Isaías

Yus aints Isaías naartiniun: Judá nungkanam wina chichamur etserin ata tusa akatar akupkamiayi. Tura Uzías tura Jotam tura Acaz tura Ezequías Judá apuri pujuinamunam Isaías Yuse chichamen etserin ayayi. Tura aints ainaun chicharak:

—Yus ta nu antuktaram: Atumka wina uchiruitrume. Wikia atumin tsakatmarmiajrume. Tura wainiatrum yamaikia winaka umirtut nakitrarme. Waaka ainau nintimrataram. Waaka ainau nurinuri yáki tusar nekainawai. Burro ainausha ni kanutiri tuki tusar nekainawai. Antsu atumka wina aintsur ayatrum, winaka yáki tusarmeka nintimturtsurme. Tura asaram wina chichamur anturtutsuk pujarme. Atumka tunaarintin asaram, atumi Yusri umirat kajinmarme, —timiayi.

Nunia Yus Isaíasan tawai tita tusa akupkamiayi. Nu chichamka nuwaitai:

—Aints ainautiram anturtuktaram. ¿Atumi tangkuri wina surustasrum epearme nuka waruka aitkarme? Atumi tunaari inait nakitakrumka nangkamrum turarme. Tura asakrumin nuka inaisataram tajarme. Antsu wina seatkurminkia, wikia atumi tunaarin japiratnuitjarme. Atumi tunaari untsuri au wainiatun, wikia tsangkuratnuitjarme. Tura atumin pengker awajsatnuitjarme. Antsu atumi tunaari inait nakitakrumningkia, tura wi tajarme nu umirat nakitakrumningkia, wikia Yus asan, atumi nemase ainaun atumin akuptuktinuitjarme. Wi turamtai atumi nemase tarutramiar mantamawartinuitai.

Antsu aints ni tunaarin inaisar, wini wininauka uwemrartin ainawai. Antsu ni tunaurin inaitan nakitin ainauka: Yainkata turutsuk pujuinauka jakartin ainawai, —Yus tawai, Isaías timiayi.

Nunia Yus ataksha Isaíasan Judá nungkanam pujuinaun pachis, tura Jerusalénnum pujuinauncha pachis chikich chichamnasha akuptukmiayi. Tura chichaak:

—Nungka amuamunam Jerusalén yakat chikich yakat ainaun nangkamasang juun atinuitai. Tura wina jearka chikich jea ainau nangkamasang timiá juun atinuitai. Tura asamtai untsuri nungkanmaya ainau winiartinuitai. Tura chichainak: Jerusalénnum Israela Yusri jeen weartai. Tura nuni jear Yus ningki ni umirkatin chichaman iin nuitamrati tiartinuitai. Yus Jerusalénnum aints ainaun mash inartin asamtai tu chichasartinuitai. Turinamtai mesetnasha mash inaisartinuitai, —Yus timiayi.

Nunia Isaías ataksha aints ainaun chicharak:

—Jacobo weari ainautiram wainkataram. Atumka Yuska seatsuk Yuschau wainiatrum atumi yusri nakumkamuri pengker awaju asakrumin, Yus atumin ajaprama ukurmakmiarume. Tura atumin wait wajaktiniun suramsatin kinta jeamtai, atumsha nangkamrum: Yus waitkai tusaram waanam wayaatnuitrume. Antsu Yus umirat nakitrau asaram, tuuka uwemrashtinuitrume, —Isaías timiayi.✡Ap 6.15-17

Nunia Isaías ataksha chichaman aarmiayi. Nu chichamka nuwaitai:

Apu Uzías jakamtai, nu musach wi karanma nunisnak Yusen keemtai juunnum tura shiirmanam ketun wainkamiajai. Tura entsatiri timiá saram asa, Yus seati juun jean netkaun wainkamiajai. Tura nanamtin ainaun jiiya tumau kapainaun wainkan, nunia kichik kichik nanamtinu nanape seis (6) aun wainkamiajai. Tura jimia nanapejai yapiin nukukar, tura jimia nanapejai nawen nukukar, chikich jimia nanapejai nanamiarmiayi. Tura chichainak:

—Yus nekas pengkeraitai. Mash nungka ainamunam pujau asa, Yus nekas juuntaitai, —tinamtai uuya tumau Yus seati juun jea waitiri ainaun peakmiayi. Turamtai mukunit Yus seati juun jean netkamiayi.✡Ap 4.6-8; 15.8

Turamtai wi nintimsan:

—Chaj, wikia shamajai. Wikia chikich aints ainaujai metek tunau chichamtinuitjai, tura chikich tunau chichamtin ainaujai tsaniasan pujajai. Tura yamaikia Yus timiá kakarman wainkau asan jakatatjapi, —timiajai.

Nuniasha kichik nanamtin nanaaki winaun wainkamiajai. Nuka Yusnum kungkuti epetinmaya kayiin keaun juki, nujai wina jangkerun takartusmiayi. Tura wina chichartak:

—Jiisia, jujaingkia ami wenemin takasjai. Tura asamtai tunaarum yamaikia sakarmawaitai, —Yuse awemamuri turutun antukmiajai. Tura chichaman antukmiaja nuka nuwaitai:

—¿Yáki wina chichamrun etserin ain? ¿Yanak akupkaintaj? —Yus tamati wi nuna antukan ayaakun:

—Apuru, wina akuptukta. Wikia wetasan wakerajai, —timiajai.

Wi tamati Yus wina chichartak:

—Ayu weta, tura nu aints ainau jiisam chicharkarta. Atumka paan antayatrumek antukchatnuitrume. Tura paan wainmatcha wainmayatrumek nekaashtinuitrume. Atumka katsuram nintintin asaram, tura atumi kuwishi epekua nunisrumek pujau asaram, antuktatkamaram tujintarme. Tura atum wainmichua nunisrumek pujau asaram, paan wainmaktatkamaram tujintarme. Tu ainiachkurmeka paan nekaamnawaitrume, tura nekasrum antukminuitrume. Tura atumi nintijai paan nintimsaram atumi tunaari inaisakrumningkia uwemtikratnuitjarme, tawai tusam ujakarta, —Yus turutmiayi.✡Mat 13.14-15; Marc 4.12; Luc 8.10; Juan 12.39-40; Hech 28.26-27

Yus turutmati wikia ayaakun:

—Apuru ¿warutik tunaarincha inaisarat? —tu iniam Yus airak:

—Ni tunaarin inaitan nakitinau asaramtai, ni yaktari ainaun mesturtinuitjai. Turamtai ni aintsri ainausha mengkakartinuitai. Tura ni ajari saak wajasartinuitai. Tura ju nungkanam pujuinaunka mash jiikiartinuitjai. Antsu nukap arusar jumchik aints juni waketkiartinuitai. Aints numia tumau ainawai. Aints numin charukamtai, aya nantujeng wainkatnuitai. Antsu nantujenia ataksha tsapaitnuitai, —Yus turutun antukmiajai.

Acaz Judá nungkanam apu pujai, Siria apuri tura Israela apuri ni suntari ainaujai mash iruntrar Jerusalén yaktan mesrartas tariarmiayi. Turinamtai apu Acaz ni aintsri ainaujai mash shaminak kurarainamtai Yus Isaíasan apu Acaznum akupkamiayi. Tura Yus akupkamu asa, Isaías jeari Acazan chicharak:

—Apu Acaza, Yus amin turamui: Wainkata, antsu shamkaip. Nu jimiar apu winina nuka aminka nepetamkachartinuitai. Wikia nekasan tajame: Yus ningki nintimias wainchati takatan turatnuitai. Nuwa aintsjai tumichu japruktinuitai. Tura asa uchin jurertinuitai, tura uchin Emanuel inaikiatnuitai. (Nuka ii chichamejaingkia Yus iijai pujawai taku tawai.) Yus turamui, —Isaías timiayi.✡Mat 1.23

Nunia Isaías ataksha Yuse chichamen aar:

—Nu nangkamtaik Zabulón nungkanam tura Neftalí nungkanam teenam pujuarmia nuka tuuka pujuschartin ainawai. Antsu nukap arusar juun kucha yantamen, Jordán entsa majin nangkamak tura juun entsanam jeatak Israelchau ainau pujuinamunam nu aints ainau tunau asar, teenam pujuinawa nunisarang pujuu armiayi. Tura yamaikia uwemratin chichaman antukar, aints paaniun waininawa nunisarang pujusarmiayi, —tu aarmawaitai.✡Mat 4.15-16

Nunia ataksha Isaías chichaman aak:

—Uchikia iin akiinturmatnuitji. Tura mash nungkanmaya aints ainautin inatmartinuitji. Niinu naaringkia nuwaitai: Wainchati Takatan Takau, tura Mash Nekau, tura Yus Timiá Kakaram, tura Ii Apaachiri Tuke Pujuya Nu, tura Angkan Pujustinu Apuri, ni naaringkia nuwaitai. Ii apuri David ni aintsri ainaun inarmia nunisang tuke inaitsuk aints ainautin inatmartinuitji. Tura ni aintsri inartinka tuke nangkankashtinuitai, —tu aarmawaitai.✡Luc 1.32-33

Nunia Isaías ataksha tu aarmiayi:

Yus Satanásan chicharak:

—Angkuajiya, ¿amesha nayaimpinmaya itiur ayaarmiame? ¿Tura nayaimpinmayasha itiur nungkanam ujuarmawaitme? Ametme mash nungkanam pujuinau mesratnium. Amek nintimtumasam: Wikia nayaimpinam wakatasan wakerajai. Tura nayaimpinam yaa ainau nangkamasnak yakí wina keemtairun puusatasan wakerajai. Tura Yus puja nuni keemsatasan wakerajai. Tura mukuntiun nangkaikin yakí wakatasan wakerajai. Tura Apu Yus yakí puja nujai metek juun wajastasan wakerajai, tu nintimin amining, waa jiitamranam amin ajunmarartin ainawai, —Yus Satanásan timiayi.✡Luc 10.18; Ap 20.1-3, 10

Nunia Isaías ataksha tu aarmiayi:

—Aints numi atsamunam taa kakar chichaak: Aints ainau apu wekaasatniun jintan tupin iwiarina nunisrumek atumi ninti iwiarataram. Jinta wake amatisha, nungkan yaruakar pakamina nunisrumek atumi nintisha iwiarataram. Tura mura ainauncha yumpuarar pakamina nunisrumek turataram. Nunia Yus mash nungkanmaya ainaun uwemtikratniun akupkatnuitai, Yus tawai, —Isaías tu aarmiayi.✡Mat 3.3; Marc 1.3; Luc 3.4-5; Juan 1.23

Nunia Isaías chikich chichaman antukmiayi. Nu chichamka nuwaitai:

—Untsumkata, —Yus tama nuna antuk Isaías ayaak:

—¿Warinak untsumkataj? —timiayi. Tu iniam Yus chicharak:

—Aints mash nupaaya nunisarang ainawai. Aints miajuitjai tinayat, yangkura nunisarang ainawai. Antsu nupaasha tura yangkursha minar mengkainiayi. Antsu chichamruka pengké mengkakashtinuitai, tawai tita, —Yus timiayi.✡Stg 1.10-11; 1 Pe 1.24-25

¿Atumka nekaachmakuram, nuniasha antukchamkuram? ¿Nu nangkamtaik amia nunaka atumin ujatmakcharmaka? ¿Tura nungka itiur najanaruita tusarmeka nintimrachmakuram? Yus nungkan najanamia nuka nayaimpinam pujawai. Tura asa ju nungkanam pujuinautinka manchia tumau jiirmaji. Tura asamtai juun ainauncha tura apu ju nungkanam pujuinauncha mengkaktinuitai. Apu ainauka árak yamai arakmawa nunisarang ainawai. Yus nasen akupamtai, árak yamai arakmau ainauka minarar jajatinawai. Tura kaaramtai nasesha nu araknaka juwawai. Apu ainauka timiá kakaram ainayat, árak yamai arakmawa nunisarang mengkakartin ainawai.

Yus nekas tunaarinchau aa nuka iin ininmak: Atumka wina pachitsaram ¿Yuska wariya tumawaita tusaram itiur nintimrume? iin turamji. Atumka pangkairam nayaim jiistaram. ¿Ya nuna mash najanamia? Yuska yaa ainau auni keemsarti tusa mash kentsamiayi. Tura yaa naarincha mash nekawai. Ni kakarmari mianu asamtai, yaa ainau mash niincha umirinak nuni tuke ketinawai.

Israel ainautiram, Jacobo weari asaram, atumka Yus pachisrum chichaakrum: Ii Apuri winaka nintimturtsuk pujawai, turasha wi itiurkachminnum pujaisha, winasha nintimturtsuk pujawai. ¿Waruka tuusha chichaarme? ¿Atumka nekatsrumek? ¿Tura antukchamkuram? Ii Apuringkia Yus asa tuke nintipitai. Tura tuke pimpitsuk takakmaksha yaweatsui. Tura aints pimpir pujaunaka kakamtikui, tura kakaichau ainauncha ni kakarmarincha suawai.

Natsa ainausha timiá kakaram ainayat, pimpirar ayaararminuitai. Antsu Yusen nintimsar pujuinaunka, Yuska tuke kakaram wajasarti tusa, ni nintin kakamtikui. Tura Niin nintimsar pujuinaunka, kukui pimpitsuk yakí nanaminawa nunisarang kiakaartinuitai. Turamtai pimpitsuk Yusen umirkartinuitai, tura yawetsuk Yusen nemarsartinuitai.

Yus mash nungkanmaya ainautin chichartamak:

—Mash nungkanmaya ainautirmesha yamaikia atumi ninti kakamtikrataram. Tura iijai iruntrar chichasmi tusaram wini winitaram. Watska, yamaikia wikia iniastatjarme. Tura atum nekakrumka airkataram. ¿Apu mash nungkanmaya ainaun nepetea nuna yaa apuna tsaa taakmaunum mash nungkanmaya ainaun nepetkati tusasha kakarmarincha susamia? Tura mash nungkanmaya ainauncha papeek ninu nungkarincha kakarmachu atankiti tusasha ¿yaachia nu apunka nintimtikramia? ¿Yaki aitkaya tusaram nekarmek? ¿Yaachia aintsun najantsaing ni turuatniuri tu ati tusasha wakerukia? Wikia Yus asan, nu apunka nintimtikramiajai. Tura Yus asan nu nangkamtaik tuke pujuyaja nuwaitjai. Tura nungka amuamunmasha tuke mash inartatja nuwaitjai, —Yus iin turamji.✡Ap 1.8, 17; 22.13

Israel ainautiram, atumka wina inatir ainiarme. Atum Jacobo weari asakrumin atumin eakmiajrume. Atumka wina amikru Abrahama wearintrume.✡Stg 2.23 Wikia atumin arák pujarmining: Winar ataram tusan untsukmiajrume. Tura asan wikia atumin: Wina inatiruitrume timiajrume. Tura wi atumin eaku asan atumnaka inaisachmiajrume. Wikia atumjai pujau asamtai, napchau nintimtsuk asataram. Tura atumi Yusri asamtai shamkairap. Tura tuke atumi Yusri asan yaingtatjarme. Tura wina untsur uwejrujai atumnasha tuke kakamtikratatjarme. Atumin nakitramin ainauka mash wake mesekar natsarartinuitai. Tura atumin kajertamin ainauka mash mengkakartin ainawai. Wikia atumi Yusri asan, tuke atumin wina untsur uwejrujaingkia kakamtikramiajrume. Tura asan atumin chicharkun: Shamtsuk asataram. Wi yaingtatjarme atumin tinu asamtai, atumin kajertamin ainau eakrumsha wainkashtinuitrume. Atumin mesetan najatramin ainauka aya atsawa nunisarang artinuitai.

Wi Yus asan tajarme: Israel ainautiram, Jacobo weari asaram, maachia nunisrumek kakaichau ayatrumek, tura jumchik ayatrumek shamkairap. Wikia atumi Yusri asan, tura pengké tunaarinchau asan, atumin uwemtikratnuitjarme, Yus tawai tusam aarta, —tama Isaías aarmiayi.

Aints ningki nintimsar Yuschau waininayat ni yusri nakumkamurin nangkamiar najaninawai. Tura ni yusri nakumkamurin shiirman najaninayat nangkamiar najaninawai. Tura aints ainau ni yusri nakumkamurin: Ameketme Yusem tinauka wainmichua nunisarang ainawai. Tura nintinchau ainawai.

Watska, jiru takau nintimrarmi. Aints jirun tseermaun martichjai nekea nekeaka, ni kakarmarijai ni yusri nakumkamurin najanui. Tura kakarman takakmau asa yaparawai tura pimpiawai, tura umutsuk pujakka, kitamak kajinmak nungká ayaawai.

Nuniasha numi takakmin nintimrami: Numi juuntan charuk, nunia nekapmar, lápisjai ai at tusa tsentsar, nunia asiwijai aintsu nakumkamurin shiirman najanui. Nunia jean jeamak ni yusrin nuni pujui.

Nunia chikich aints numin nukap arusan charukmi tusa araawai. Turamtai Yus yumin akuptuk numin tsapamtikui. Tura awan kanu wakerakka, nunasha nukap tsakaramtai, charukmi tusa tenap wainui. Tura chikich numin charuk, chapuman nakak nu chapumjai jiin keemaktinuitai. Tura tsetsemak jiin yamaatnuitai. Tura yaparak jinum yutairin inaratnuitai. Tura numi ampintramurin achik, ni yusri nakumkamurin najanatnuitai. Tura nuna umis tikishmatar nu numichin seak: Wina yusur asam uwemtikrurta titinuitai.

Aints nuna turaka nekachu asa nintinchawaitai. Tura wainmichua tumawaitai. Nu numin charuk, japchirin chapuman najanak, jinum epea: Yuta yuwami tusa yutairin inarui. Nunia numi ampintramurin ni yusrin najana umis tikishmatui. Antsu aints wina yusruitme ta nuka aya numiapita tuuka nintimtsui. Nu aintska yuchati wainiat yukuun yuwawa nunisketai. Tura nu aintsu yusri numi najanamu asa Yuschawaitai. Nu aintska ningki anangmamui. Ni yusri numi najanamuka nu aintsun uwemtikratatkama pengké tujintawai. Tura wainiat nu aintska nintinchau asa: Aints ainau nuka Yusetai tinauka wait chichamrintin ainawai, tuuka nintimtsui. Yus tusa, Isaías ni aintsri ainaun ujakat tusa aamtikramiayi.✡Sal 115.4-8

Nunia ataksha Mesías ukunam tatinun pachis aints ainau yaanchuik wainkarmia nunisang Isaías nu chichaman aarti tusa Yus aamtikramiayi:

—Yuse inatiri yapiin awatinak pasé awajsarmiayi. Aints ainau chikich aintsu yapiin awatinak pasé awajina nuna nangkamasarang timiá pasé awajsarmiayi. Yuse inatiri mash nungkanmaya ainaun pengker awajsatas tau waininayat, aints ainau niin wainkar: Nu aintska pengkeraitai, tura nekas juuntaitai pengké ticharmiayi. Antsu nukap awatrarmiayi, tura wishikrarmiayi, tura pasé awajinam, nukap wait wajakmiayi. Tura asamtai aints ainautisha nu aintska jiitcha nakitmiaji.✡Mat 26.67, 68; 27.30, 31

Nekas ii pimpirmaurincha tura ii najaimiamurincha ningki jurutramkimiaji.✡Mat 8.17 Antsu aints ainau niin awatrarti tura wishikrarti tusar, Yuska ningki nu wait wajaktinnaka tsangkatkamiayi tusar, iikia tu nintimsar pujusmiaji. Antsu ii Yusri umirat nakitau asakrin niinka ijuarmiayi. Tura ii tunau asakrin, niinka pasé awajsarmiayi. Iin angkan awajtamsatas ningki wait wajakmiayi. Tura iin uwemtikramratas tau waininayat, niin awatrar charu charu najanawarmiayi.✡1 Pe 2.24

Iisha uwijaya nunisrik mash mengkakauyaji. Tura Yus umirat nakitau asar, iik nintimsarik aints waakar jintachu wekainawa nunisrik wekainuyaji. Tura wainiat Yus ii tunaarin ningki mash jukiti tusa, aints ainau niin pasé awajsarti tusa tsangkamkamiayi.✡1 Pe 2.25 Tura uwijan maawartas juwina nunisarang niincha jukiarmiayi. Tura uwija uchiri ure awaam, juutsuk tepawa nunisang chichakchamiayi.

Niincha inatsaararmiayi, tura tunaarinchau waininayat wait wajaktiniun susarmiayi. Tura ju nungkanam pujau maamuncha ¿yaa ni wearing ayamrukat?✡Hech 8.32, 33 Antsu aints kichkisha ayamrukminka atsumiayi. Antsu tunaunaka pengké turachmiayi. Tura aintsnaka kichkisha pengké anangkachmiayi. Tura waininayat awatrar: Iwiaakuka pujuschati tusar, nuniasha tunau aints ainaujai jakati tiarmiayi. Tura jakamtai, aints kuikiartinu iwiartairin iwiarsarti tusa Yus wakerimiayi.✡Mat 27.57-60; 1 Pe 2.22-23

Antsu ii tunaari akiimiakat tusar maawaruitai, aints kichkisha ticharmiayi. Ningkia tunaun kichkisha turichu wainiat, tura wait chichaman kichkisha chichachu wainiat, Yus wait wajakti tusa tsangkamkamiayi. Tura asamtai pasé aints ainaujai maawarmiayi.✡Marc 15.28; Luc 22.37

Tura asamtai chikich aints ainau: Nekas tunaawaitai tinau wainiat, untsuri aints ainauti tunaarin akiimiatramkatas wait wajakmiayi. Tura tunaarintin ainaun pachis Yusen seatmiayi.✡Luc 23.34 Tura aints ainaun uwemtikratas jakau asa, uwemraru ainaun wainak: Maaketai titinuitai. Tura aintsu tunaarin untsuri sakaru asamtai, Yuse Inatiri nekas pengker aa nuka untsuri aintsun angkan awajsatnuitai. Tura asamtai Yus niin pachis: Nekas aints ainau inau atinuitai, Yus tusa ukunam atiniun Isaíasan aamtikramiayi.✡Flp 2.5-11

Nunia Yus ataksha nu chichamnasha Isaíasan aamtikramiayi.

Yus chichaak:

—Aints ainautiram, kitamawa nunisrumek pujau asaram, wini winitaram. Turaram yumi akikchau shikikrum juwarme nunisrumek pujut nangkankashtin akikchau aa nuna jukimi tusaram wini winitaram.✡Juan 7.39; Ap 21.6; 22.17

¿Waruka atumi kuikiari nangkamrumsha ajapu wearme? Wini winiram anturtuktaram. Turakrumningkia wikia atumi juuntri Davidtan timiaja nunaka miatrusnak umiktinuitjai. Tura asan chikich Apun akuptuktinuitjarme. Nuka mash aints ainaun nuiniartinuitai. Tura mash nungkanmaya ainaun untsuktinuitai. Turamtai wikia Yus asan, wi pengker awajsamu asar ampukiar wini winiartin ainawai. Tura asaramtai wina eatkaram wini winitaram. Wikia arakchichu pujau asamtai untsurkataram. Pasé aints ainausha ni tunau nintimtairinka kajinmakiar, wining waketkiarti. Wikia Yus asan, tunau ainaun wait anentran ni tunaarin mash tsangkuratnuitjai.

Nayaimpisha tura nungkasha metekchau ainawa nunisarang wina nintimtair atumi nintimtairijaingkia metekchau ainawai. Wikia nungkan chuprat tusan nayaimpinmaya yumincha tura michancha akupajai. Tura árak araamu tsapait tusan yumin akupajai. Wi wakerau asan, aints ainau arakan araawarti tusan, tura yutancha yuwaarti tusan yumincha akupajai.✡2 Cor 9.10 Wina chichamrusha yumi jitawa nunisketai. Nangkamniaka wina chichamrunka akupatsjai. Antsu wi wakeraja nunak aints ainau umikiarat tusan wina chichamrun akupajai.

Atum yamai tuni pujarme nunia jiinkiram warasrum atumi nungkarin angkan pengker nintimsaram waketkitnuitrume. Nunia nangkamrumka pujuschatnuitrume, antsu wina umirtukrum wina pengker awajtustinuitrume, —Yus timiayi.

Nunia Isaías Yuse chichamen ataksha tu aarmiayi.

Ukunam Yus akupkatniuri Mesías tutai tu chichastinuitai:

—Yuse Wakani wini pujurtawai. Tura asa winaka: Nekas mianchau ainaun uwemratin chicham ujakta tusa akuptukmiayi. Tura wake mesekar pujuinauncha: Pengker nintimsar pujusarti tusa wina akuptukmiayi. Tura jingkiamua nunisarang pujuinausha: Angkan pujustaram tita tusa akuptukmiayi. Tura kársernum pujuinausha jiinkitaram tita tusa akuptukmiayi. Tura yamaikia Apu Yus aints ainaun wait anentawai tusam etserkata tusa akuptukmiayi. Isaías tu aarmiayi.✡Luc 4.17-19; 7.22