1 Paan nintimratniuka aints jean jeamin siete painin charuk nujai ni jeen jeamua nunisketai.

2 Tura nu aintska nuna mash umis, kuntinu namangken inara, tura umutirincha najana, misanam keemsatniuncha umisi. 3-4 Tura nuna mash umik, ni inatirin akupak: Yakta yakiinini mura wakaram,

natsa nintimchau ainau untsukrum: Wini winiram jea wayataram. 5 Wina yutair yuwamniuram, tura

umutir wi najanaja nu umurmintrum tusan untsuajrume. 6 Nintimchau pujut inaisaram, nekau aints wajastasrum pengker nintimsaram pujustaram, tawai titaram timiayi.

7 Aints wishikiartiniun nunia pase aintsun chicharkartas wakerinauka, aya ningki

katsekrukti turasha pajaki airkar pasenasha chichakarti tusar turinawai.

8 Aints pase chichamtiniun chicharkatasam wakerakmeka, wina kajertukti tusam nuka turame.

Antsu pengker nintintiniun chicharinamtaikia, niisha pengker awajsatnuitai.

9 Aints pengker nintiniun nuininamtaikia, nuka nuna nangkamas pengker nintimratnuitai.

10 Paan nintimin ataj takurkia, iinu Apuri Yus miatrusrik umirkatnuitji. Yus nekas tunaarinchau asamtai, timiá pengkeraitai tu nintimtakrikia, nekasar nekau aints artinuitji.

11 Aints paan nintimniuka untsuri musaach iwiaaku pujustinuitai.

12 Aints paan nintimin wajasamtaikia, ni paan nintimtairi niin yaingtinuitai.

Antsu wishiikiartin ningki wakerak wait wajaktinuitai.

13 Aints nintimchau ainauka nuwa aujmakratinua nunisarang, tura nuwa nintinchawa nunisarang, turasha nuwa nekachua nunisarang ainawai. 14 Nu nuwaka yakta yakiinini jea aarin keemtainam keemas, jiimiaj pujuwitai. 15 Tura aishmang tupin jintanam nangkaminaunka untsuk: 16 Natsa nintinchau ainautiram, juni winiram wayaataram tusa, nintimchau ainaun untsuawai. 17 Yumi kasamkamuka nekas timiá yuminuitai. Tura yutai uukmau yuatniuka timiá pengkeraitai tawai. 18 Tura ipiakratamun anturina nuka: Nu nuwaka

jakau matsamtainum jukartinuitai, tusarka pengké nekainatsui.

<- Proverbios 8Proverbios 10 ->