1 Uchiru, ameka wina chichamur umikta, tura nintimin ukusta. 2 Amin nuiniarmiajme nu umirkata. Aints ni jiin tenap wainina nunismek chichamur umirkumka, nekasam angkan nintimsam pujustinuitme.

3 Tura asam uwejnum wejtai kuri najanamu tuke wejkar wekajina nunismek nu chicham inaitsuk umirkata. Tura nintimin aarmawa nunismek nintimrata. 4 Tura paan nintimratnuka umaimia nunismek pengker nintimtusta. Tura nekatai aina nuka ami irutkamurmea nunismek pengker awajsata.

5 Turakmeka kungkatip nuwa kiishmaktinuitme, tura aishrintin anangkramatas chichaamtaisha anturkashtinuitme.

6 Chikich kintiati wikia jearun pujusan, jiimiaj pujumjai. 7 Tura jimiaj pujai natsa ainau iruntrar wajainamunam natsa chikichkin pengké nintimchaun wainkamjai. 8-9 Nu natsaka jea tsukintrin

nangkaamak jintian amak, —kungkatip nuwa jeenini kintiamramtai wemayi.

10 Turamtai nu kungkatip nuwaka shiiram iwiarmamas natsajai ingkiuniktas jiintukmiayi.

11 Nu nuwa ainauka natsaamtsuk chichainawai. Tura ni jeenka pujutan nakitinawai.

12 Antsu jea tsukintrin wajasar, tura jintanmasha wekaasar, aints nangkaminaunka jiisar, tsanirmataj tusar nakamkini wajainawai. 13 Kame, nu nuwaka natsan tapit achik minakas mejeas, yapin jiiras chicharak:

14 Wikia Yusrun pengker awajsatasan tangku namangken susan yamai umikjai. Tura nu namangsha jeanam

ukusmawaitai. 15 Tura asan amin eaktasan jeanmaya jiinkin, aneachmau wainkajme. 16-17 Tura

tarach kapantin Ejiptonmaya itamun nunajai peakrun ainkan, kungkuti nekas kungkurmajai

yakaran ukukjai. 18 Tura asamtai winita. Iinu namangke wakeramu sunaisami. Tura minaknaisar

tepesar tsawaramtai ukunikmi. 19 Aishruka jeanmaka pujatsu ai arák iramayi. 20 Kuikian nukap juki weak: Nantu pamaun yuwamtai tatajai, turutmiayi.

21 Tura timiá yuminun chichaa chichaaka natsa nintin ikiajtukmayi. 22-23 Turamtai waaka uchiri: Yamai jakatjai tuuka nintimtsuk namang surutinam umainak, tura japa entsanam weamtai, maataj tusar nakainak, tura chingki ejatkan waintsuk wayaawa nunisang nu natsaka nuwan nemaras jeanam wayami.

24 Tura asamtai uchitiram anturtuktaram. Turaram wi tajarme nuka kajinmatkirap. 25 Nu nuwan

nintimtustaj, tuuka nintimrairap. Tura ni wekamunmasha wekasairap. 26 Nu nuwa ainauka

untsuri aintsun anangkawar tunaun takamtikinawai. Tura nu tunaujai jakaru ainauka untsurintai.

27 Nu nuwa ainau pujuinamunam wearuka jakar mengkakatniunam jeainawai.

<- Proverbios 6Proverbios 8 ->