Proverbios

1 Wikia Davida uchiri Salomónkaitjai. Israela apurinjai. Ju chicham ainaun aaran,

2 aints ainau nekas chicham aa nuna nintimrarti, tura pengker aa nuna nuimiararti, tura nuikiartutai chichamnasha nekaawarti, 3 tura pengker aa nuna nuimiarar, waurtsuk paan nintimrar, nekas pengker aa nuna turawarti, tura chikich ainauncha anangtsuk, pengker aa nuna awajsatniuncha nekamtikiatasan wakerajai. 4 Tura natsa nekachu ainau nintip arti tusan, tura paan nintimrar nekau arti tusan wakerajai.

5 Tura nekau ainau ju chichaman antukar, nuna nangkamasar nekawartinuitai. Tura nintip ainau

nuna nangkamasar nuimiarartinuitai. 6 Tura nuikiartutai chichaman, tura metektaku chichamnasha,

tura nekashtai chichamnasha nintijai nekatniusha mash nuimiararti tusan ju chichamnasha aajai.

7 Nekau ataj takurkia, iinu Apuri Yus miatrusrik umirkatnuitji. Antsu nintinchau ainau nekas aa nuna nintimratniuncha tura pengker aa nu nuimiatincha nakitinawai.

8 Uchiru, aparmi chicharkatamauri antukta. Turasha nukuru nuikiartamuringkia pachiatsjai tiip. 9 Pengker aa nu nuinakmeka, tawaaspajai shiiram etsengkrakua nunismek, turasha shaak shiiram nungkurtinua nunismek pengker nintimsam pujustinuitme. 10-12 Uchiru, pase aints ainau amin anangkraminak: Iin pachinkata. Iikia anumkar aints anearchau wekaamtai, nu maar waa taimunam ajuarar, nunia yukuarar ukuktatji, tinawai. 13 Turakur iikia kuik tura warinchu ainausha waring achat mash jurukir, ii jeen chumpiami. 14 Watska, iin pachinkata. Nunia iikia mash metek kuikiartin jaktatji, turaminamtaisha, 15 uchiru, nu pase turin aina nujaingkia tsaningkaip. Tura ni tina nuka antukaip.

16 Pase turin aina nuka mangkartuataj tusar, aya waurkamin ainawai.

17 Nintimrata. ¿Chingki achiktai tusar, chingki ainaun wainkar, jiimiaj eketinai ejatkajai achikminkai? Atsa.

18 Nu mangkartin ainauka aya ningki amuninawai. Tura ningki mengkakartin ainawai. 19 Aints ainau aya warinchun achiktai tusar wakerina nuka ni wakeramurin umitsuk aya jakatniunam weenawai.

20-21 Paan nintimratniuka nekas wakeruktinuitai. Yus yaktanam aints untsuri wekaatinam wajas, untsuawa nunisang aints ainaun chicharak: 22 Nintinchau ainautiram ¿warutik nintinchau wajatisha inaisatrum? Wishikiartin ainautirmesha, ¿warutik chikich aints ainau pachisrum wishiktsuk pujustaram? Tura netse ainautirmesha ¿warutik nekas chicham antut nakitaisha inaisatrum? 23 Wi taja nuka antuktaram. Turakrumka wina wakantrunka atumi nintin engkean piatkatnuitjai. Tura wi nintimaurun paan nekamtikiatnuitjarme. 24 Wikia atumin: Winitaram tusan untsuamaitiatrum, atumka umirtuktinka nakitrurmarme. 25 Wi tamaitiatrum, nuikiartamur antukchamarme, tura chicharkartamursha nakitramarme. 26-27 Tura asamtai wina chichamur nakitrau asakrumin, atumi wait wajaktintri jeamtaikia,

wait anentrashtinuitjarme, antsu sapijmiakrum pujakrumin wishikratinuitjarme. Kame, juun nase, katurang meskartin shamarmena tumau nukap wait wajaktin jeamtaikia, wait anentrashtatjarme.

28-29 Nuniangka aints ainau untsurkartatui, turutinaunak wikia aikchatatjai. Turasha waurinak winaka

eatkartatui, antsu paan nintimratniunka nakitinak, wina umirtutan nakitruraru asar, winaka pengkej waitkachartatui. 30 Turasha wi nuikiartamurun nakitrar, wi chicharkartamurun pachischaru asar,

31 ni turutairijaingkia aints ni yutairin nukap yuwinau asar, tangkar iniukmin nekapenawa nunisarang

ni pase nintimaurijai wait wajakartin ainawai. 32 Nintinchau ainauka ni turutairijai jakartin ainawai. Tura

netse ainauka nangkamiar: Iikia nekasar pengker pujaji, tinayat mengkakartin ainawai. 33 Antsu wina

chichamrun umiina nuka angkan pujusar, pasenasha shamtsuk matsamsartinuitai.

Proverbios 2 ->