1 Yusru aints ainau wina papeetinau asaramtai,

wait anentrurta.

Kintajai metek wina nepetukartas wakerutinawai.

Tura asar napchau nintimtikrinawai.

2 Kintajai metek wina papeetinawai.

Untsuri aints miajuitjai tusar,

wina nepetukartas wakerutinawai.

3 Tura asaramtai shamaknasha tuke amin nintimtajme.

4 Yusrun nekasampita tau asan ni chichamen wararjai.

Yusrun nekasampita tau asan shamkartatsjai.

¿Aints ainausha winasha itiurtukarting?

5 Wina nemasur ainauka kintajai metek ni chichamejai wina pasé nintimtikrinawai.

Nuka tuke wina pasemamtikrurartas nintiminawai.

6 Tura anumkar tuke wekaaturinawai.

Tura wina mantuwartas nakarinawai.

7 ¿Ni pasé turamurin inaisartimpiash?

Yusru ame kajekmaurumjai nu tunau aints ainauka mengkaakarta.

8 Wi tupikiakmiaurusha ameka mash nekaamame.

Turasha wina neaikirka mash nekapmame.

¿Wina neaikir ami papirumin mash aarchamukai?

9 Wi yainkata tusan seamtai,

wina nemasur ainauka waketinawai.

Waketinau asaramtai Yuska wijai pujawai tusan nekajai.

10 Yusur wina Apur asamtai,

nekasampita tau asan ni chichamen wararjai.

11 Yusrun nekasampita tau asan shamkartatsjai.

¿Aints ainausha winasha itiurtukarting?

12-13 Yusru wikia jakatniunam pujaing,

tuke ami paaniurmin iwiaaku pujustinnum pujusmi tusam uwemtikrurmame.

Turasha ayaartinnumiasha angkan awajtusmame.

Tura asamtai wi amin turatatjai timiaja nunaka amin wararkun umiktinuitjai tajame.

<- Salmos 55Salmos 57 ->