Lucas 21

Ri qasaꞌn xuya jun ixoq malkaꞌn

(Mr. 12:41-44)

1 Ri Jesús xebꞌutzuꞌ pan ri bꞌeyomabꞌ echiriꞌ kakiya ri kiqasaꞌn chupa ri kaxa re qasaꞌn pa ri Rocho Dios. 2 Y xril kꞌu jun ixoq malkaꞌn lik nibꞌaꞌ echiriꞌ xuya chupa ri kaxa kaꞌibꞌ raltaq ko meyo lik na kꞌi ta rajil. 3 Ekꞌu ri Jesús xubꞌiꞌij:

—Paqatzij wi kambꞌiꞌij chiwe, chwach ri Dios wa jun ixoq nibꞌaꞌ y malkaꞌn e ne xuya más chwa ri xkiya konoje. 4 Ma konoje xa e xkiya ruwiꞌ ri kipuaq; noꞌj wiꞌxoq tobꞌ lik nibꞌaꞌ e xuya ronoje ri puaq kꞌo rukꞌ, waꞌ e re kuloqꞌ ri lik kajawax che —xcha ri Jesús.

Taq ri kꞌutubꞌal re ri kꞌisbꞌal re ruwachulew

(Mt. 24:1-28; Mr. 13:1-23)

5 Chiriꞌ kꞌu riꞌ e kꞌo jujun kechꞌaꞌt chwi ri Rocho Dios, kakibꞌiꞌij lik chom uꞌanom rukꞌ taq ri chomilaj abꞌaj y rukꞌ taq ri chomilaj wiqibꞌal yaꞌtal kuma ri tikawex.

Ekꞌu ri Jesús xubꞌiꞌij chike:

6 —Kakꞌun kꞌu ri qꞌij echiriꞌ ronoje wa kitzutzaꞌ, kawulixik; jekꞌulaꞌ, na kakanaj ta chi juna abꞌaj puwiꞌ jun chik —xchaꞌ.

7 Tekꞌuchiriꞌ xkitzꞌonoj che ri Jesús, jewaꞌ xkibꞌiꞌij:

—Qajawal, ¿jampa nawi kuꞌana taq riꞌ waꞌ? ¿Yey saꞌ ri kꞌutubꞌal kilitajik echiriꞌ kuꞌanaꞌ? —xechaꞌ.

8 Ri Jesús xubꞌiꞌij kꞌu chike:

—Lik chichajij iwibꞌ chaꞌ na kixsokotaj taj; ma e kꞌi ri kekꞌunik y xa kakichiqꞌimaj uwach ri nubꞌiꞌ, jewaꞌ kakibꞌiꞌij: “In ri Cristo, Ruchaꞌoꞌn lo ri Dios, yey lik xa naqaj chi kꞌo wi lo ruqꞌijol ri nutaqanik,” kechaꞌ. Noꞌj riꞌix mixterej bꞌi chikij. 9 Y echiriꞌ kito kꞌo chꞌaꞌoj y ketukuk ri winaq che ruwachulew, mixiꞌij iwibꞌ che. Ma lik chirajawaxik nabꞌe na kuꞌana na ronoje waꞌ, noꞌj kꞌamajaꞌ ne riꞌ ri kꞌisbꞌal re ruwachulew —xchaꞌ.

10 Xubꞌiꞌij kꞌu chike:

«Ekꞌo tinamit keyaktaj chikij jujun chik tinamit y e kꞌo taqanelabꞌ keyaktaj chikij jujun chik taqanelabꞌ. 11 Kuꞌan nimaq taq kabꞌraqan. Che ukꞌiyal luwar che ruwachulew kape numik y yabꞌil pakiwi ri tikawex. Yey che ruwa kaj kilitaj nimaq taq kꞌutubꞌal xibꞌibꞌal uwach.

12 »Pero chwach taq kꞌu riꞌ waꞌ, riꞌix kitij na kꞌax ruma ikojom ri nubꞌiꞌ, kixchapik y kixternabꞌex rukꞌ kꞌax, kixyaꞌ pakiqꞌabꞌ raj wach re ri sinagogas chaꞌ rike kakiqꞌat tzij piwiꞌ y kixkꞌam bꞌi pa cárcel, kixkꞌam bꞌi chikiwach ri reyes y chikiwach ri taqanelabꞌ. 13 Jekꞌuriꞌlaꞌ, utz kiqꞌalajisaj ri Utzilaj Tzij chikiwach. 14 Mixok il che saꞌ rukꞌulik uwach kiꞌano echiriꞌ kitoꞌ iwibꞌ chikiwach rike; 15 ma e riꞌin kinyaꞌw ichꞌaꞌtem yey inaꞌoj chaꞌ konoje ri tzel kebꞌilow iwe na kakiriq ta chi ukꞌulik uwach chiwe.

16 »Yey kixyaꞌ ne pa qꞌatbꞌal tzij kuma richu-iqaw, kuma taq riwatz-ichaqꞌ, kuma taq ri kꞌo chux chiwe y kuma ri iwamigos. Y jujun chiwe keyaꞌ pa kamik. 17 Lik kꞌu tzel kixil kuma taq ri winaq ruma ikojom ri nubꞌiꞌ. 18 Na rukꞌ ta kꞌu riꞌ, mubꞌisoj ikꞌuꞌx ma ix kꞌo puqꞌabꞌ ri Dios y na jinta ne tobꞌ xa juna iwiꞌ kasachik.[a] 19 Ma we kichꞌij uchuqꞌabꞌ ronoje, kikꞌul na ri kolobꞌetajik y ri kꞌaslemal na jinta utaqexik.

Ri tinamit Jerusalem kawulixik

20 »Echiriꞌ kiwil ri soldados kakijeq kakisut rij ri tinamit Jerusalem, chiwetaꞌmaj kꞌut e riꞌ kopon ri qꞌij kawulix ri tinamit. 21 Ekꞌu ri winaq e kꞌo pa ri luwar re Judea, chebꞌanimaj ubꞌi chwa taq juyubꞌ; y ri e kꞌo chupa ri tinamit Jerusalem chebꞌelubꞌi; yey ri e kꞌo pa juyubꞌ, mebꞌok chi lo Jerusalem, 22 ma waꞌ e uqꞌijol qꞌatbꞌal tzij, echiriꞌ kuꞌanaꞌ janipa ri tzꞌibꞌital chupa Rutzij Upixabꞌ ri Dios puwi waꞌ. 23 Chupa taq kꞌu laꞌ la qꞌij, lik toqꞌoꞌ kiwach ri e yewaꞌ ixoqibꞌ y ri ketzꞌumtisanik, ma lik saꞌch ri nimaq kꞌaxkꞌobꞌik kape che ruwachulew ruma ri royowal ri Dios chikij waꞌ wa tinamit.

24 »Lik e kꞌi ri kekamisax rukꞌ espada y e kꞌi kekꞌam bꞌi chi presoyil pa jujun chik tinamit che ronoje ruwachulew.[b] Yey ri tinamit Jerusalem kakꞌojiꞌ kꞌu pakiqꞌabꞌ ri na e ta aj Israel chaꞌ ketaqan puwiꞌ, kꞌa pa kopon wi ruqꞌijol ubꞌiꞌim chi ri Dios.

Rukꞌunibꞌal Ralaxel Chikixoꞌl Tikawex

(Mt. 24:29-35, 42-44; Mr. 13:24-37)

25 »Chwa kꞌu riꞌ ri kaj kilitaj kꞌutubꞌal che ri qꞌij, che ri ikꞌ y che taq ri chꞌumil; yey taq ri winaq che ruwachulew kasach kinaꞌoj y kakijeq kakixiꞌij kibꞌ che ri nimalaj uchꞌawibꞌal ri mar y che ri yaꞌ lik kel chikaj chwi ri mar. 26 Keqꞌocholaj taq ri winaq, keꞌek ri kinaꞌoj y ketzaq pulew ruma xiꞌin ibꞌ che ri kꞌaxkꞌobꞌik kape che ruwachulew; ma e taq ri kꞌo kichuqꞌabꞌ che ruwa kaj keyikiyoꞌxik. 27 Kꞌa tekꞌuchiriꞌ kilitaj Ralaxel Chikixoꞌl Tikawex kakꞌun lo pa sutzꞌ rukꞌ ruchuqꞌabꞌ y rukꞌ runimal uchomalil.[c] 28 Ekꞌuchiriꞌ kujeq kilitaj wa kꞌutubꞌal, lik chichuqꞌubꞌej iwibꞌ che royꞌexik ri ikolobꞌetajik chwa ri kꞌaxkꞌobꞌik» xcha ri Jesús.

29 Ri Jesús xutzijoj kꞌu wa jun kꞌambꞌal naꞌoj chike:

«Chiwilape ri cheꞌ re higo y ronoje taq ri cheꞌ. 30 Echiriꞌ kiwilo ketuxik, iwetaꞌam xa naqaj chi kꞌo wi lo ruqꞌijol echiriꞌ kabꞌukbꞌutik y na jinta jabꞌ.[d] 31 Jekꞌulaꞌ echiriꞌ kiwilo kuꞌana ronoje taq waꞌ, chiwetaꞌmaj xa naqaj chi kꞌo wi lo ruqꞌijol echiriꞌ ri Dios kataqan puwi ronoje. 32 Paqatzij wi kambꞌiꞌij chiwe: E kꞌo tikawex re waꞌ wa qꞌij na kekam tana we na xkil tubꞌi ronoje waꞌ. 33 Ruwa kaj y ruwachulew xa kasach uwach, noꞌj ri nuchꞌaꞌtem na kasach ta uwach.

Chixkꞌola jusukꞌ, e chiwoyꞌej rukꞌunibꞌal ri Cristo

34 »Lik chichajij iwibꞌ chaꞌ na kiya ta iwibꞌ che taq ri rayinik re ri mak, che ri qꞌabꞌarik y che rubꞌis ikꞌuꞌx re ruwachulew, ma kꞌaxtaj kakꞌun lo ruqꞌijol Ralaxel Chikixoꞌl Tikawex echiriꞌ na iwoyeꞌem taj. 35 Ma rukꞌunibꞌal Rire chikiwach ri e kꞌo che ruwachulew, xaqikꞌateꞌt kuꞌanaꞌ, jelaꞌ pachaꞌ echiriꞌ juna awaj xaqikꞌateꞌt katzaq pa laso re kachapik.

36 »Mawar kꞌu iwach, xaqi e chixchꞌaꞌt rukꞌ ri Dios chaꞌ kꞌo ichuqꞌabꞌ chwa wa katajin loq y jelaꞌ taqal chiwe kixkolobꞌetaj chwach ronoje waꞌ, y na kixkꞌix ta kꞌu riꞌ kixtakꞌiꞌ chwach Ralaxel Chikixoꞌl Tikawex echiriꞌ kakꞌun loq» xchaꞌ.

37 Ekꞌu riꞌ ri Jesús e taq ri paqꞌij kakꞌutun pa ri Rocho Dios yey e taq ri chaqꞌabꞌ kel bꞌi keꞌkꞌola chwa ri juyubꞌ Olivos. 38 Y konoje ri winaq anim tan kebꞌopon chupa ri Rocho Dios chaꞌ keꞌkita ruchꞌaꞌtem ri Jesús.

<- Lucas 20 Lucas 22 ->