Apocalipsis 15

Ri ángeles kakikꞌam lo wuqubꞌ kꞌaxkꞌobꞌik

1 Xinwil jun chik nimalaj kꞌutubꞌal chilaꞌ chikaj yey waꞌ lik na jinta kꞌana kꞌo wi: E wuqubꞌ ángeles kakikꞌam lo ri wuqubꞌ kꞌisbꞌal kꞌaxkꞌobꞌik; yey rukꞌ waꞌ kakꞌis wi ri royowal ri Dios.

2 Tekꞌuchiriꞌ, xinwil jun mar katzuꞌn pachaꞌ vidrio yey kawon aqꞌ chupa. Konoje ri na xesokotaj ta ruma ri nimalaj itzel chikop, na xexukiꞌ tane chwach ri jun ukꞌaxwach y na xkiya tane luwar kakoj chike ri retalil re ri rajlibꞌal rubꞌiꞌ ri nimalaj itzel chikop, konoje rike e takꞌal chwi ri mar katzuꞌn pachaꞌ vidrio y kukꞌaꞌam ri ki arpa yaꞌtal chike ruma ri Dios. 3 E kakibꞌixoj kꞌu ri bꞌix re ri Moisés[a] ri raj chak ri Dios y kakibꞌixoj ri bꞌix re ri Qꞌapoj Bꞌexex, jewaꞌ kakibꞌiꞌij:

Lal Dios Qajawxel, ri kꞌo ronoje unimal chuqꞌabꞌ paqꞌabꞌ la.

Lik nimaꞌq y lik chomilaj taq ri chak ꞌanom la,

lik jusukꞌ y lik usukꞌ ronoje ri kaꞌan la,

Lal ri Taqanel pakiwi taq ri tinamit.

4 ¿Kꞌo nawi junoq na kuxiꞌij ta ribꞌ chiwach la, Lal Qajawal?

¿Y kꞌo nawi junoq na kuyak ta uqꞌij ri bꞌiꞌ la?

Ma xew Rilal lik Lal santo.

E uwariꞌche konoje taq ri tinamit che ruwachulew

kekꞌunik y koꞌlkiloqꞌnimaj qꞌij la,

ma qꞌalajisam la ri jusukꞌ qꞌatbꞌal tzij la pakiwiꞌ

kechaꞌ.

5 Tekꞌuchiriꞌ, xinwilo echiriꞌ xteqꞌebꞌax ri Rocho Dios chilaꞌ chikaj pa kꞌo wi ri kaxa re ri tzij uꞌanom ri Dios kukꞌ rutinamit.[b] 6 Chupa kꞌu ri Rocho Dios xebꞌel lo wuqubꞌ ángeles, ri yaꞌtal chike kekiya pa kꞌaxkꞌobꞌik taq ri winaq che ruwachulew. Kikojom kꞌu kiqꞌuꞌ ꞌanatal rukꞌ kꞌul lino yey waꞌ lik saq y lik kawonik, yey chwa kikꞌuꞌx kojotal jun pas re oro. 7 Jun kꞌu chike ri kajibꞌ kꞌo kikꞌaslemal pachaꞌ e ángeles[c] xuya chike ri wuqubꞌ ángeles jujun copas re oro nojinaq che ri royowal ri Dios, ri na jinta utaqexik rukꞌaslemal. 8 Ekꞌu ri Rocho Dios xnoj che sibꞌ ruma runimal uchomalil y ruchuqꞌabꞌ ri Dios. Nabꞌe na kꞌut kikꞌow wa wuqubꞌ kꞌaxkꞌobꞌik kikꞌamom lo ri wuqubꞌ ángeles, kꞌa ekꞌuchiriꞌ utz kok junoq pa ri Rocho Dios.

<- Apocalipsis 14 Apocalipsis 16 ->