1 ¿Esat amaunum micha kaya tumau ayaartin pengkerkai? ¿Tura juuktin kintia jeamtai,

yumi jiturti timinkai? ¿Turasha aints netsen wainkar tikishmatrar: Ameka juuntaitme timinkai?

2 Chingki tura chinim nangkami juni we tura atu we: ¿Tuning wetaj? tusa nintimtsui.

Tura aints chikich aintsun tichamin ayat: Usukiajme ta nuka nangkami tawai.

3 Kawai umirtukti tusar chapikjai awatrartin ainawai. Tura burro tupikiaki tusar jingkiawartin ainawai.

Tura aints netsenka antukat tusar numijai katsumkartin ainawai.

4 Aints nintimchawa nuka amin nintinchau chichartamak pujamtaikia, ni chichaawa nunismeka aimkaip.

5 Aints nintimchawa nuka chichartamak: pujamtaikia, amesha nunismek aimkakminkia, nuka: Wisha nintipitjai tu nintimias pujusminuitai.

6 Aints nintimchaun: Ame tawai tusam tita tusa chichaman akupua nuka aints ni nawen

awatmamak pujawa nunisketai. Turasha aints umutai jatan umawa nunisketai.

7 Aints nintimchau nuikiar tutai chichaman etsera nuka

aints makuin kupinak ashua ashua wekaawa tumawaitai.

8 Aints ainau netse aintsun wainkar: Ame nintipitme tinu ainauka kaya merman jukiar,

chingki maatainam engkear nangkimina nunisarang ainawai.

9 Aints nintinchau nuikiar tutai chichaman etsera nuka aints nampek jangkin pachitsuk achiawa tumawaitai.

10 Aints netsen chicharak: Wijai takakmasta tauka aints tishimkun achik aints nangkaminaun pachitsuk ekettuk tukuawa nunisketai.

11 Aints nintinchau tuke nintimtsuk chichak pujawa nuka yawaa inukiat ataksha wakeki ni iniukmaurinak

yuwawa nunisketai. ✡2 Pe 2.22

12 Aints ningki nintimtumas: Nintipitjai tumamua nuka pengké yapajiachminuitai.

Antsu aints nintinchaun Yus wakerakka yapajiamnawaitai.

13 Aints nakia nuka takatan nakitau asa, juun yawaa nekas kajeu jintanam wekaawai, tu pujuwaitai. ✡Prov 22.13

14 Waiti epentairi uraimua nuka mai yantá mai yantá muchiawa nujai metek

naki aints ni peakrin tepes mai yantá mai yantá tepes kánawai.

15 Aints nakia nuka tachaun achiayat, yutairin yuatniunka takataitai tawai.

16 Aints nakia nuka ningki nintimtumas: Wikia siete nekau aints aina nuna nangkamasnak nintipitjai tumamui.

17 Aints jimiar jiyanikiar wajainamtai, chikich aints untsuachmaitiat nuni pachinkauka

yawaa kuwishnum achikiar takutnua nunisketai.

18-19 Aints ni irutkamurin anangkayat: Wikia aya nakurusan nangkami timiajai ta nuka, waurin nangkin ekettuk aintsnum nangkimua nunisketai. Turasha aints nangkin jinum kiaparti tusa jeanam nangkimua nunisketai.

20 Ji keemaktin atsamtaikia, ji kajintratnuitai. Turasha aujmakratin atsamtaikia, kajernaiyamuka atsutnuitai.

21 Ji kairi amataikia, ji wári kiapartinuitai. Tura keemaktinka atsamtaikia, jikia kapaichminuitai.

Turasha aints maaniktas wakerin pujamtaikia, aints ainau wári kajernaikiartin ainawai.

22 Aujmakratniu chichamengka yuta yuuminua nunisketai.

Turasha nu chichaman nintinam ukusartin ainawai.

23 Aints chikich ainaun pase awajsatas wakerayat antujamniun chichauka

muits jakukutiat shiiram ati tusa patatkeng ipiakjai yakarmawa nunisketai.

24-25 Aints chikich ainaun kajerak pujauka nekaaracharti tusa pengker chichaayat, pase nintimias pujawai. Tura: Wikia aneajme tau wainiatum, nekasashi tiip. 26 Nu aintska ni kajekmaurinka uuktas wakerau wainiat, aints ainau mash paan nekaawartin ainawai.

27 Aints chikich aintsun pase awajsatas wakerakka, nu aintska waa taimunam ayaarti tusa, waan taimia nuni ningki ayaartinuitai. Tura aints chikich aintsun mesratas pampa wakenam kankekati tusa wakerakka, ningki nekemaktinuitai.

28 Aints tsanumniuka chikich aints ainaun pase awajsatas wakerau asa, nekas chichaman nakitawai.

Tura aints nangkami anangkak: Aneajme ta nuka aints ainaun pachimian nintimtikratnuitai.

<- Proverbios 25Proverbios 27 ->