1 Ri Dios xuꞌan jusukꞌ chiqe ruma ri kubꞌulibꞌal qakꞌuꞌx rukꞌ; ekꞌu woꞌora oj kꞌo chi utzil chomal rukꞌ Rire ruma ri Qanimajawal Jesucristo. 2 Yey ruma ri Cristo, xyaꞌ chiqe kojok chwach ri Dios ruma ri kubꞌulibꞌal qakꞌuꞌx y jelaꞌ kaqakꞌul ri unimal rutzil ukꞌuꞌx pa oj tikil wi chi utz. Yey lik kojkiꞌkotik ma qoyeꞌem keꞌqila na runimal uchomalil ri Dios. 3 Y na xew ta waꞌ, ma lik ne kojkiꞌkotik echiriꞌ kape kꞌaxkꞌobꞌik paqawiꞌ. Ma qetaꞌam we xqachꞌij uchuqꞌabꞌ ri kꞌaxkꞌobꞌik, lik kakꞌojiꞌ unimal qakꞌuꞌx. 4 Ruma kꞌu runimal qakꞌuꞌx kojelik utz qaꞌanom chwach ri Dios, ma xqachꞌij uchuqꞌabꞌ ri kꞌambꞌal qapa. Yey we xojelik utz qaꞌanom chwach ri Dios, e lik kakubꞌiꞌ pan qakꞌuꞌx rukꞌ Rire. 5 Lik kꞌu jikil uwach kaqakꞌul na ri qoyeꞌem che ri Dios, ma Rire lik ukꞌutum ri rutzil ukꞌuꞌx chiqe ruma ri Santowilaj Ruxlabꞌixel uyaꞌom pa qanimaꞌ.
6 Ma riꞌoj na jinta kꞌana qachuqꞌabꞌ re kaqakolobꞌej qibꞌ; yey chupa kꞌu ruqꞌijol uchaꞌom chi lo ri Dios, xkꞌun ri Cristo y xuya ribꞌ pa kamik chaꞌ kojukolobꞌej ri oj aj makibꞌ. 7 Lik kꞌayew kariqitaj junoq kuya ribꞌ pa kamik pukꞌaxel jun chik lik jusukꞌ rubꞌinik usilabꞌik; tobꞌ ne laj kꞌo junoq kuya ranimaꞌ kakam pukꞌaxel junoq lik utz ukꞌuꞌx. 8 Noꞌj ri Dios uqꞌalajisam chi ri rutzil ukꞌuꞌx chiqawach riꞌoj, ma ri Cristo xkam paqakꞌaxel echiriꞌ kꞌa oj kꞌo ne pa mak. 9 We xꞌaniꞌ kꞌu jusukꞌ chiqe ruma rukikꞌel, makꞌuwariꞌ ruma Rire kojkolobꞌetaj na chwach ri qꞌatbꞌal tzij kuꞌan ri Dios chupa ri kꞌisbꞌal qꞌij. 10 E rojertan riꞌoj oj aj retzelal kꞌuꞌx chirij ri Dios; na rukꞌ ta kꞌu riꞌ, ri Dios xojuya chi utzil chomal chwach ruma rukamik Rukꞌajol. Makꞌuwariꞌ we oj kꞌo chi pa utzil chomal chwach, kayaꞌtaj na kꞌu riꞌ ri qakolobꞌetajik ruma ri Cristo, ma Rire xkꞌastaj lo chikixoꞌl ri ekaminaq yey woꞌora kꞌaslik. 11 Y na xew ta waꞌ, ma lik kojkiꞌkot rukꞌ ri Dios ruma ri Qanimajawal Jesucristo, ma ruma Rire qariqom utzil chomal chwach ri Dios.
Ri xukꞌam lo ri Adán e kamik y ri xukꞌam lo ri Cristo e kꞌaslemal
12 Ri mak xok lo che ruwachulew ruma ri Adán, ri nabꞌe achi; yey ri mak e xukꞌam lo ri kamik. Jekꞌulaꞌ xpe ri kamik pakiwi konoje ri tikawex, ma konoje xemakunik. 13 Echiriꞌ ri Dios kꞌamajaꞌ ne kuya Rutzij Upixabꞌ che ri Moisés, ri mak okinaq chi che ruwachulew. Qatzij, we na jinta taqanik, na utz taj kabꞌiꞌxik kꞌo junoq xupalajij tzij. 14 Na rukꞌ ta kꞌu riꞌ, chwi lo ri Adán kꞌa chwa ri Moisés, taq ri winaq xekam ruma ri kimak, tobꞌ ri kimak na junam ta rukꞌ ri xuꞌan ri Adán echiriꞌ xupalajij ri taqanik re ri Dios. Yey ri Adán e pachaꞌ ri Jun kakꞌunik, waꞌ e ri Jesucristo.*Ri Adán y ri Jesús kꞌo xkikꞌam lo che ruwachulew; ri Adán xukꞌam lo kamik, noꞌj ri Jesús xukꞌam lo kꞌaslemal.15 Pero ri xukꞌam lo ri palajibꞌal tzij re ri Adán lik junwi chwa ri sipanik xukꞌam lo ri Qanimajawal Jesucristo. Ma ruma rupalajibꞌal tzij jun chi achi, xekam konoje ri winaq; yey ruma kꞌu ri unimal rutzil ukꞌuꞌx jun chi Achi, ri sipanik re ri unimal rutzil ukꞌuꞌx ri Dios más ne xnimar pakiwi ukꞌiyal tikawex. 16 Ekꞌu ri xukꞌam lo ri mak re ri jun achi, lik junwi chwa ri xukꞌam lo ri sipanik kuya ri Dios chiqe. Ma ruma jun chi mak re jun chi achi, xkꞌun ri qꞌatbꞌal tzij pakiwi konoje ri tikawex. Noꞌj ruma ri sipanik re ri Dios, kasachisax uwach ri ukꞌiyal mak ke ri tikawex chaꞌ jelaꞌ utz kekꞌojiꞌ jusukꞌ chwach ri Dios. 17 Xa kꞌu ruma rupalajibꞌal tzij jun chi achi, konoje ri winaq xekanaj kan chuxeꞌ ruchuqꞌabꞌ ri kamik. Yey ruma kꞌu jun chi Achi, waꞌ e ri Qanimajawal Jesucristo, janipa ri kikꞌulum ri unimal rutzil ukꞌuꞌx ri Dios y ri sipanik re kebꞌuꞌan jusukꞌ chwach, kejeqiꞌ chupa jun chomilaj kꞌaslemal.
18 Ekꞌu ri palajibꞌal tzij re jun chi achi xukꞌam lo qꞌatbꞌal tzij pakiwi konoje ri tikawex, jekꞌuriꞌlaꞌ ruma ri jusukꞌ bꞌinik re jun chi Achi, kayaꞌtaj chike konoje ri tikawex jun chomilaj kꞌaslemal ruma ri ebꞌuꞌanom jusukꞌ chwach ri Dios. 19 Yey xa ruma kꞌu jun chi achi xupalajij rutzij ri Dios, lik e kꞌi ri xebꞌuꞌan aj makibꞌ; jekꞌuriꞌlaꞌ, ruma jun chi Achi xukoj utzij ri Dios, lik e kꞌi ri kebꞌuꞌan jusukꞌ chwach.
20 Ekꞌu ri Dios xuya Rutzij Upixabꞌ che ri Moisés chaꞌ jelaꞌ kaqꞌalajin rukꞌiyal uwach ri mak. Y e xuꞌano, ma rukꞌ wa Tzij xqꞌalajin rukꞌiyal kimak ri winaq chwach ri Dios. Yey ekꞌuchiriꞌ más xemakun ri winaq, e ne más xnimar ri unimal rutzil ukꞌuꞌx ri Dios pakiwiꞌ. 21 E jelaꞌ pachaꞌ ri mak kꞌo uchuqꞌabꞌ chaꞌ kukꞌam lo kamik pakiwi konoje ri winaq; jekꞌulaꞌ riꞌ ri unimal rutzil ukꞌuꞌx ri Dios kꞌo uchuqꞌabꞌ chaꞌ kuꞌan jusukꞌ chike ri winaq chwach ri Dios, y jelaꞌ kꞌo kikꞌaslemal na jinta utaqexik ruma Jesucristo, ri Qanimajawal.
