1 Ix alkꞌoꞌal, ruma ix kꞌo puqꞌabꞌ ri Qaqaw, lik chikojo kitzij richu-iqaw ma lik e usukꞌ riꞌ. 2 Chupa Rutzij Upixabꞌ ri Dios ri nabꞌe tzij kuꞌan bꞌiꞌtisinik chike ri keꞌanaw re, e waꞌ:

5 Yey ralaq ri alaq mokom, e lik kojo alaq kitzij ri patrón alaq wara che ruwachulew. Chakuna kꞌu alaq chi utz rukꞌ jun saqil xiꞌin ibꞌ pa animaꞌ alaq y rukꞌ ronoje kꞌuꞌx alaq pachaꞌ e kanimaj alaq ri Cristo rukꞌ ri chak alaq. 6 Na utz ta kꞌu riꞌ we juna mokom xew kachakun chi utz echiriꞌ katzutzuꞌx ruma rupatrón chaꞌ jelaꞌ katakꞌabꞌax uqꞌij. Ri ꞌana alaq e kꞌutu alaq paqatzij wi alaq aj chak re ri Cristo. Chakuna kꞌu alaq riꞌ rukꞌ ronoje kꞌuꞌx alaq chaꞌ jelaꞌ kaꞌan alaq janipa ri karaj ri Dios. 7 Ma ralaq na xa ta alaq umokom juna achi; e uwariꞌche, ꞌana alaq pachaꞌ e ri Qanimajawal Jesucristo ri kanimaj alaq rukꞌ ri chak alaq. Chakuna kꞌu alaq riꞌ rukꞌ ronoje kꞌuꞌx alaq. 8 Etaꞌam kꞌu alaq kꞌo rajil ukꞌaxel ri utz kaqaꞌano y waꞌ e ri Cristo kayaꞌw chiqajujunal, tobꞌ kachakun jun rukꞌ juna patrón o xa pa re jun kachakun wi.

9 Ekꞌu ralaq ri alaq patrón, ꞌana alaq ri utz chike taq ri mokom alaq ma e karaj riꞌ ri Dios che alaq. Maxibꞌij ne alaq kipa rukꞌ kꞌax. Kꞌuna chikꞌuꞌx alaq, e ralaq alaq jelaꞌ pachaꞌ rike, ma junam kukꞌ rike kꞌo alaq puqꞌabꞌ ri Qanimajawal kꞌo chilaꞌ chikaj. Yey chwach Rire xa jun qawach qonoje.*Ro. 2:11

10 Kꞌisbꞌal kꞌu re, kambꞌiꞌij che alaq hermanos, chuqꞌubꞌej ibꞌ alaq chwach ri Qanimajawal Jesucristo rukꞌ runimal uchuqꞌabꞌ Rire. 11 ꞌAna kꞌu e alaq che ronoje taq ri toꞌbꞌal kuya ri Dios*“Ri toꞌbꞌal kuya ri Dios”: Pa kaxtila waꞌ kabꞌiꞌx “la Armadura de Dios” che. Waꞌ e jun kꞌambꞌal naꞌoj puwi ri toꞌbꞌal kuya ri Dios chiqe. Waꞌ e pachaꞌ taq ri chapabꞌal re juna soldado. che alaq chaꞌ jelaꞌ kachꞌij alaq uchuqꞌabꞌ taq ri sokosoꞌnik re ritzel winaq. 12 Ma riꞌoj oj kꞌo pa chꞌaꞌoj. Pero wa chꞌaꞌoj na e ta kukꞌ tikawex keqam kulewal kipoqlajil, e kukꞌ taq itzelilaj uxlabꞌixel e kꞌo xa pa tew, ri lik kꞌo kichuqꞌabꞌ re ketaqan pakiwi taq ri e kꞌo pa qꞌequꞌm wara che ruwachulew. Kukꞌ taq rike ri qachꞌaꞌoj. 13 Ruma kꞌu waꞌ, lik chirajawaxik che alaq chukꞌaꞌaj alaq ronoje taq ri toꞌbꞌal qe kuya ri Dios, chaꞌ jelaꞌ kachꞌij alaq uchuqꞌabꞌ taq ri na utz taj kape pawiꞌ alaq. Y jekꞌulaꞌ, we xkꞌis waꞌ wa chꞌaꞌoj chiꞌij alaq, kꞌa tikil alaq jusukꞌ.

14 E uwariꞌche lik chuqꞌubꞌej ibꞌ alaq chupa ri Qꞌijsaq jelaꞌ pachaꞌ juna aj chak kukoj rupas chaꞌ kuxim rupa chi utz. Kꞌola alaq jusukꞌ y lik chajij alaq ri bꞌinik silabꞌik alaq jelaꞌ pachaꞌ juna soldado chꞌuqutal ruwa ukꞌuꞌx rukꞌ jun chꞌichꞌ. 15 Xaqi yijbꞌaꞌ ibꞌ alaq che utzijoxik ri Utzilaj Tzij re ri utzil chomal jelaꞌ pachaꞌ juna soldado xaqi ukojom ruxajabꞌ re kutoꞌbꞌej ri raqan che taq ri kikꞌow wi. 16 Y chwi ronoje taq waꞌ, tikila chi utz ri kubꞌulibꞌal kꞌuꞌx alaq rukꞌ ri Dios, ma waꞌ che ralaq e pachaꞌ ri juperaj chꞌichꞌ rukꞌaꞌam juna soldado puqꞌabꞌ re kuchup ri aqꞌ kꞌo chutzaꞌm ri flechas kakꞌaq lo che. Jekꞌulaꞌ ri kubꞌulibꞌal kꞌuꞌx ralaq e toꞌbꞌal e alaq chaꞌ kachꞌij alaq uchuqꞌabꞌ taq ri kꞌaqanik kuꞌan lo ritzel winaq che alaq. 17 Tikila alaq chi utz chupa ri kolobꞌetajik yaꞌtal che alaq jelaꞌ pachaꞌ juna soldado kukoj rucasco re chꞌuqubꞌal rujolom. Y chapabꞌej alaq chi utz Ruchꞌaꞌtem ri Dios, ma waꞌ e pachaꞌ juna espada yaꞌtal che alaq ruma ri Ruxlabꞌixel ri Dios chaꞌ kachꞌoꞌjin alaq chirij ritzel winaq. 18 ꞌAna kꞌu alaq orar chipaqꞌij chichaqꞌabꞌ. Lik tzꞌonoj alaq che ri Dios e chirij janipa ri kubꞌiꞌij ri Ruxlabꞌixel che alaq. Makos ne alaq che uꞌanik orar; e xaqi ꞌana alaq orar pakiwi konoje rutinamit ri Dios. 19 Kantzꞌonoj ko che alaq ꞌana alaq orar panuwi riꞌin chaꞌ ri Dios kuya nuchꞌaꞌtem y jekꞌulaꞌ na kanxiꞌij ta kꞌana wibꞌ kantzijoj ri Utzilaj Tzij uqꞌalajisam ri Dios chiqawach. 20 Ma intaqom lo ruma ri Dios, in qꞌalajisay re ri Utzilaj Tzij y ruma ne waꞌ in kꞌo pa presoyil woꞌora. E uwariꞌche tzꞌonoj alaq che ri Dios chaꞌ na kanxiꞌij ta kꞌana wibꞌ che uqꞌalajisaxik puwi Rire, ma e taqal riꞌ chwe.

21 Ronoje taq ri nukꞌulumam y ri kintajin che uꞌanik, kuꞌtzijoj pan ri Tíquico che alaq. Rire e jun utzilaj aj chak re ri Qanimajawal Jesucristo y na loqꞌ ta kꞌax kanaꞌw re. 22 E uwariꞌche nutaqom bꞌi chilaꞌ ukꞌ alaq chaꞌ ketaꞌmaj alaq saꞌ ri qaꞌanom riꞌoj y jekꞌulaꞌ kuꞌnimarisaj pan kꞌuꞌx alaq.

23 Kꞌulu alaq ri utzil chomal, ri rutzil kꞌuꞌxaj y ri kubꞌulibꞌal kꞌuꞌxaj, ri petinaq rukꞌ ri Qaqaw Dios y rukꞌ ri Qanimajawal Jesucristo. 24 Kꞌulu kꞌu alaq ri unimal rutzil ukꞌuꞌx ri Qanimajawal Jesucristo, onoje alaq ri lik kꞌax kanaꞌ alaq Rire rukꞌ rutzil kꞌuꞌxaj na jinta ukꞌisik. Amén.

<- Efesios 5