1 Chicham kakaram atsamtaikia, kajeamuka mengkakatnuitai. Antsu pajaki aimkamu amataikia,

pajaki aimkamuka nuka nuna nangkamasang kajektinka nukap jurumaji.

2 Aints paan nintimias puja nuka nekau aintsu chichameng chichaawai.

Tura aints nintinchawa nuka nintinchau chichaawai.

3 Apu Yus mash nungkanmaya pase aints ainaun tura pengker aints ainauncha jiij pujurui.

4 Aints pengker chichaawa nuka numi sameka nunisketai. Tura tsuakan nunisang asa, jau ainaun

pengker awajsatnuitai. Antsu anangkartinua chichamengka aintsu wakanin mesratnuitai.

5 Uchi netse apari chichamen antutan nakitawai. Antsu chikich uchi

ni apari chichamen pengker antuk umirua nuka nekas nintipitai.

6 Aints anangkartichu jeenka warinchuka untsuri irunui. Antsu pase aintska ni kuikiarin nangkami ajapui.

7 Aints paan nintimuka ni pengker nekamurin chikich aints ainaun nekamtikiatnuitai. Antsu aints nintimchau pengker nekamuri atsau asamtai, chikich aints ainaun nekamtikiatatkama tujintawai.

8 Apu Yus pase aints ainau ni tangkurin maawar surusarti tusangka wakeratsui.

Antsu niin umirkaru ainau seamurin antuktas wakerawai.

9 Apu Yus pase aints ainau turutirin jiitnasha nakitawai, antsu tunaarinchau pujusartas wakerinaun aneawai.

10 Aints Yuse jintin wekaayat, nunia ukuawa nunaka Yus antukat tusa, wait wajaktiniun susatnuitai.

Kame, aints Yuse chicharkartamurin nakita nuka tuke jakatniunam wetinuitai.

11 Jakau ainau iwiarsamurin tura ni wakani matsamtairisha Apu Yus paan wainui.

Tura asamtai ¿aintsu nintimtairincha itiur nekarashti?

12 Aints katsekmin: Wina chichartukarti tusanka nakitajai tawai.

Tura asa paan nintintin ainaujaingka tsanitian nakitawai.

13 Aints nintijai waraak pujamtaikia, chikich aints ainau yapiin jiisar: Nuka kuntu nintimias pujawai,

tusar nekaawartin ainawai. Tura wake mesekar pujuinauncha nunisarang nekaawartinuitai.

14 Aints paan nintimias pujauka nukap nekaatas wakerawai.

Antsu nintimchau ainauka tuke nintinchau chichaman antuktasar wakerinawai.

15 Aints kintajai metek wake mesek pujawa nuka tuke itiurkachmin nintimui.

Antsu aints tuke waraak puja nuka nampernum pujawa nunisang nekapeawai.

16 Aints kuikiartichu kuikian nukap takakchau ayat, Apu Yusen umirkauka pengker nintimias pujustinuitai. Antsu aints kuikiartin ayat, tuke itiurkachminnum pujus, pengker nintimias pujustatkama pengké tujintawai.

17 Aints ainau yurumkanak yuwinak, kajernaitsuk aneenisar pujuinauka nekasar pengker pujuinawai.

Antsu chikich aints ainau tuke namangken apatsuk yuwinayat, surimshim yuwinak kajernaikiar pujuinauka pengkerka pujuinatsui.

18 Aints wári kajeuka maanitan wakerawai. Antsu aints wári kajechuka: Maanikairap tawai.

19 Aints nakia nuna jintingkia jangki irumramua nunisang nekapeak takatan nakitnuitai.

Antsu nakichuka paka tura wangkaram jinta nunisang takatrin nekapeawai.

20 Uchi nintimniuka ni aparin waramtikui. Tura uchi nintimchauka nukurin waramtiktsui.

21 Aints nintinchauka ni nintinchau turamurin nintimias wararsatnuitai. Tura

nintipkia ningki nintimias: ¿Itiur pujaja? tusa pase turamuri amataikia, nuna inaisatnuitai.

22 Jintinkartin atsamtaikia, aints ainau ni turatniurin umiktasar wakerina nunaka umikchartinuitai.

Antsu jintinkartin untsuri amataikia, aints ainau ni turatniurin umikiartin ainawai.

23 Aints ainau inintrinamtai, nekau aints nekas pengker aimkamurin antukar warasartinuitai.

Kame, aints aneachmau antujamnau chichaamtai, ¡nekas pengkerapita! timinuitai.

24 Aints paan nintimina nuka jinta tuke yakí iwiaaku pujustinnum wekainawai.

Tura asar jinta tuke jakatniunam jeatniun tuntupeawar ukuinawai.

25 Aints jampesarang: Miajuitjai tumamina nuna jeen Apu Yus mesratnuitai.

Antsu waje ajarin atankicharti tusa wainkatnuitai.

26 Pase aints ainau nintaimtairingka Apu Yus nakitnuitai.

Antsu aints ainau paseka nintimtsuk chichainamurin antuktas wakerawai.

27 Aints nukap warirtin wajastaj tu nintimias pujauka ni weari ainaun itit awajui. Antsu chikich aintsun kuikian suak: Ame nu aints pachisam wait chicham ujakta tamaitiat, nunaka nakitajai ta nuka Yusnum pujustinuitai.

28 Pengker nintintin ainauka inintramun aimkartas, nuna eemak nintimratjai tusar aimtsuk wajainawai. Antsu pase aints ainau nintimtsuk aya pase chichamnak chichainawai.

29 Apu Yus niin nintimtichu ainaun tuntupeawai. Antsu niin umirkaru ainau seamurin anturui.

30 Aints pengker nintimias jiimsatnuringkia aints ainaun waramtiksartin ainawai.

Turasha pengker chicham aina nuna antinaunka kiakar waramtiksartin ainawai.

31 Chicharkartin iwiaaku pujustiniun chichaman chichaamtai,

aints nuna anturak pachiawa nuka nekas nekau atinuitai.

32 Aints chikich aintsun nuiniartas chicharmaitiat, antutan nakitniuka ningki wiasmamkatnuitai.

Antsu aints chichamtai, antuk pengker umirua nuka nekas anturnuitai.

33 Nekau aints wajastasar wakerinauka Yusen pengker awajsatniunka nuiminawai.

Turasha: Wina pengker awajtursarti tinu ainauka eemkar: Wikia mianchawaitjai tiartinuitai.

<- Proverbios 14Proverbios 16 ->