Marcos 11

Ri winaq kakiyak uqꞌij ri Jesús echiriꞌ kok Jerusalem

(Mt. 21:1-11; Lc. 19:28-40; Jn. 12:12-19)

1 Ri Jesús kukꞌ rutijoꞌn xa naqaj chi e kꞌo lo che ri tinamit Jerusalem, ya e riꞌ kebꞌopon chwach ri juyubꞌ Olivos pa taq raldeas Betfagé y Betania. Ekꞌuchiriꞌ, ri Jesús xebꞌutaq bꞌi kaꞌibꞌ chike rutijoꞌn chaꞌ kenabꞌej apanoq, 2 jewaꞌ xubꞌiꞌij chike:

—Jix pa raldea kꞌo pan chiqawach. Xew kꞌu kixoponik, kiꞌriqa jun qꞌapoj buru yuqulik. Waꞌ na jinta junoq kojoyom re. Chikiraꞌ y chikꞌama loq. 3 We kꞌo kꞌu junoq kutzꞌonoj chiwe: “¿Suꞌchak kiꞌan waꞌ?”, chibꞌiꞌij che: “Rawaj kajawax che ri Qajawal, yey kꞌate kutaq tanchi uloq” —kixchaꞌ.

4 Xebꞌek kꞌut y xkiriq ri qꞌapoj buru yuqubꞌam pa bꞌe chunaqaj jun puerta. Ewi xkikir loq. 5 Jujun kꞌu chike ri e kꞌo chiriꞌ xkitzꞌonoj:

—¿Saꞌ ri kiꞌano? ¿Suꞌbꞌe kikir ri qꞌapoj buru? —xechaꞌ.

6 Rike e xkibꞌiꞌij janipa ri bꞌiꞌim bꞌi chike ruma ri Jesús; ewi xyaꞌ lo chike xkikir loq. 7 Xkikꞌam kꞌu lo ri qꞌapoj buru y xkirip ri kimanta*“Manta” e jun kꞌul kakikoj ri aj Israel re ojertan, tobꞌ achijabꞌ o ixoqibꞌ, pachaꞌ poꞌt wokaꞌj re karabꞌexik. chirij. Ekꞌu ri Jesús xukoj bꞌi.

8 Ukꞌiyal winaq xkiwiq ri bꞌe pa kikꞌow wi ri Jesús, xkilikꞌ taq ri kimanta pa ri bꞌe; yey e kꞌo jujun chik xkiqꞌat raltaq ko uqꞌabꞌ cheꞌ y xkilem pa la bꞌe re yakbꞌal uqꞌij. 9 Ri winaq e nabꞌejinaq chwach kukꞌ ri eteran lo chirij xkijeqo lik kesikꞌinik, kakibꞌiꞌij:

«¡Qayaka uqꞌij!

¡Nim uqꞌij ralaxik ri jun petinaq chupa rubꞌiꞌ ri Dios Qajawxel!*

10 ¡Nim uwach uqꞌij ri taqanik re ri qamam David kakꞌun loq!

¡Qayaka uqꞌij ri Dios kꞌo chilaꞌ chikaj!»

kechaꞌ.

11 Xopon kꞌu ri Jesús Jerusalem y xok chupa ri Rocho Dios. Xa xril kꞌu ronoje saꞌ taq ri kꞌo chupa; pero ruma ya e riꞌ kok raqꞌabꞌ, xeꞌek Betania kukꞌ ri kabꞌlajuj utijoꞌn.

Ri Jesús kuchaqisaj jun cheꞌ re higo

(Mt. 21:18-19)

12 Chukaꞌm qꞌij kꞌut echiriꞌ xebꞌel bꞌi Betania, ri Jesús xpe numik che. 13 Y chinimanaj xril pana jun cheꞌ re higo lik kꞌo uxaq. Ewi xeꞌek xeꞌrilaꞌ we kꞌo ujiqꞌobꞌalil kuriqo. Yey echiriꞌ xopon rukꞌ, na jinta kꞌo xuriq che, xew ruxaq kꞌolik, ma na uqꞌijol taj kꞌo uwach ri higos. 14 Ewi ri Jesús xubꞌiꞌij che ri cheꞌ re higo:

—Na jinta chi kꞌana junoq kutij jiqꞌobꞌal chawe —xchaꞌ. Yey wa xubꞌiꞌij, xkita rutijoꞌn.

Ri Jesús kebꞌeresaj bꞌi raj kꞌay chupa ri Rocho Dios

(Mt. 21:12-17; Lc. 19:45-48; Jn. 2:13-22)

15 Xebꞌopon kꞌu Jerusalem y echiriꞌ xok bꞌi ri Jesús chupa ri Rocho Dios, xujeq lo kesaxik konoje ri kekꞌayinik y ri keloqꞌow chupa. Yey xuxulkꞌatilaꞌ taq bꞌi ri mexa ke ri e aj jachal uwach puaq y taq ri xila ke ri e aj kꞌay palomax. 16 Y na xuya ta luwar che junoq kꞌo rukꞌaꞌam kikꞌow pa ri Rocho Dios xa re kuqꞌat ubꞌe. 17 Xujeq kꞌu kakꞌutun chikiwach, jewaꞌ kubꞌiꞌij:

«¿Na etaꞌam ta nebꞌa alaq ri tzꞌibꞌital kan chupa Ruchꞌaꞌtem ri Dios? Ma ri Dios kubꞌiꞌij:

Che ri Wocho kabꞌiꞌxik:

“E luwar re oración

ke konoje taq ri tinamit che ruwachulew” Is. 56:7

kachaꞌ. Noꞌj ralaq, ꞌanom alaq che ri Wocho e jun luwar ke eleqꞌomabꞌ»* xchaꞌ.

18 Waꞌ xkita raj kꞌutunel re ri tzijpixabꞌ y ri nimaq e aj chakunel pa Rocho Dios. Ruma kꞌu riꞌ, kakitzukuj saꞌ uꞌanik kakikamisaj ma kakixiꞌij kibꞌ che ruma konoje ri winaq lik kakam kanimaꞌ che taq rukꞌutunik.

19 Ekꞌuchiriꞌ xok raqꞌabꞌ, ri Jesús xel bꞌi chupa ri tinamit.

Ri cheꞌ re higo chaqijinaq chik

(Mt. 21:19-22)

20 Chukaꞌm qꞌij anim echiriꞌ xebꞌikꞌow ri Jesús kukꞌ rutijoꞌn pa kꞌo wi ri cheꞌ re higo, xkilo chaqijinaq lo kꞌa pa ratzꞌayaq. 21 Ewi ri Pedro xkꞌun lo chukꞌuꞌx taq ri chꞌaꞌtem xubꞌiꞌij kan ri Jesús che ri cheꞌ. Xubꞌiꞌij kꞌu riꞌ che ri Jesús:

—Wajawal, chilape la, ri cheꞌ re higo ri xbꞌiꞌij la che na kuya ta chi ujiqꞌobꞌalil,* waꞌ chaqijinaq chik —xchaꞌ.

22 Ri Jesús xukꞌul uwach:

—Lik kubꞌula ikꞌuꞌx rukꞌ ri Dios; 23 ma paqatzij wi kambꞌiꞌij chiwe: China junoq kabꞌiꞌn che wa jun juyubꞌ: “Chatela wara y jateꞌkꞌola chupa ri mar” yey lik kujikibꞌaꞌ kꞌu ukꞌuꞌx che la xubꞌiꞌij, riꞌ lik e kuꞌanaꞌ. 24 Uwariꞌche kambꞌiꞌij chiwe: E janipa ri kitzꞌonoj che ri Dios yey kubꞌul kꞌu ikꞌuꞌx che kayaꞌtaj na chiwe, kikꞌul na kꞌu riꞌ.

25 Jekꞌulaꞌ, echiriꞌ kiꞌan orar, we kꞌo chikꞌuꞌx ri makunik re junoq chiwij, chikuyu umak chaꞌ jelaꞌ ri Qaqaw kꞌo chilaꞌ chikaj kukuy imak riꞌix. 26 Ma we riꞌix na kikuy ta umak junoq, jekꞌulaꞌ kuꞌan ri Qaqaw Dios kꞌo chilaꞌ chikaj, na kukuy ta imak riꞌix —xchaꞌ.

China xyaꞌw puqꞌabꞌ ri Jesús kataqanik

(Mt. 21:23-27; Lc. 20:1-8)

27 Xebꞌopon tanchi Jerusalem ri Jesús kukꞌ rutijoꞌn. Y echiriꞌ kabꞌin chupa ri Rocho Dios, ri nimaq e aj chakunel kukꞌ raj kꞌutunel re ri tzijpixabꞌ y ri nimaq winaq re ri tinamit, xeqibꞌ rukꞌ. 28 Xkitzꞌonoj kꞌu che:

—¿China xyaꞌw paqꞌabꞌ la kaꞌan taq la waꞌ?* ¿China xtaqaw la che kaꞌan taq la waꞌ? —xechaꞌ.

29 Ri Jesús xukꞌul uwach:

—Riꞌin kanꞌan jun tzꞌonobꞌal che alaq. We xkꞌul alaq uwach, kambꞌiꞌij kꞌu riꞌ che alaq china yaꞌyom panuqꞌabꞌ kanꞌan waꞌ. 30 ¿China kꞌu xtaqaw re ri Juan kuya ri bautismo? ¿E ri Dios o e rachijabꞌ? Kꞌulu alaq uwach —xchaꞌ.

31 Ekꞌu rike xkijeq kechꞌaꞌt chikiwach puwi waꞌ: «We xqakꞌul uwach che: “E ri Dios xtaqaw re,” riꞌ kubꞌiꞌij rire chiqe: “¿Suꞌchak kꞌu riꞌ na xkoj ta alaq ri xubꞌiꞌij?” kacha chiqe. 32 ¿Yey we xqabꞌiꞌij xa achijabꞌ xetaqaw re...?» xecha chikiwach. Yey lik kakixiꞌij kibꞌ chike ri winaq, ma konoje kakichꞌobꞌo ri Juan e jun saqil qꞌalajisanel re ri Dios. 33 Xkibꞌiꞌij kꞌu che ri Jesús:

—Na qetaꞌam taj —xechaꞌ.

Ekꞌu ri Jesús xubꞌiꞌij chike:

—Jekꞌuriꞌlaꞌ, riꞌin na kambꞌiꞌij ta che alaq china yaꞌyom panuqꞌabꞌ kanꞌan taq waꞌ —xchaꞌ.

<- Marcos 10 Marcos 12 ->