Mateo 6

Ri Jesús kakꞌutun chwi ri limoxna

1 »Miꞌan ri kikꞌut ri jusukꞌ ibꞌinik isilabꞌik chiwachil xa re kixilitaj kuma ri tikawex;[a] ma we jelaꞌ kiꞌano, na jinta rajil ukꞌaxel kikꞌul che Riqaw Dios kꞌo chilaꞌ chikaj. 2 E uwariꞌche, echiriꞌ kiya limoxna che juna nibꞌaꞌ, mitzijoj chike ri tikawex, pachaꞌ ri kakiꞌan ri xa kebꞌ kipalaj pa taq sinagogas y pa taq bꞌe. Ma rike jelaꞌ kakiꞌano xew chaꞌ kayak kiqꞌij. Noꞌj riꞌin paqatzij wi kambꞌiꞌij chiwe: Rukꞌ kꞌu wa yakbꞌal kiqꞌij, ya e laꞌ xkikꞌul ri rajil ukꞌaxel ri xkiꞌano. 3 E uwariꞌche, echiriꞌ kiya limoxna chike ri nibꞌaꞌibꞌ, miꞌan chiwachil. 4 Jekꞌulaꞌ na jinta kꞌo kanaꞌbꞌen re, xew Riqaw Dios ketaꞌman waꞌ. Ekꞌu Rire kuya na ri rajil ukꞌaxel chiwe.

Ri Jesús kakꞌutun chwi ri oración

(Lc. 11:1-13)

5 »Echiriꞌ kixchꞌaꞌt rukꞌ ri Dios, miꞌan iweꞌix pachaꞌ ri kakiꞌan ri xa kebꞌ kipalaj. Ma rike lik kukꞌul kikꞌuꞌx ri kakibꞌololej oración e laꞌ e takꞌal pa taq sinagogas y pa taq jachbꞌal bꞌe chaꞌ jelaꞌ kebꞌilitaj kuma ri tikawex. Noꞌj riꞌin paqatzij wi kambꞌiꞌij chiwe: Rukꞌ kꞌu wa yakbꞌal kiqꞌij, ya e laꞌ xkikꞌul ri rajil ukꞌaxel ri xkiꞌano. 6 Noꞌj riꞌix echiriꞌ kixchꞌaꞌt rukꞌ ri Dios, chixok pa ja, chitzꞌapij lo ri puerta y chixchꞌaꞌt rukꞌ Riqaw Dios xa itukel; jekꞌulaꞌ Riqaw Dios karil ri kiꞌan xa itukel y kuya na kꞌu ri rajil ukꞌaxel chiwe chiwachil.

7 »Ekꞌuchiriꞌ kixchꞌaꞌt rukꞌ ri Dios, miwererej chꞌaꞌtem ukꞌiyal laj pachaꞌ kakiꞌan ri na ketaꞌam ta uwach ri Dios; ma e kakichꞌobꞌ rike ruma ri kakiwererej chꞌaꞌtem, ketataj ruma ri Dios. 8 Miꞌan kꞌu iweꞌix pachaꞌ ri kakiꞌan rike, ma Riqaw Dios lik retaꞌam chik saꞌ ri kajawax chiwe echiriꞌ kꞌamajaꞌ ne kitzꞌonoj che.

9 »Ekꞌu riꞌix echiriꞌ kixchꞌaꞌt rukꞌ ri Dios utz jewaꞌ taq ri kibꞌiꞌij:

Qaqaw Dios, Lal kꞌo la chilaꞌ chikaj,

¡lik chetaꞌmaxoq nim uqꞌij ri bꞌiꞌ la!

10 Peta la, taqana la paqawiꞌ;

chuꞌana kꞌu ri rajawal kꞌuꞌx la wara che ruwachulew,

jelaꞌ pachaꞌ ri kaꞌan chilaꞌ chikaj.

11 Yaꞌa ko la waqꞌij ri qawa,

ri kajawax chiqe ronoje qꞌij.

12 Kuyu ko la qamak,

jelaꞌ pachaꞌ riꞌoj kaqakuy kimak ri emakuninaq chiqij.

13 Y maya ko la luwar chiqe kojtzaq pa mak;

e lik chojkolobꞌej la chwach ritzel winaq.

Ma paqꞌabꞌ Rilal kꞌo wi ronoje taqanik y chuqꞌabꞌ;

y xew che Rilal taqal wi ri yakbꞌal qꞌij na jinta utaqexik. Amén.

14 »Ma we riꞌix kikuy kimak taq ri tikawex, jekꞌulaꞌ riꞌ kuꞌan ri Qaqaw Dios kꞌo chilaꞌ chikaj, kukuy imak riꞌix. 15 Noꞌj we riꞌix na kikuy ta kimak taq ri tikawex, jekꞌulaꞌ riꞌ kuꞌan ri Qaqaw Dios, na kukuy ta imak riꞌix.[b]

Ri Jesús kakꞌutun chwi ri ayuno

16 »Echiriꞌ riꞌix kiꞌan ayuno, mikꞌut bꞌis che ripalaj pachaꞌ ri kakiꞌan ri xa kebꞌ kipalaj. Ma rike kakiꞌan waꞌ xa pachaꞌ kebꞌilitaj kuma ri winaq. Paqatzij wi kambꞌiꞌij chiwe: Rukꞌ kꞌu wa yakbꞌal kiqꞌij, ya e laꞌ xkikꞌul ri rajil ukꞌaxel ri xkiꞌano. 17 Noꞌj riꞌix echiriꞌ kiꞌan ayuno, chichꞌaja ripalaj y chixiya riwiꞌ chi utz. 18 Jekꞌulaꞌ ri tikawex na kakil taj we riꞌix ix kꞌo pa ayuno. Xew kꞌu Riqaw Dios, ri na kilitaj ta uwach, karil ri na kakil ta ri tikawex. Ekꞌu riꞌ Rire kayaꞌw na ri rajil ukꞌaxel chiwe.

Ri bꞌeyomalil re chilaꞌ chikaj

(Lc. 12:32-34)

19 »Mixchakun xa re kimol ukꞌuꞌxibꞌal bꞌeyomalil re ruwachulew, ma ri wara e taq ri ikꞌolom xa kapokꞌirik y kuꞌan mojos, yey kebꞌok ne eleqꞌomabꞌ che releqꞌaxik bꞌi. 20 We kiwaj kiriq ri saqil bꞌeyomalil, e chiꞌana wara che ruwachulew janipa ri lik kꞌo uchak chwach ri Dios chaꞌ jelaꞌ kꞌo kutiqoj chiwe riꞌix chilaꞌ chikaj. Ma ri ikꞌolom chilaꞌ na kapokꞌir taj y na kuꞌan ta mojos, yey na jinta ne eleqꞌomabꞌ kebꞌok che releqꞌaxik bꞌi. 21 Ma pa kꞌo wi ribꞌeyomalil riꞌix, puwi waꞌ keꞌek wi ikꞌuꞌx.

Ri kꞌambꞌal naꞌoj puwi ri qawach

(Lc. 11:33-36)

22 »Ri qawach e pachaꞌ candil re ri qacuerpo, ma ruma waꞌ kojtzuꞌnik chaꞌ utz kojbꞌinik. Jekꞌulaꞌ, we ri qawach utz uꞌanom, ronoje ri qacuerpo nojinaq che qꞌijsaq y kaqil kꞌu ronoje chi utz. 23 Noꞌj we ri qawach na utz taj, ronoje ri qacuerpo kꞌo pa qꞌequꞌm. Jekꞌulaꞌ, we ri qꞌijsaq kꞌo qukꞌ uꞌanom junam rukꞌ ri qꞌequꞌm, ¡koꞌl chi lo qꞌequꞌmalil riꞌ oj kꞌo wi![c]

Ri Jesús kakꞌutun chwi ri puaq

(Lc. 16:13)

24 »Lik kꞌayew we juna aj chak e kaꞌibꞌ ri rajaw. Ma laj tzel karil ri jun yey kꞌax kunaꞌ ri jun chik; o laj kuyak uqꞌij ri jun yey kukꞌaq bꞌi uqꞌij ri jun chik. Ruma kꞌu laꞌ, na utz taj we junoq kuya ribꞌ che unimaxik ri Dios yey kuya ribꞌ che utzukuxik ri bꞌeyomalil re ruwachulew.

Ri Dios kebꞌuchajij ri ralkꞌoꞌal

(Lc. 12:22-31)

25 »E uwariꞌche kambꞌiꞌij chiwe riꞌix: Mubꞌisoj ikꞌuꞌx rikꞌaslem; mubꞌisoj ne ikꞌuꞌx saꞌ riwa y rimiqꞌinaꞌ kitijo o saꞌ riqꞌuꞌ kikojo. ¿Na e ta nebꞌa más kꞌo uwach rikꞌaslem riꞌix chwach ri kitijo? ¿Yey na e ta nebꞌa más kꞌo uwach ri cuerpo chwach riqꞌuꞌ kikojo?

26 »Chebꞌiwilape ri tzꞌikin kexikꞌikꞌ che ruwa kaj. Rike na ketikoꞌnaj taj, na kakiꞌan tane kimolonik y na jinta ne pa kakikꞌol wi ri kimolonik. Na rukꞌ ta kꞌu riꞌ, Riqaw Dios kꞌo chilaꞌ chikaj kebꞌutzuqu. ¡Makꞌuwariꞌ riꞌix, ri Dios kixuchajij, ma e más kꞌo iwach riꞌix chikiwa ri tzꞌikin!

27 »¿Kꞌo nebꞌa junoq chiwe riꞌix kuriq kunajtirisaj jun chik qꞌij che rukꞌaslem wara che ruwachulew? Na jinta junoq, tobꞌ ne lik kutij uqꞌij che. 28 ¿Suꞌbꞌe kꞌu riꞌ lik kubꞌisoj ikꞌuꞌx riqꞌuꞌ kikojo? Chiwilapeꞌ suꞌanik kekꞌiy ri kotzꞌiꞌj pa taq juyubꞌ; waꞌ na kechakun taj y na kekeman ta nenareꞌ chaꞌ kakiꞌan ri kiqꞌuꞌ. 29 Yey riꞌin kambꞌiꞌij chiwe: Ri rey Salomón, tobꞌ lik kꞌo uchomal ruqꞌuꞌ xukojo, waꞌ na xumaj ta kꞌana ruchomalil taq ri kotzꞌiꞌj. 30 Jekꞌulaꞌ we ri Dios uꞌanom chom che ri aqꞌes kꞌo waqꞌij pa juyubꞌ yey chweꞌq xa kaporox pa aqꞌ, ¿na kuya ta kami riꞌ ri Dios riqꞌuꞌ kajawax chiwe? ¡Riꞌix lik xa jubꞌiqꞌ ri kubꞌulibꞌal ikꞌuꞌx rukꞌ ri Dios!

31 »Kambꞌiꞌij kꞌu chiwe: Mubꞌisoj ikꞌuꞌx y mibꞌiꞌij: “¿Saꞌ ri qawa, saꞌ ri qamiqꞌinaꞌ kaqatijo? ¿Saꞌ ri qaqꞌuꞌ kaqakojo?” 32 Ma jenelaꞌ kakiꞌan ri winaq na ketaꞌam ta uwach ri Dios, e kubꞌisoj kikꞌuꞌx taq waꞌ. Noꞌj riꞌix kꞌo jun Iqaw chilaꞌ chikaj lik retaꞌam kajawax ronoje taq waꞌ chiwe.

33 »Ri lik chirajawaxik chiwe nabꞌe e lik chixok il che rutaqanik ri Dios y che ri jusukꞌ bꞌinik silabꞌik karaj Rire chiwe. Yey ronoje taq kꞌu ri kajawaxik, xa uwiꞌ chik kayaꞌtaj chiwe. 34 Mubꞌisoj pan ikꞌuꞌx ri kiwil chweꞌq, ma chujujunal qꞌij ukꞌamom chi lo rukꞌayewal.

<- Mateo 5 Mateo 7 ->