1 Ri Jesús xalax chilaꞌ Belén re Judea echiriꞌ e rey ri Herodes. Xebꞌopon kꞌu Jerusalem jujun achijabꞌ e petinaq pa relebꞌal lo ri qꞌij. Rike lik kꞌo kinaꞌoj puwi taq ri chꞌumil. 2 Jekꞌuwaꞌ kakibꞌiꞌij:

—¿Pa kꞌo wi ri rey ke raj judiꞌabꞌ alaxinaq? Ma riꞌoj xqil ruchꞌumil kꞌa pa relebꞌal lo ri qꞌij; yey e waꞌ oj petinaq chaꞌ koꞌlqaloqꞌnimaj uqꞌij —kechaꞌ.

3 Echiriꞌ xuta waꞌ ri rey Herodes, lik xsach unaꞌoj che y jelaꞌ xkikꞌulumaj konoje ri winaq e aj Jerusalem. 4 Xumol kꞌu kichiꞌ konoje ri nimaq e aj chakunel pa Rocho Dios kukꞌ raj kꞌutunel re ri tzijpixabꞌ y xutzꞌonoj kꞌu chike pa kalax wi ri Cristo, Ruchaꞌoꞌn lo ri Dios. 5 Rike xkibꞌiꞌij che:

—Ri Cristo kalax pa raldea Belén re Judea, ma jewaꞌ utzꞌibꞌam kan ri qꞌalajisanel chupa Ruchꞌaꞌtem ri Dios:

—Oj alaq y lik tzukuj alaq chi utz ri ralko akꞌa. We xriq kꞌu alaq, koꞌlbꞌiꞌij alaq chwe pa kꞌo wi chaꞌ jelaꞌ kinꞌek riꞌin y kiꞌnloqꞌnimaj uqꞌij —xchaꞌ.

9 Tekꞌuchiriꞌ rachijabꞌ e aj naꞌoj xkita ri xubꞌiꞌij ri rey, xkimaj chubꞌi ri kibꞌe. Ekꞌu ri chꞌumil kilom lo kꞌa pa relebꞌal lo ri qꞌij, nabꞌe bꞌi chikiwach y xtakꞌiꞌ kꞌu chwi ri luwar pa kꞌo wi ri ralko akꞌa. 10 Rike echiriꞌ xkil ri chꞌumil, lik xekiꞌkot che. 11 Ekꞌuchiriꞌ xebꞌok pa ri ja, xkil ri ralko akꞌa rukꞌ ruchu María. Xexukiꞌik y xkiloqꞌnimaj uqꞌij. Xkijaq kꞌu uchiꞌ ri kikaxa y xkiya taq sipanik che, waꞌ re oro, re incienso y re mirra lik kiꞌ ruxlabꞌ. 12 Chaqꞌabꞌ kꞌu riꞌ, xqꞌalajisax chike pa wachikꞌ na ketzelej ta chi pa kꞌo wi ri Herodes. Ruma kꞌu riꞌ, xetzelej pa kitinamit pa jun chik bꞌe.

13 Echiriꞌ rachijabꞌ e aj naꞌoj ebꞌelinaq chubꞌi rukꞌ ri Jesús, xukꞌut ribꞌ jun ángel re ri Dios pa uwachikꞌ ri José y xubꞌiꞌij che: «Chatyaktajoq, chebꞌakꞌama bꞌi rakꞌa y ruchu. Chixanimaj bꞌi kꞌa Egipto y chixkanaja chilaꞌ kꞌate kambꞌiꞌij chiwe jampa kixpetik, ma ri Herodes kutaq utzukuxik rakꞌa chaꞌ kakamisaxik» xchaꞌ.

14 Xyaktaj kꞌu bꞌi ri José chaqꞌabꞌ, xebꞌukꞌam bꞌi rakꞌa y ruchu, y xebꞌek Egipto. 15 Chilaꞌ kꞌut xekꞌojiꞌ wi kꞌa che rukamik ri Herodes. Xuꞌan kꞌu waꞌ chaꞌ e kuꞌana rubꞌiꞌim lo ri Dios ruma ri qꞌalajisanel echiriꞌ jewaꞌ xubꞌiꞌij: «Kꞌa chilaꞌ Egipto xinsikꞌij wi lo ri Nukꞌajol»*Os. 11:1 xchaꞌ.

16 Ri Herodes, echiriꞌ xretaꞌmaj xsokosoꞌx kan kuma rachijabꞌ e aj naꞌoj, lik xpe royowal. Ruma kꞌu riꞌ, xutaq kikamisaxik konoje ri raltaq ko chꞌutiꞌq alabꞌo kꞌamajaꞌ kakikꞌis kebꞌ junabꞌ, chike ri e kꞌo Belén y pa taq ri luwar e kꞌo lo chunaqaj. Ekꞌu xukꞌam re riꞌ ri xkibꞌiꞌij ri e aj naꞌoj puwi ruqꞌijol echiriꞌ xwinaqir ri chꞌumil. 17 Jekꞌulaꞌ e xuꞌana ri tzꞌibꞌital kan ruma ri qꞌalajisanel Jeremías echiriꞌ xubꞌiꞌij:

19 Tekꞌuchiriꞌ kaminaq chi ri Herodes, jun ángel re ri Dios xukꞌut ribꞌ pa uwachikꞌ ri José chilaꞌ Egipto y xubꞌiꞌij che: 20 «Chatyaktajoq, chebꞌakꞌama bꞌi rakꞌa junam rukꞌ ruchu y chixtzelej tanchi Israel, ma ya xekam konoje ri kakaj kakikamisaj rakꞌa» xchaꞌ.

21 Xyaktaj kꞌu ri José, xebꞌukꞌam bꞌi rakꞌa y ruchu, y xtzelej lo Israel. 22 Pero xuxiꞌij ribꞌ keꞌek Judea, ma xretaꞌmaj e ri Arquelao rukꞌajol ri Herodes ri xkanaj kan rey re Judea pukꞌaxel ruqaw. Ruma kꞌu ri xqꞌalajisax che pa jun chik uwachikꞌ, xumaj bꞌi ubꞌe Galilea. 23 Echiriꞌ xebꞌopon chilaꞌ, xeꞌjeqela pa ri tinamit Nazaret, chaꞌ e xuꞌana ri xkibꞌiꞌij ri qꞌalajisanelabꞌ chwi ri Jesús: “Rire kabꞌiꞌx che aj Nazaret.”

<- Mateo 1Mateo 3 ->