 21 Petrus 4 ->