16
David: Apuru ameketme wina mash surus tinmeka timiauri
1 Yusru wina ayamrutkatin asakmin,
waitkata tusan seajme.
2 Wikia amin chicharkun:
“Ametme wina Apur.
Ame timiá pengkeraitme.
Amijai metekka kichkisha atsawai”, timiajme.
3 Ame wina chichartakum:
“Wina aintsur ju nungkanam umirtukaru asar,
pengker awajtu weenawai”,
turutmiame.
4 Aints ainau Yuschau waininayat chikich yusen umirina nuka nukap wait wajakartin ainawai.
Ni yusrin:
Ameketme juuntam titasar tangkun mainamtaikia,
wikia nuningkia pengké pachinkashtatjai.
Tura ni yusri naarincha pengké inaikiashtatjai.✡Sal 115.4-8
5 Apuru ameketme wina mash surustinmeka.
Nekas pengker ainia nuka winaka nukap surusuitme.
Wina pujutruka aminuitai.
6 Yus wina pujutrun nekas pengker aa nunaka surusmiayi.
Wi pujustiniun Yus surusmia nuka nekas shiirmaitai.
7 Yus: Tu pujusta tusa wina jintintrau asamtai,
wikia Yusrun:
Ameketme pengkeram titatjai.
Tura asamtai kashisha Yus wina nintirun nintimtikrawai.
8 Wina Apurun tuke wijai pujaun wainuyajai.
Niisha wina untsurunini pujurtau asamtai,
wikia pengké mengkakashtatjai.
9 Tura wina nintirun pujurtau asamtai waraajai.
Tura pengker nintimsan chichaaknasha warawarat chichaajai.
Nunia nantaktinuapitja tau asan,
jakancha pengker nintimsan ayamsatnuapitja tajai.
10 Yusru wina wakantrusha jakatniunmaka ukurtuschatnuitme.
Tura ami inatiram nekas pengker asamtai,
ni namangkesha kaurti tusamka tsangkamrukchatnuitme.✡Hech 13.35
11 Tura jinta tuke iwiaaku pujustinnum jeatnuka inaktursatnuitme.