1 Uchiru, wikia paan nintimratniunka nuiniajme nuka tenapkesam nintimram antukta.

2 Wi tajame nu turutai pengkeraitai, antsu chikich turutai paseetai tusam nintimin ukusta.

Tura nu mash nekau asam, chichaakmeka nekas pengker chichastinuitme.

3 Kungkatip nuwa aishmangkun nekas yuminchin chicharui, tura: Wi turaja nuka nekas pengkeraitai tusa anangkeawai. 4 Antsu inangnamunam ni turamuri saapi ere etsakamua tumawaitai, tura yapauwa tumau nekapratnuitai.

5 Nu nuwaka mengkakatniunam jeakui, tura niin nemarina nusha tuke jakatniunam wenawai.

6 Nu nuwaka tuke iwiaaku pujustin jintanmaka pengke wekatsui. Mai nintim weau asa, pujutruka

jinta tuninua nunisketai tusangka nintimtsui.

7 Tura asamtai uchitiram, anturtuktaram. Turaram wi tajarme nuka kajinmatkirap. 8 Kungkatip nuwa pujamunmaka pengké jirasairap. Turaram ni jeenka wayawairap. 9 Atumi kakarmari chikichan susairam tusan, tura atumi iwiaakmari mengkakchati tusan juna tajarme. Atum mengkakatatrume tusar nu nuwa ainauka pengké pachinatsui. 10 Nuna jeen wayaakrumka, atum takakmakrum waitnasrum atumi kuikiari irumrarume nuka nangkamrum ajapatatrume. Turakrumka chikich kuikiartin wajasti tusaram atumi kuikiari susatatrume. 11 Turakrum ukunam atumi namangke yaitas amuki amuki weamtai, ¿warukanak timiá nintimtsuk aitkamiaja? tusaram eaartinuitrume. 12 Nunia juutkuram: “Warukanak chicharmaitiatnasha, nintimtsuk pengké antukchaya? 13 ¿Warukanak nuikiartin ainau chichamen antutan pengké nakitnuyaja?

14 “Yamaikia mash aints iruntramunmasha wi pase turamurun nekaawaru asaramtai, wikia natsaamakun jakatasan wakerajai titatrume”.

15 Tura asamtai chikicha maatirinkia wetsuk, atumi maatirin werum, nuni maaitiaram. 16 ¿Warí, atumi kakarmari yaktanmasha ajapatniukaitrum? 17 Atumi kakarmari atumnauk atinuitai, antsu chikichnau achatnuitai. 18 Atumi nuwarijai nekasrum pengker pujustaram. Tumakrum atumi nuwarijaingkia wararnaisataram. 19 Kame, atumi nuwaringkia tangkuchia nunisrumek minaksaramaneetaram.

Tura asakrumin atumi nuwari ni aneamurijaingkia tuke atumin waramtikramsarti.

20 Tura asamtai uchiru, ¿warukamtiya nuwa aminuchusha chikichnau wainiatum,

nujai minaknaisam tsanirmatatme? 21 Warí, ii Apuringkia aintsu pujuntrin mash wainuitai.

Turasha ni turamuringkia mash nekaawaintai. 22 Pase aintsu tunaari ainauka angkan pujuschamnaun chapikjai jingkiamua nunisarang metawartin ainawai. 23 Tumau asaramtai ni namangke wakeramurin najaninauka pengké nintinchau asar, jakatnunam wenawai, tura timiá tunaarintin asar,

wait wajaktinnum jeainawai.

<- Proverbios 4Proverbios 6 ->