Malaquías

Yuse chichame etserin Malaquías naartin Israel ainaun nu chichamnaka aarmiayi.

—Yus atumin chichartamak: Uchi ainau ni aparin pengker awajinawai. Tura inati ainau ni apurincha umirinawai. Antsu wikia atumi Apaachiri ai waitiatrumsha ¿waruka winaka umirtatsrume? Turasha wikia atumi Apuri ai waitiatrumsha ¿waruka wina chichamrusha anturtutskesha pujarme? Atum tangku wainmichu tura wekaichau tura sungkurmaku surusu asaram, winaka pengkerka awajtatsrume. ¿Atum turarme nuka pengkerkai? Watska, atumi apuri ju nungkanam atumin inatminak pujuinau nu tangkuka susataram. Tura atumi apuri nu suwam ¿nekas pengker nintimias jukitnukai? Atsa tajarme.

Sacerdote ainautiram, atumnasha nu chichamnasha akuptajrume. Atumka Yus umirat ukukrum, atumi turamurijai tura aints ainau nuiniamurmijai nu aints ainauka tunaun turuwarti tusaram nintimtikramiarume. Tura wina umirtuktin chicham umirtukchau asakrumin, wikia chikich aints ainausha atumin umirtamtsuk tura atumnasha pengkerka awajtamtsuk pujusarti tusan nintimtikrartinuitjai.

Tura asan atum wina surustasrum wakerarme nunaka nakitajai. Tura wainiatrum atumka juutkuram: ¿Ii Apuri waruka nuna nakitajai tawa? tu wearme. Atumi nuwari ajapau asakrumin, atumi tangkurincha nakitajai. Atumka natsa pujakrum, atumi nuwari chichasrum: Wikia amijai tsaniasan jakatnuitjai timiarume. Tu tinu asaram atumi nuwari timiarume nuka kajinmatsuk umirkataram. Wi Yus asan, aintsu namangken tura aintsu wakanin najanawitjai. Tura atumi Apuri asan tajarme: Atumi ninti mesrai tusaram wainkataram. Wikia aints ni nuwarin ajapawar ukuina nunaka tsuutajai. Tura asamtai atumi nuwari ajaparam ukukirap, Yus turamrume, —Malaquías tusa aarmiayi.✡Marc 10.2-9

—Ii Apuri timiá kakaram aa nuka tawai: Nintimrataram. Wikia winitsuk wina jintarun iwiarati tusan, eemkan wina akupamurun akupkatnuitjai. Atumi Apuri atum searme nuka Wiitjai. Wikia aneachmau wina seatinak pujuinamunam wayaatnuitjai.✡Mat 11.10; Marc 1.2; Luc 1.76; 7.27

Tura wi winamtai ¿yáki surimrukat? Wi winamtai ¿yáki pangkaisha jiirsat? Wi winaknaka jiya nunisnak winitnuitjai. Atum japujai pakui sakmarme nunisnak atumi tunaarin sakartasan winitnuitjai. Aints ainau kuikiancha tura kurincha nekas pakuichau at tusar, jinum tseenawa nunisnak sacerdote ainaun nekasash wina umirtina tusan nekapsatnuitjai. Antsu nuniangka wina surusartas wakerina nunaka pachitsuk surusartinuitai.

Sacerdote ainau ni tunaarin inaisaramtai, wi yaanchuik warasmiaja nunisnak ataksha warastinuitjai. Wikia atumi Apuri timiá kakaram asan tajarme: Wikia atumi tunaarin jiistaj tusan winitnuitjai. Tura mash aints ainau tunaarin jiisan, wishin ainauncha jiistinuitjai. Tura nuwan nuwatsuk takau ainauncha jiistinuitjai. Tura nangkamiar Yusjai tajai tinu ainauncha jiistinuitjai. Tura tenap akiachiat takakmamtikin ainauncha jiistinuitjai. Tura waje ainaun tura mitaik ainaun, tura chikich nungkanmaya ainaun pasé awajin ainauncha mash jiistinuitjai. Tura wina nintimturchau ainauncha mash jiistinuitjai, —Yus tawai tusa Malaquías aarmiayi.

Nunia Malaquías ataksha tu aarmiayi:

—Yus tawai tusam aints ainau ujakta: Atumi juuntri ainau wina chichamrun umirtutsuk pujuarmia nunisrumek atumsha wina umirtut nakitmiarume. Tura asakrumin wikia atumi Apuri asan tajarme: Yamaikia atumi tunaari inaisaram, wina chichamur umirtuktaram. Tura wainiatrum atumka chichaakrum: “¿Ami chichammin umirkatasnasha warí tunaarunak inaisataj?” tarume. Atumka kasa aintsua nunisrumek winar aa nu kasamu wearme. Turayatrum atumka wina chichartakrum: “¿Itiur amincha kasarkamiajme?” turutrume.

Tura asakrumin wikia tajarme: Atumniau aa nuka wina surachu asaram winar aa nuka kasartarme. Tura asaram yamaikia tenap nekapsataram: Atumniau kichik pachak jukirmeka diez (10) surustaram. Tura diez (10) jukirmeka kichik surustaram. Nu turakrumningkia wikia atumin pengker awajsatatjarme. Tura asamtai mash nungkanmaya ainau nuna wainkar atumin pachitmasar: Nu aintska nekas pengker pujawai turamiartinuitai. Wi atumi Apuri asan nunasha tajarme.

—Ii Apuri tawai tusam aints ainau ujakta:

Atumka katsuram nintintin asaram, wina pachitsaram pasé chichartarme. Atumka chichaakrum: “Iikia nangkamir Yus umirkur pujaji. Antsu Yusen umirtsuk pujuinauka mamutsuk pujuinawai. Tura jampenak pujuinauka pengker pujuinau nekaji. Tura pasé aints ainauka: Yusjai nekapnaisatai tinayat, wait wajatsuk pujuinawai”, tu wearme nuka nangkamrum tarume, —Yus turamrume.

Yus nu aints ainaun tu tinu asamtai: ¿Itiur uwemratjik? tusar Yusen nintimraru ainauka mai nuwamtak chichasarmiayi. Tura Yuse naarin nintimsar pujusarmi tusar, tura Yus umirkarmi tusar papin aararmiayi. Turinamtai Yuska nu aints ainau nintimaurin nekau asa chichaak:

—Uchirtin ni uchirin wait anentawa nunisnak wina aintsur ainaun wait anentrartatjai. Wi turamtai, nuniangka pengke aints ainau yaachita tusaram, tura tunau ainausha yaachita tusaram atumsha nekaatnuitrume. Tura wina umirtinak pujuinauka tura wina umirtutsuk pujuinausha yaachita tusaram atumsha nekaatnuitrume, —Yus timiayi.

Ii Apuri timiá kakaram asa, tawai tusam aints ainau ujakta: Wait wajaktin kinta jeatak wajasi. Nu kintaka aints eper keemakam kapaawa nunisarang aints miajuitjai tinu ainausha tura pasé aints ainausha mash kapaarartinuitai. Tura asar kichkisha ampintrarchatnuitai. Antsu atum wina umirtakrumka, tangku jeanmaya tsekengkiar jiininak warainawa nunisrumek warastinuitrume. Nu kintaka aints nungka tsetserin najainawa nunisrumek atumka pasé aints ainauka najartinuitrume. Wikia umirtuktin chichaman wina inatir Moisésan akuptukmiaja nuka aneaku ataram.

Atumka nintimrataram. Tunau ainau amuktin kinta jeatsaing, wina chichamrun etsernun Elíasan ataksha akuptuktinuitjarme.✡Mat 11.14; 17.10-13; Marc 9.11-13

Wi turamtai Elías taa, uchirtin ainau ni uchirijai tsangkurnairar pengker nintimtunisar pujusarat tusa chichastinuitai. Antsu Elíasa chichamen pachinachmataikia wi taratnuitjai. Tura asan atumi nungkarin mash mesturtinuitjarme, Yus tawai tusam aints ainau ujakta, Malaquías tu aarmiayi.✡Luc 1.17