1 Corintios 13

Ri lic chirajawaxic wi e ri rutzil cꞌuꞌxaj

1 We ta e laꞌ riꞌin canrik quinchꞌaꞌt pa uqꞌuiyal chꞌaꞌtem que ri ticawex y canrik ne ri quichꞌaꞌtem ri ángeles yey na jinta ri rutzil ucꞌuꞌx ri Dios pa wanimaꞌ, riꞌ xa in pachaꞌ ri chꞌichꞌ cayojoyotic o ri chꞌichꞌ catzinowic.

2 We ta e laꞌ yaꞌtal chwe cankꞌalajisaj runaꞌoj ri Dios chiquiwach ri ticawex y canmaj usucꞌ ronoje ri ewatal chiquiwach jujun chic y canmaj usucꞌ ronoje naꞌoj, y we ta lic cꞌo cubulibal nucꞌuꞌx rucꞌ ri Dios chaꞌ utz rucꞌ waꞌ canjalcꞌatij ne quiluwar ri nimak tak juyub, yey na jinta ri rutzil ucꞌuꞌx ri Dios pa wanimaꞌ, riꞌ na jinta cꞌana nuchac chwach ri Dios.

3 We ta e laꞌ canjach chique ri nibaꞌib ronoje ri bitak we y tob ne canya wib re quimporoxic xa re tacꞌabal nukꞌij, yey na jinta ri rutzil ucꞌuꞌx ri Dios pa wanimaꞌ, riꞌ na jinta cꞌana cutikoj chwe.

4 We junok cꞌo ri rutzil ucꞌuꞌx ri Dios pa ranimaꞌ,

riꞌ cꞌo unimal ucꞌuꞌx cucꞌ ri ticawex,

lic utz ucꞌuꞌx,

na cꞌax ta ucꞌuꞌx chirij junok,

na cutacꞌabaꞌ ta ukꞌij

y na cuꞌan ta nim che rib.

5 We junok cꞌo ri rutzil ucꞌuꞌx ri Dios pa ranimaꞌ,

riꞌ na cuꞌan ta ri na takal ta che.

Na xew ta coc il che ri cajawax che rire,

ma e ne coc il che ri cajawax chique ri jujun chic.

Na xa ta rucꞌ jutzꞌit cape royowal

y na cucꞌol ta oyowal pa ranimaꞌ.

6 We junok cꞌo ri rutzil ucꞌuꞌx ri Dios pa ranimaꞌ,

riꞌ cubisoj ri na jusucꞌ taj caꞌanic

yey lic caquiꞌcot che ri jusucꞌ caꞌanic.

7 We junok cꞌo ri rutzil ucꞌuꞌx ri Dios pa ranimaꞌ,

riꞌ cuyul re ronoje,

lic cubul ucꞌuꞌx rucꞌ ri Dios y cucꞌ ri jujun chic,

xaki e royeꞌem ri utz

y cuchꞌij uchukꞌab janipa ri cape puwiꞌ.

8 Ri rutzil cꞌuꞌxaj re ri Dios na casach ta cꞌana uwach. Pero copon ri kꞌij echiriꞌ na cayaꞌ ta chi che junok cukꞌalajisaj runaꞌoj ri Dios, na cayaꞌ ta chi ne che junok cachꞌaꞌt pa jujun chic chꞌaꞌtem na umajom taj y na cayaꞌ ta chi ne che junok cutzijoj ri ukꞌalajisam ri Dios che; ma ronoje waꞌ xa caqꞌuisic.

9 Woꞌora na ketaꞌam ta ronoje y na cakarik ta ukꞌalajisaxic ronoje runaꞌoj ri Dios. 10 Pero copon na cꞌu ri kꞌij echiriꞌ ronoje catzꞌakat uwach; ecꞌu riꞌ ri na tzꞌakat taj, xa caqꞌuisic. 11 Ma riꞌin echiriꞌ in cꞌoꞌm, ronoje ri cambiꞌij, ri canchꞌobo y ri canmaj usucꞌ e re juna cꞌoꞌm. Noꞌj echiriꞌ xinnimaric, xinya can ri canꞌan chi nuchꞌutiꞌnal.

12 Woꞌora e pachaꞌ cojtzuꞌn pa juna espejo sutzꞌ uwach; noꞌj copon na ri kꞌij cakil uwach ri Dios, cꞌa ecꞌuchiriꞌ cakꞌalajin chikawach ri cakilo. Woꞌora na cakꞌalajin ta ronoje chinuwach; noꞌj cꞌo cꞌu jun kꞌij echiriꞌ cakꞌalajin ronoje chinuwach, jelaꞌ pachaꞌ ri Dios lic retaꞌam ronoje ri cꞌo pa wanimaꞌ.

13 Woꞌora chirajawaxic cacꞌojiꞌ cubulibal kacꞌuꞌx rucꞌ ri Dios tob cꞌamajaꞌ cakil uwach, cakoyꞌej rubiꞌtisim can ri Dios chike y cacꞌojiꞌ ri rutzil ucꞌuꞌx ri Dios pa kanimaꞌ. Chique cꞌu wa oxib, ri más cajawax chike e ri rutzil cꞌuꞌxaj.

<- 1 Corintios 12 1 Corintios 14 ->