Mateo 11

Ri Juan Aj Yaꞌl Bautismo kebꞌutaq lo rutijoꞌn rukꞌ ri Jesús

(Lc. 7:18-23)

1 Echiriꞌ ri Jesús xukꞌis kipixabꞌaxik ri kabꞌlajuj utijoꞌn, xel bꞌi chiriꞌ re kakꞌutunik y re kutzijoj Ruchꞌaꞌtem ri Dios chupa taq ri kitinamit rutijoꞌn.

2 Ri Juan kꞌo pa cárcel echiriꞌ xuta ri kuꞌan ri Cristo. Xebꞌutaq kꞌu lo kaꞌibꞌ chike rutijoꞌn rukꞌ Rire, 3 chaꞌ keꞌkitzꞌonoj che:

—¿E rilal Ruchaꞌoꞌn lo ri Dios, ri Jun bꞌiꞌtal chik kakꞌunik, o kaqoyꞌej chi junoq chik? —xechaꞌ.

4 Ri Jesús xukꞌul uwach:

—Jix y chitzijoj che ri Juan ronoje wa kixtajin che utayik y che rilik. 5 Ma ri e potzꞌ ketzuꞌnik, ri e sik kebꞌinik, ri kꞌo yabꞌil lepra chike kekunutajik, ri e tꞌoꞌk ketanik, ri ekaminaq kekꞌastajik y chike ri nibꞌaꞌibꞌ katzijox ri Utzilaj Tzij.[a] 6 Nim uqꞌij ralaxik kꞌu riꞌ ri na kasach ta ri kubꞌulibꞌal ukꞌuꞌx wukꞌ —xchaꞌ.

Ri Jesús kachꞌaꞌt puwi ri Juan Aj Yaꞌl Bautismo

(Mr. 7:24-35)

7 Ekꞌuchiriꞌ xebꞌek rike, ri Jesús xujeq kachꞌaꞌt puwi ri Juan chike ri winaq, jewaꞌ xubꞌiꞌij:

«¿Saꞌ ri xeꞌila alaq pa ri luwar katzꞌintzꞌotik? ¿Xeꞌila nebꞌa alaq jun achi na jinta ukowil xa pachaꞌ tani kajabajoꞌx ruma ri tew? 8 ¿Saꞌ ri xeꞌila alaq? ¿Xeꞌila nebꞌa alaq jun achi uwiqom ribꞌ rukꞌ chomilaj kꞌul? Na e ta riꞌ, ma etaꞌam alaq ri lik kewiqiqik, riꞌ pa kocho e aj wach ejeqel wi. 9 Kantzꞌonoj kꞌu riꞌ: ¿Saꞌ ri xeꞌila alaq? ¿Xeꞌila alaq jun qꞌalajisanel? Areꞌ, yey paqatzij wi kambꞌiꞌij che alaq: Rire e más kꞌo uwach chikiwa ri jujun chik qꞌalajisanelabꞌ. 10 Ma jewaꞌ kubꞌiꞌij Ruchꞌaꞌtem ri Dios puwi ri Juan:

Riꞌin kannabꞌesaj bꞌi ri waj chak chawach Riꞌat

chaꞌ kuyijbꞌaꞌ ri bꞌe chwach pan rawoponibꞌal Mal. 3:1

kachaꞌ.

11 »Paqatzij wi kambꞌiꞌij che alaq: Na jinta junoq chike ri tikawex ebꞌalaxinaq wara che ruwachulew más kꞌo uwach chwa ri Juan Aj Yaꞌl Bautismo. Pero chwi kꞌu riꞌ waꞌ wa keꞌek, china ri kok chupa rutaqanik ri Dios petinaq chilaꞌ chikaj, tobꞌ na jinta uwach, más nim uqꞌij ralaxik chwa ri Juan.[b]

12 »Rukꞌ ri Juan Aj Yaꞌl Bautismo xjeq lo utzijoxik ri Utzilaj Tzij puwi rutaqanik ri Dios petinaq chilaꞌ chikaj, y waꞌ kꞌa katajin utzijoxik waqꞌij ora, tobꞌ e kꞌo ri kakitij uqꞌij kakiqꞌatej waꞌ. Na rukꞌ ta kꞌu riꞌ, e ri lik kakitij uqꞌij kakitzukuj wa taqanik, kayaꞌtaj chike kebꞌok chupa. 13 Ma lik chwach pana echiriꞌ xujeq katzijon ri Juan, ri qꞌalajisanelabꞌ y ri Moisés kitzꞌibꞌam chi lo chupa ri Tzij Pixabꞌ chwi rukꞌunibꞌal rutaqanik ri Dios. 14 We kiwaj kꞌu riꞌix kikojo, ri Juan e ri Elías, ri jun bꞌiꞌtal chik kakꞌunik. 15 China kꞌu ri kꞌo utanibꞌal che utayik, ¡chuta kꞌu riꞌ!

16 »¿China kꞌu rukꞌ kanjunimaj wi kiwach wa winaq re waqꞌij ora? E kanjunimaj kukꞌ ri kꞌoꞌmabꞌ kebꞌeꞌtzꞌula pa kꞌayibꞌal y lik kesikꞌin chikiwach, 17 kakibꞌiꞌij:

Echiriꞌ riꞌoj xqachꞌawisaj suꞌ chiwe,

riꞌix na xiwaj taj kix-xajawik;

yey echiriꞌ xqatunaj bꞌix bꞌisobꞌal uwach chiwe,

na xiwaj taj kixjuyuyik

kechaꞌ.

18 »Jekꞌulaꞌ kakiꞌan taq ri winaq, ma echiriꞌ xkꞌun ri Juan Aj Yaꞌl Bautismo, rire lik kuꞌan ayuno y na kutij tane vino. Yey ri winaq kakibꞌiꞌij: “Waꞌ waꞌchi kꞌo puqꞌabꞌ jun itzel uxlabꞌixel” kechaꞌ.

19 »Xkꞌun kꞌu lo Ralaxel Chikixoꞌl Tikawex. Rire kutij ronoje ri kayaꞌ chwach, yey taq ri winaq kakibꞌiꞌij: “Waꞌ wa jun achi lik japjatel y qꞌabꞌaꞌrel, kachbꞌiꞌil raj tzꞌonol puaq re tojonik[c] y raj makibꞌ” kechaꞌ. Noꞌj kaqꞌalajin na kꞌut china taq ri lik kꞌo runaꞌoj ri Dios kukꞌ ruma ri kiꞌanom» xcha ri Jesús.

Ri kꞌaxkꞌobꞌik kape pakiwi ri tinamit na kakitzelej ta kitzij

(Lc. 10:13-15)

20 Ekꞌuchiriꞌ, ri Jesús lik xebꞌuyaj ri winaq re taq ri tinamit pa uꞌanom wi ukꞌiyal milagros, ma rike na xkitzelej ta kitzij chwach ri Dios. Jekꞌuwaꞌ xubꞌiꞌij:

21 «¡Lik toqꞌoꞌ iwach ri ix aj Corazín! ¡Lik toqꞌoꞌ iwach ri ix aj Betsaida! Ma we ta chupa ri tinamit Tiro y ri tinamit Sidón[d] xilitaj wi wa kꞌutubꞌal re ruchuqꞌabꞌ ri Dios xinꞌan chiwach riꞌix, kꞌo tan qꞌij ta lo riꞌ xkitzelej kitzij chwach ri Dios, kikojom chi kꞌu kiqꞌuꞌ kꞌax rij y kitzꞌuyubꞌam kibꞌ pa chaaj ruma ri kibꞌis. 22 E uwariꞌche kambꞌiꞌij chiwe: Echiriꞌ kopon ri qꞌij re ri qꞌatbꞌal tzij, más nim ri kꞌaxkꞌobꞌik kape piwi riꞌix chwa ri kꞌaxkꞌobꞌik kape pakiwi ri winaq re ri tinamit Tiro y ri tinamit Sidón.[e]

23 »Yey ri ix aj Capernaúm, e chiwach riꞌix lik yakom chi iqꞌij kꞌa chikaj; yey na e ta riꞌ, ma lik kakꞌaq ne bꞌi iqꞌij y kixkꞌaq ne bꞌi kꞌa chi xibꞌalbꞌaꞌ re tijbꞌal kꞌax. Ma we ta pa ri tinamit Sodoma xilitaj wi wa milagros xinꞌan chiwach riꞌix ix aj Capernaúm, riꞌ laꞌ la tinamit kꞌa kꞌo tane woꞌora.[f] 24 Ekꞌu kambꞌiꞌij waꞌ chiwe: Pa ri qꞌij re ri qꞌatbꞌal tzij, lik nim ri kꞌaxkꞌobꞌik kape piwi riꞌix chwa ri xpe pakiwi ri winaq re ri tinamit Sodoma» xchaꞌ.

Ri Jesús kuyak uqꞌij Ruqaw

(Lc. 10:21-22)

25 Ekꞌu laꞌ la joqꞌotaj ri Jesús xuꞌan orar chwach Ruqaw, jewaꞌ xubꞌiꞌij:

«Nuqaw, kanyak qꞌij la, Lal Rajaw ruwa kaj y ruwachulew, ma ri qꞌalajisam la chike ri lik kakiꞌan chꞌutiꞌn che kibꞌ, waꞌ ewam la chikiwach ri lik kꞌo kinaꞌoj y lik kꞌo kimajom. 26 Jelaꞌ xꞌan la, Nuqaw, ma e xꞌaj la riꞌ» xchaꞌ.

27 Tekꞌuchiriꞌ, xubꞌiꞌij chike ri tikawex:

«Ronoje taq ri kꞌolik yaꞌtal lo panuqꞌabꞌ ruma ri Nuqaw. Na jinta kꞌu junoq lik umajom usukꞌ chi utz saꞌ ruwach Rukꞌajol ri Dios, xew ri Qaqaw Dios etaꞌmayom re. Y na jinta ne junoq umajom usukꞌ chi utz saꞌ ruwach ri Qaqaw Dios, xew Rukꞌajol ri Dios etaꞌmayom re; yey puqꞌabꞌ kꞌu riꞌ Rukꞌajol kꞌo wi china chike karaj kuqꞌalajisaj wi waꞌ.

Ri uxlanem kuya ri Jesús

28 »Chixpeta wukꞌ, iwonoje ri ix kosinaq y kꞌo iweqaꞌn, ma riꞌin kanya uxlanem chiwe. 29 Chiyaꞌa iwibꞌ chuxeꞌ ri nuyuku kankoj riꞌin chiwe. Chimaja kꞌu iweꞌix chwij, ma riꞌin utz nukꞌuꞌx y na kanꞌan ta nim che wibꞌ chiwach. We kiꞌan kꞌu riꞌ waꞌ, kiriq na ri utzil chomal piwanimaꞌ. 30 Ma ri nuyuku riꞌin, na kꞌayew ta rukꞌaxik bꞌi y ri eqaꞌn kanya bꞌi chiwe na al taj» xchaꞌ.

<- Mateo 10 Mateo 12 ->