10
Ri kikꞌ ke rawaj na karesaj ta ri mak
1 Ri taqanik xuya ri Dios che ri Moisés na e ta ri saqil bꞌeyomalil kayaꞌiꞌ chiqawach apanoq, ma xa e ukꞌaxwach. Yey wa taqanik na jinta uchuqꞌabꞌ re kuꞌan chom che ri kanimaꞌ ri tikawex, ri kakikoj kibꞌ chwach ri Dios kuma rawaj ekamisam chwa raltar chujujunal junabꞌ.
2 Ma we ta wa taqanik asu kuchomaj ri kanimaꞌ ri keloqꞌniman ri Dios, riꞌ na kakiya ta chi chwach ri Dios rawaj ekamisam, ma kakinaꞌ kꞌu riꞌ chikikꞌuꞌx na jinta chi kimak.
3 Noꞌj na je ta laꞌ uꞌanom, ma echiriꞌ ri tikawex chujujunal junabꞌ kakiya chwach ri Dios rawaj ekamisam, waꞌ e kukuxtaj chike kꞌo kimak chwach ri Dios.
4 Ma ri kikikꞌel toroꞌibꞌ y kaprux mamaꞌibꞌ na jinta uchuqꞌabꞌ re karesaj ri mak.
5 E uwariꞌche ri Cristo echiriꞌ ya kape che ruwachulew, jewaꞌ xubꞌiꞌij che ri Dios:
Ri lik kaꞌaj la na e ta rawaj ekamisam chwa raltar rukꞌ taq ri qasaꞌn;
e uwariꞌche xchꞌobꞌ la kaya la ri nucuerpo chaꞌ e kanya waꞌ chiwach la.
6 Yey na xukꞌul ta kꞌuꞌx la ri qasaꞌn re awaj eporom chwi raltar
y ri ekamisam re kuybꞌal mak.
7 Ruma kꞌu waꞌ ximbꞌiꞌij: Lal Dios, riꞌ in kꞌo Riꞌin
re koꞌlnuꞌana janipa ri rajawal kꞌuꞌx la,
jelaꞌ pachaꞌ ri tzꞌibꞌital panuwiꞌ Riꞌin pa ri Chꞌaꞌtem la Sal. 40:6-8
xchaꞌ.
8 Nabꞌe kubꞌiꞌij: «Ri Dios na xcha ta ukꞌuꞌx che taq rawaj ekamisam chwa raltar y taq ri qasaꞌn y rawaj eporom chwi raltar y taq rawaj ekamisam re kuybꞌal mak.» Ekꞌu taq waꞌ na xukꞌul ta ukꞌuꞌx tobꞌ e ne Rire xtaqan che uꞌanik waꞌ.
9 Tekꞌuchiriꞌ xubꞌiꞌij: «Riꞌ in kꞌo Riꞌin re koꞌlnuꞌana janipa ri rajawal ukꞌuꞌx ri Dios.» Ri keꞌelawi e kel ri kaꞌan ojertan re kekamisax awaj chwach ri Dios y pukꞌaxel waꞌ e katikiꞌ kan ri xuꞌan ri Cristo.
10 Jekꞌulaꞌ ri Qanimajawal Jesucristo e xuꞌan ri rajawal ukꞌuꞌx ri Dios echiriꞌ xuꞌan jusukꞌ chiqe ruma xuya rucuerpo pa kamik; yey waꞌ xa julaj xuꞌano ma na kajawax taj kuꞌan tanchik.
11 Paqatzij wi juna aj chakunel pa Rocho Dios ronoje qꞌij xaqi e kuꞌan ruchak y kebꞌukamisaj kꞌu rawaj chwa raltar, tobꞌ waꞌ na karesaj ta kꞌana ri mak. 12 Noꞌj ri Cristo xa julaj xuya ribꞌ pa kamik ruma ri mak; tekꞌuchiriꞌ xeꞌtzꞌula puwikiqꞌabꞌ ri Dios. 13 Y chwi kꞌu lo riꞌ laꞌ, e royeꞌem keyaꞌ na xeꞌraqan Rire ri tzel kebꞌilow re. 14 Ruma kꞌu xa julaj xuya ribꞌ pa kamik, xa jumul xuꞌan jusukꞌ chike ri kiyaꞌom kibꞌ puqꞌabꞌ ri Dios. 15 Yey ri Santowilaj Ruxlabꞌixel ri Dios kujikibꞌaꞌ uwach waꞌ chiqe, ma nabꞌe na kubꞌiꞌij:
16 E tzij waꞌ kanꞌan kukꞌ ri nutinamit
chupa taq laꞌ la qꞌij:
Kankoj ri nutzijpixabꞌ pa kanimaꞌ
y kantzꞌibꞌaj pa kijolom, kacha ri Dios Qajawxel. Jer. 31:33
17 Tekꞌuchiriꞌ kubꞌiꞌij:
Y na kakꞌun ta chi kꞌana chinukꞌuꞌx ri kimak
y ri na utz taj xkiꞌano Jer. 31:34
kachaꞌ. 18 Jekꞌuriꞌlaꞌ, we ri mak kuytajinaq chik, riꞌ na kajawax ta chik kakamisax awaj chwa raltar re karesaj ri mak.
Lik chirajawaxik wi kaqachuqꞌubꞌej qibꞌ chwach ri Dios
19 E uwariꞌche hermanos, woꞌora yaꞌtal chiqe kojok chupa ri Luwar lik Santo ruma rukikꞌel ri Qanimajawal Jesucristo.
20 Ruma kꞌu ri Cristo, yaꞌtal jun kꞌakꞌ kꞌaslemal chiqe y kꞌo qokibꞌal chwach ri Dios, yey wa kꞌakꞌ okibꞌal e ri Cristo. Echiriꞌ Rire xuꞌan tikawex y xkam chwa ri cruz, e xresaj ri qꞌatibꞌal, ri na xuya ta luwar kojopon chwach ri Dios. E pachaꞌ ri telón kꞌo pa Rocho Dios, ri na kuya ta luwar chike ri tikawex kebꞌok pa ri Luwar lik Santo. Yey waꞌ xrichꞌrobꞌik echiriꞌ xkam ri Cristo.
* 21 Ekꞌu woꞌora kꞌo ri Qajawal lik nim uqꞌij, ri kachꞌaw paqawiꞌ chwach ri Dios yey kataqan paqawiꞌ ri oj utinamit ri Dios.
* 22 E uwariꞌche chojqibꞌ chwach ri Dios rukꞌ ronoje qanimaꞌ y rukꞌ ri kubꞌulibꞌal qakꞌuꞌx tikil chi utz, ma kunaꞌ qakꞌuꞌx na jinta chi qamak ruma josqꞌital ri qanimaꞌ che ri na utz taj, jelaꞌ pachaꞌ ri qacuerpo echiriꞌ chꞌajtal chi rukꞌ chomilaj yaꞌ.
† 23 E qajikibꞌam uwach kaqakꞌul janipa rubꞌiꞌtisim ri Dios; lik chojtikila kꞌu jusukꞌ che ri kubꞌulibꞌal qakꞌuꞌx puwi ri qoyeꞌem che ri Dios, ma Rire na kujalkꞌatij ta rubꞌiꞌtisinik uꞌanom chiqe.
24 Qatzukuj kꞌut suꞌanik kaqatoꞌ qibꞌ chiqibꞌil qibꞌ chaꞌ jelaꞌ kanimar ri rutzil qakꞌuꞌx y ri utzilaj chak kaqaꞌano.
25 Maqaꞌan qeꞌoj pachaꞌ ri kakiꞌan jujun, ri koqꞌotam kakimol kibꞌ qukꞌ re kaqaloqꞌnimaj uqꞌij ri Dios y re kaqanimarisaj qakꞌuꞌx chiqawach; ri qaꞌanaꞌ e más qapixabꞌaj qibꞌ chiqawach woꞌora, ma qetaꞌam rukꞌunibꞌal ri Qanimajawal Jesucristo lik xa naqaj chi kꞌo lo wi.
Maqesaj qibꞌ chirij ri Cristo
26 We e laꞌ lik xqamaj usukꞌ ri Qꞌijsaq puwi ri Cristo, yey na rukꞌ ta kꞌu riꞌ, lik uꞌanikil wi kojmakun chirij Rire, maqachꞌobꞌ kꞌu riꞌ, kꞌa kꞌo kayaꞌiꞌ chwach ri Dios re karesaj ri qamak.
27 Ma we e kaqaꞌan waꞌ, riꞌ katewun chi ne paqawiꞌ runimal qꞌatbꞌal tzij xibꞌibꞌal uwach y ri aqꞌ kajinowik pa keyaꞌ wi konoje ri tzel kakil ri Dios.
28 Echiriꞌ kꞌo junoq kupalajij ri Tzij Pixabꞌ re ri Moisés, yey we e kꞌo kꞌu kaꞌibꞌ oxibꞌoq xebꞌilow re, riꞌ asu kakamisaxik.
* 29 Jekꞌulaꞌ, we kꞌo junoq kukꞌaq bꞌi uqꞌij Rukꞌajol ri Dios, kuꞌan pachaꞌ na jinta uchak che rukikꞌel ri Qanimajawal Jesucristo y tzel kachꞌaꞌt ne chirij ri Ruxlabꞌixel ri Dios ¿na kukꞌul ta nebꞌa unimal kꞌaxkꞌobꞌik ruma kuꞌan waꞌ? Ma rukikꞌel ri Qanimajawal e kujikibꞌaꞌ ri tzij uꞌanom ri Dios qukꞌ y kuꞌan jusukꞌ chiqe; yey ri Ruxlabꞌixel ri Dios e kayaꞌw ri unimal rutzil ukꞌuꞌx ri Dios chiqe.
30 Ma riꞌoj qetaꞌam china ri xubꞌiꞌij waꞌ:
Panuqꞌabꞌ Riꞌin kꞌo wi kanqꞌat tzij
pakiwi ri kebꞌanaw re ri na utz taj;
In kꞌu riꞌ ri kinꞌanaw ukꞌaxel chike Dt. 32:35
xcha ri Dios Qajawxel. Yey jewaꞌ tanchi kubꞌiꞌij:
E ri Dios kaqꞌataw tzij puwi rutinamit Dt. 32:36; Sal. 135:14
kachaꞌ.
31 ¡Lik kꞌu xibꞌibꞌal uwach che junoq we ruma kupetisaj royowal ri Dios kꞌaslik, katzaq puqꞌabꞌ Rire!
32 Kꞌuna kꞌu chikꞌuꞌx alaq, echiriꞌ kꞌakꞌ xkꞌul alaq ri Qꞌijsaq, lik xkuy alaq rukꞌ unimal kꞌuꞌxaj ri kꞌaxkꞌobꞌik xikꞌowibꞌej alaq ruma kojom alaq rubꞌiꞌ ri Cristo. 33 Jutaq laj kꞌu riꞌ, kꞌo ri xkichꞌamij alaq y lik xkiꞌan kꞌax che alaq chikiwach ri winaq; jutaq laj chik e ne ralaq xyaꞌ ibꞌ alaq che kitoꞌik ri kebꞌikꞌow chupa waꞌ wa kꞌaxkꞌobꞌik. 34 Lik kꞌu xjuchꞌ kaꞌn kꞌuꞌx alaq chike ri e kꞌo pa cárcel. Yey echiriꞌ xmaj ne ri bꞌitaq e alaq, rukꞌ kiꞌkotemal xchꞌij alaq waꞌ. Ronoje taq waꞌ xkuy alaq ma etaꞌam alaq chilaꞌ chikaj kꞌo wi ri bꞌiꞌtisim che alaq y waꞌ e ne más utz chwa ri xa re ruwachulew, ma e taq ri kꞌo chilaꞌ chikaj lik kakowinik.
35 E uwariꞌche lik maya kan alaq ri kubꞌulibꞌal kꞌuꞌx alaq rukꞌ ri Dios, ma laꞌ la kubꞌulibꞌal kꞌuꞌxaj kukꞌam lo unimal rajil ukꞌaxel che alaq. 36 Lik kꞌu chirajawaxik kachꞌij alaq ri kꞌaxkꞌobꞌik kape pawiꞌ alaq rukꞌ unimal kꞌuꞌxaj, chaꞌ echiriꞌ ꞌanom chi alaq janipa ri rajawal ukꞌuꞌx ri Dios, kakꞌul na alaq rubꞌiꞌtisim lo Rire che alaq. 37 Ma Ruchꞌaꞌtem ri Dios jewaꞌ kubꞌiꞌij:
Xa jubꞌiqꞌ chi karaj, yey ri Jun kakꞌunik,
kakꞌun na y na kamayin taj.
38 China kꞌu ri lik jusukꞌ chinuwach,
riꞌ kꞌo ukꞌaslemal ruma ri kubꞌulibꞌal ukꞌuꞌx wukꞌ.
Yey we xresaj ribꞌ che ri kubꞌulibꞌal ukꞌuꞌx wukꞌ;
Riꞌin na kinkiꞌkot ta chi rukꞌ Hab. 2:3-4
kachaꞌ.
39 Qonoje kꞌu riꞌoj, na oj ta kukꞌil ri kakesaj kibꞌ chirij ri Cristo y xa kasach kiwach, ma e oj kukꞌil ri kakikꞌul ri kꞌaslemal na jinta utaqexik ruma kubꞌul kikꞌuꞌx rukꞌ Rire.
<- Hebreos 9Hebreos 11 ->
