1 Jakeh uchiri Agurka Ithielan, tura Ucalnasha ju chicham ainaun ujakmiayi. Nuka Masanmaya aintsuyayi.

2 Wikia nekasan chikich aints ainaun nangkamasnak timiá nekachuitjai. Aintsu nintimtairingkia winaruka atsawai. 3 Wikia paan nintimratniuncha nuimiatrachuitjai. Turasha Yuse nekatiringkia nekachuitjai. 4 ¿Ya nayaimpinam waka, ataksha taramiayi? ¿Ya ni uwejejai nasen metamnawaita? ¿Ya juun entsanka tarachjai pempeawa? ¿Nungka mash irunina nuna najankauka yáki? ¿Ni naarisha yaita? ¿Tura uchirisha yaachita? ¿Ameka nuka nekamek?

5 Yuse chichamengka nekasaintai. Tura asamtai aints ainau niin nintiminaunka Apu Yus ejaktinuitai.✡Sal 18.30 6 Yus ta nuke ati tusam chikich chicham patatkashtinuitme. Ame turakmeka Yus amin chichartamak: Waitaitme turamtinuitai. Turamatai waitrin wajastinuitme. ✡Ap 22.18

7 Yusru, aya jimiarchinak seajme. Wikia jaatsain wait aneasam nuka surusta.

8 Anangkartin wajasai tura wait chichaman etserin wajasai tusam nuka tsangkatrukta.

Turasha kuikiartinka tura kuikiartichusha wajasai tusam nusha tsangkatrukta. Tura asam

yurumak wi yuumaja nuke surusta. 9 Kame, yurumkar ampintramtaikia wikia: Maj, Yusnaka yuumatsjai timinuitjai. Tura yurumkan yuumaknaka chikichnaun kasarkatnuitjai. Tura nuna turaknaka chikich aints ainau amin naarmin pachisar natsanpiakun chichasarai tusan nunaka seajme. ✡Mat 6.11

10 Aintsu inatiri antuj wajamtai, takamtikniuri antamunam ni pachisam pase chichakaip. Nu turakminkia nuka amincha pachitmas pase chichastinuitai. Turamtai amek wiasmatramkatnuitme.

11 Aints aparin usukratniuka irunui. Turasha nukurin pengker awajchausha irunui.

12 Kame, aints ni pase turutirin inaisachariat, ningki nintimtumasar: Wikia nekasan pengke

aintsuitjai tumamin ainawai. 13 Tura chikich aints ainau jampesarang: Miajuitjai tumamsar

chikich aints ainaun suwirpiaku jiisar: Nuka mianchawaitai tinawai. 14 Chikich aints ainau naingkia

saapia nunisarang ainawai. Tura juun nai ainausha kuchii ere tsakamua nunisarang ainawai.

Tura asar ni nungkarin kuikiartichu ainaun tura yuuminak pujuinauncha amukartas wakerinawai.

15 Ichachi nawantri jimiaraitai. Nuka tuke: Surusta, surusta tinawai.

Tutuarchatin kampatam ainawai. Kame, nekas cuatroitai. Nuka tuke maaketai tinatsui.

16 Ju ainawai: Jakau iwiarsamuka, nunia nuwa kaamauka, nunia nungka entsa pajamrachuka, nunia ji kiapamuka, nu ainauka tuke maaketai tichamin ainawai.

17 Apartin niin yajutmarmaitiat nuna: Mianchawaitai tusa jiia nuna jiin kukui kuinkartin ainawai.

Tura chiwiangku uchiri kautkar ni namangken yuwar amukartinka nekas pengker atinuitai. Turasha nukuri

juuntach: Antukta tamaitiat pajaki aikratniunka nunisarang turuwaramtaikia nekas pengker atinuitai.

18 Ju cuatro ainaun antukan, nintir jearchawitai:

19 Kukui itiur yakí nanamua nuka, tura napi nawe atsayat, ¿itiur pampanam wekaawa? nunasha,

tura ¿juun entsanam kanu itiur nasejai wekaawa? nunasha,

tura ¿aishmang itiur nuwanam tsakaawa? nunasha nintir jearchawitai.

20 Nuwa aishrintin aishrin ajapu ukuki, chikich aintsjai kanauka yutancha yuwa, jangken japirua nunisang natsamtsuk:

Wikia tunaanaka turachmajai tawai.

21 Ju cuatro iruna nuka tsantrachminuitai. Mash nungkanmaya ainau nuna pachisar: Nuka turachminuitai tinawai. 22 Ju ainawai: Aintsu inatiri apu wajasua nuka, turasha aints nintimchautiat ushuitai.

23 Turasha nuwa aints mash tsuutina nuka aintsun ninurtuk pujauka,

turasha nuwa inatiri ni inaun kintruk inawa nu ainawai.

24 Nunia ju nungkanam cuatro timiá tuupich aina nuka aints nintip aina nuna nangkamasarang nintip ainawai. 25 Ju ainawai:

Week ainauka kakaichu ainayat ni yuwatniurin esati juukar ukuinawai.

26 Kushi ainausha untsurinchu asar, waanam anumkar kaninawai.

27 Manchi ainau apuri atsau waininayat pekaankar nanaminawai.

28 Shampiusha timiá yupichuwach asaramtai, uwejjai achikmin ainayat,

pachitsuk apu jeen wayaawartin ainawai.

29 Tura cuatro meemasar: Miajuitjai tumamsar wekainauka ju ainawai:

30 Juun yawaa kajeuka aintsnaka tura pachim ainauncha shamchawa nuka,

31 tura atashu aishmangkri jampe jampet wekainuitai.

Tura chivoka aintsun paperkuta ni kuwishijai shitaktinuitai.

Turasha aintsu apuri ni suntarin timiá untsuri ainaun inartinuitai.

32 Ameka nintimchau akumka, wikia miajuitjai tumamsam pujakum, aints ainau pase awajsatasam wakerakmeka nintimrata. 33 Waaka muntsuri macharati tusam, nukap shitakmeka muntsu machari jukitnuitme. Tura kakaram shiikmakmeka nujim numpartinuitai. Tura aints kajerkam jiyakmeka maaniktinuitme.

<- Proverbios 29Proverbios 31 ->