1 Kꞌulu alaq ri jun kꞌamajaꞌ kumaj usukꞌ saꞌ ri karaj ri Dios chike ri kubꞌul kikꞌuꞌx rukꞌ ri Cristo.[a] Machꞌoꞌjin alaq rukꞌ xa ruma na junam ta runaꞌoj rire rukꞌ ri naꞌoj ralaq. 2 Ma puwi ronoje ri yaꞌtalik re katijik, kꞌo ri kuchꞌobꞌ raqan utz katijiꞌ ronoje taq waꞌ yey kꞌo ri kꞌamajaꞌ kumaj usukꞌ rukꞌutunik ri Dios; y chwa kꞌu rire, kꞌo waꞌim e mak che jun we kutijo, y ruma kꞌu riꞌ xew kutij ichaj. 3 Ekꞌu riꞌ ri jun kutij ronoje, na utz taj we kukꞌaq bꞌi uqꞌij ri jun xa qꞌalaj ri kutijo. Yey ekꞌu ri jun xa qꞌalaj ri kutijo, na utz taj we kuqꞌat tzij puwi ri jun kutij ronoje. Ma e ri Dios kꞌuluyum ke waꞌ wa tikawex. 4 ¿Lal china rilal chaꞌ kuꞌan lal aj qꞌatal tzij puwi ri raj chak jun chik? Ma e ri rajaw kilowik we utz ri kuꞌano o na utz taj. Jekꞌulaꞌ puqꞌabꞌ ri Dios kꞌo wi kebꞌutoꞌ chikijujunal ri raj chak chaꞌ ketikiꞌ chi utz chwach yey kuꞌan waꞌ rukꞌ runimal uchuqꞌabꞌ.

5 Kꞌo ri kuchꞌobꞌo kꞌo qꞌij lik il uwach re yakbꞌal uqꞌij ri Dios chwach jujun chik qꞌij; yey kꞌo ri junam karil ronoje ri jujun qꞌij. Chikijujunal lik chirajawaxik ketikiꞌ chi utz che taq ri kakichꞌobꞌ raqan.[b] 6 Ekꞌu junoq lik kuꞌan il uwach che juna qꞌij, re yakbꞌal uqꞌij ri Qanimajawal kuꞌano. Yey e junoq chik na kuꞌan ta il uwach che waꞌ wa qꞌij, ma chwach rire ronoje qꞌij e re yakbꞌal uqꞌij ri Qanimajawal. Jekꞌulaꞌ, e ri jun kutij ronoje, kutijo re yakbꞌal uqꞌij ri Qanimajawal, ma kutioxij che ri Dios. Yey ri jun xa qꞌalaj ri kutijo, jelaꞌ kuꞌano ma kuchꞌobꞌo rukꞌ waꞌ kuyak uqꞌij ri Qanimajawal; y kutioxij kꞌu riꞌ che ri Dios.

7 Ma na jinta junoq chiqe xa pa re rire kꞌaslik y na jinta junoq xa pa re rire kakamik. Ma ri kꞌaslem y ri kamik puqꞌabꞌ ri Dios kꞌo wi. 8 We oj kꞌaslik, ri qakꞌaslem e re yakbꞌal uqꞌij ri Dios; yey we xojkamik, waꞌ re yakbꞌal uqꞌij ri Dios. Jekꞌulaꞌ, we oj kꞌaslik o we xojkamik, oj chi re ri Qajawal. 9 Ma ruma waꞌ ri Cristo xkamik y xkꞌastaj lo chikixoꞌl ri ekaminaq chaꞌ jelaꞌ kuꞌana Kajawal ri ekaminaq chik kukꞌ ri kꞌa e kꞌaslik.

10 Rilal, ri kaꞌan che ibꞌ la lal aj qꞌatal tzij puwi ri hermano la, ¿suꞌchak kaꞌan la waꞌ? O rilal, ri kakꞌaq bꞌi la uqꞌij ri hermano la, ¿suꞌchak kaꞌan la waꞌ? Ma qonoje kꞌo jun qꞌij kojeꞌtakꞌala na chwach ri qꞌatbꞌal tzij re ri Cristo. 11 Ma jewaꞌ ri tzꞌibꞌital kan chupa Ruchꞌaꞌtem ri Dios:

13 E uwariꞌche maqaꞌan chi oj qꞌatal tzij chiqibꞌil qibꞌ; mojuꞌan ne latzꞌanel o tzaqibꞌal che juna hermano. 14 Puwi ri yaꞌtalik re katijik, riꞌin lik wetaꞌam ruma ri Qanimajawal Jesús y lik nujikibꞌam kꞌu uwach waꞌ: Ronoje utz y na chꞌul taj chwach ri Dios. Noꞌj we kꞌo junoq kuchꞌobꞌo kꞌo ri katijik “chꞌul”, riꞌ xew chwach rire chꞌul wi.[d] 15 Yey we ruma ri katij la, kapaxij la ukꞌuꞌx ri hermano la, riꞌ ri katajin la che ukꞌutik na e ta chi ri rutzil kꞌuꞌxaj. Ruma kꞌu waꞌ, lik na ubꞌe taj xa ruma ri katij la, kꞌo junoq karesaj ribꞌ chirij ri Cristo yey ruma ne rire xkam ri Cristo. 16 Makꞌo kꞌu maꞌan alaq we rukꞌ waꞌ tzel kachꞌaꞌtibꞌex lo ri bꞌinik silabꞌik alaq, tobꞌ ne lik utz chiwach ralaq. 17 Yey chupa rutaqanik ri Dios ri lik chirajawaxik wi na e ta saꞌ ri waꞌim kaqatijo o saꞌ ri qayaꞌ kaqaqumu; ma e ri kojbꞌin jusukꞌ, ri kojkꞌojiꞌ chi utzil chomal y rukꞌ kiꞌkotemal ruma rutoꞌbꞌal ri Santowilaj Ruxlabꞌixel ri Dios. 18 Ma e ri jelaꞌ kakiloqꞌnimaj ri Cristo, ri kibꞌinik kisilabꞌik kukꞌul ukꞌuꞌx ri Dios y chom kꞌu kilitaj kuma ri tikawex.

19 E uwariꞌche, e qataqej janipa ri kojukꞌam bꞌi chi utzil chomal y kuya qakꞌiyibꞌal chwach ri Dios, chaꞌ jelaꞌ kaqatoꞌ qibꞌ chiqawach. 20 Mawulij kꞌu alaq ri chak uꞌanom ri Dios pa ranimaꞌ junoq xa ruma ri waꞌim katij alaq. Qatzij, ronoje ri yaꞌtalik re katijik, na chꞌul taj. Pero na utz taj we ketzaq jujun pa mak xa ruma ri kaqatijo. 21 Más utz we na kaqatij ta tiꞌij, na kaqatij ta vino y makꞌo ne maqaꞌano, we ruma waꞌ juna hermano kasach unaꞌoj, katzaq pa mak o kaqꞌobꞌ ruchuqꞌabꞌ chwach ri Dios. 22 We jikibꞌam la uwach lik utz ri katajin la che uꞌanik chwach ri Dios, riꞌ lik utz; pero más utz we waꞌ kakanajik xew chwach ri Dios y rilal. Lik nim uqꞌij ralaxik ri jun kunaꞌ chukꞌuꞌx lik utz ri kuꞌan chwach ri Dios, ma jelaꞌ na kajawax ta che kuqꞌat tzij puwiꞌ chiribꞌil ribꞌ. 23 Noꞌj we junoq xa kebꞌ upa kutij ri katajin che, riꞌ utukel kukꞌam lo qꞌatbꞌal tzij puwiꞌ ma na kubꞌul ta ukꞌuꞌx rukꞌ ri kuꞌano. Ma e janipa ri kuꞌan junoq yey na kuꞌan ta rukꞌ kubꞌulibꞌal ukꞌuꞌx, riꞌ kamakunik.

<- Romanos 13Romanos 15 ->