1 Tekꞌuchiriꞌ, xinwilo echiriꞌ jun ángel xqaj lo chilaꞌ chikaj, yey waꞌ rukꞌaꞌam lo ri lawe re ri siwan na jinta utaqexik uchoyil upa y rukꞌaꞌam lo jun nimalaj karena puqꞌabꞌ. 2 Wa jun ángel xuchꞌij uchuqꞌabꞌ ri dragón, waꞌ e ri kumatz re ojertan,*Gn. 3:1 ritzel winaq Satanás rubꞌiꞌ. Xuyut kꞌu riꞌ chaꞌ kayaꞌiꞌ pa karena mil junabꞌ, 3 xukꞌaq bꞌi chupa wa siwan, xutzꞌapij uchiꞌ y xukoj kꞌu rusello chwi ri tzꞌapibꞌal chaꞌ ritzel winaq na kebꞌusok ta chi taq ri tinamit kꞌa echiriꞌ kukꞌis na ri mil junabꞌ ximitalik. Kꞌisbꞌal kꞌu re waꞌ, kayolopix chi jujun qꞌij.

4 Tekꞌuchiriꞌ, xinwil ukꞌiyal tzꞌulibꞌal re taqanik yey wa etzꞌul chupa yaꞌtal pakiqꞌabꞌ ketaqanik. Y xebꞌenuwil konoje ri tikawex xkꞌatzix kijolom ruma xkitzijoj ri Utzilaj Tzij re ri Qanimajawal Jesucristo y Rutzij ri Dios; waꞌ e taq ri na xkixukubꞌaꞌ ta kibꞌ chwach ri nimalaj itzel chikop y chwach ri jun ukꞌaxwach y na xkikꞌul ta ri retalil ri nimalaj itzel chikop che rukurusil ri kipalaj o che ri kiqꞌabꞌ. Rike xekꞌastajik y junam rukꞌ ri Cristo xetaqan mil junabꞌ. 5 E nabꞌe kꞌastajibꞌal waꞌ. Noꞌj ri nikꞌaj chik ekaminaq kꞌate kekꞌastajik echiriꞌ ikꞌowinaq chi ri mil junabꞌ. 6 Lik nim kiqꞌij kalaxik ri kekꞌastaj lo che wa nabꞌe kꞌastajibꞌal, ma rike e utinamit ri Dios. Ekꞌu rukaꞌm kamik na jinta chi uchuqꞌabꞌ pakiwiꞌ, yey kebꞌuꞌana kꞌu e aj chakunel chwach ri Dios y chwach ri Cristo y junam rukꞌ Rire ketaqan mil junabꞌ.

7 Echiriꞌ ikꞌowinaq chi ri mil junabꞌ, ri Satanás kayolopix lo pa ri luwar pa tzꞌapil wi. 8 Y kel bꞌi che kisokosoꞌxik taq ri tinamit e kꞌo che ronoje ruwachulew, jenelaꞌ kuꞌan chike ri Gog y ri Magog,*Ez. 38:1–39:6 chaꞌ kumol kichiꞌ re pa chꞌaꞌoj. Ri kajlibꞌal taq waꞌ e pachaꞌ rukꞌiyal ri sanyebꞌ kꞌo chuchiꞌ ri mar. 9 Y xepe kꞌu che ronoje ruwachulew y xkisut rij ri tinamit lik kꞌax kunaꞌ ri Dios, waꞌ e luwar pa kimolom wi kibꞌ ri lik kiyaꞌom kibꞌ puqꞌabꞌ Rire. Pero ri Dios xutaq lo aqꞌ chikaj pakiwi ri eyaktajinaq chirij rutinamit, y xebꞌuporoj kꞌu konoje.

10 Ekꞌu ritzel winaq, ri xebꞌusok taq ri tinamit, xkꞌaq bꞌi chupa ri jun luwar kayenen che aqꞌ y kajinow rukꞌ azufre, chiriꞌ pa e kꞌo wi ri nimalaj itzel chikop y ri jun qꞌalajisanel sokosoꞌnel; y chipaqꞌij chichaqꞌabꞌ kekꞌojiꞌ pa kꞌax na jinta chi utaqexik.

11 Tekꞌuchiriꞌ, xinwil jun nimalaj tzꞌulibꞌal lik saq y xinwil ri Jun tzꞌul chupa. Yey ekꞌu laꞌ chwach Rire, e ruwachulew y ruwa kaj xemalkaꞌnik y na xilitaj ta chi kiwach. 12 Y xinwil kiwach ri ekaminaq chinimaꞌq chichꞌutiꞌq e takꞌal chwach ri Dios. Tekꞌuchiriꞌ xjaqataj upa taq ri libros yey xjaqataj upa jun chik libro, waꞌ e ri libro re kꞌaslemal. Chupa taq wa libros tzꞌibꞌital wi taq ri kiꞌanom ri ekaminaq, y ekꞌu chirij taq waꞌ xqꞌat tzij pakiwiꞌ. 13 Ri mar xebꞌutzelej lo ri ekaminaq e kꞌo chupa; ri rajaw ri kamik y ri rajaw ri Hades*Ap. 6:8 xekitzelej lo ri ekaminaq e kꞌo kukꞌ; y xqꞌat kꞌu tzij pakiwiꞌ chikijujunal e chirij taq ri kiꞌanom. 14 Ekꞌu ri rajaw ri kamik y ri rajaw ri Hades xekꞌaq bꞌi chupa ri jun luwar kayenen che aqꞌ. Waꞌ e ri ukaꞌm kamik. 15 Chupa kꞌu waꞌ wa jun luwar xekꞌaq bꞌi ri na tzꞌibꞌital ta kibꞌiꞌ chupa ri libro re kꞌaslemal.

<- Apocalipsis 19Apocalipsis 21 ->