1 Chupa taq laꞌ la qꞌij lik xekꞌiyar ri kajlibꞌal ri kikojom rubꞌiꞌ ri Cristo. Ekꞌu ri hermanos e aj judiꞌabꞌ ri kechꞌaꞌt pa ri chꞌaꞌtem griego, xkijeq kechꞌaꞌtibꞌen chikij ri hermanos e aj judiꞌabꞌ ri kechꞌaꞌt pa ri chꞌaꞌtem hebreo.*Pa riglesia re Jerusalem e kꞌo hermanos e aj judiꞌabꞌ kechꞌaꞌt pa hebreo y kitaqem ri kojobꞌal ke kan ri katiꞌ-kimam. Yey e kꞌo hermanos e aj judiꞌabꞌ, tobꞌ na kakiriq ta hebreo ma ri kichꞌaꞌtem e griego; pero kitaqem jujun che taq ri kojobꞌal ke raj griego. Ma echiriꞌ kaꞌan ri jachanik chike ri e nibꞌaꞌibꞌ, ri malkaꞌnibꞌ ri kechꞌaꞌt pa ri chꞌaꞌtem griego na kekajmax ta chi utz rukꞌ ri toꞌbꞌal ke kakikꞌul ri jujun qꞌij.

2 Ekꞌu ri kabꞌlajuj taqoꞌn xkimol kichiꞌ konoje ri kikojom rubꞌiꞌ ri Cristo y xkibꞌiꞌij chike: «Na usukꞌ taj we riꞌoj kaqatanabꞌaꞌ utzijoxik Rutzij Upixabꞌ ri Dios chaꞌ kaqaya qibꞌ che ujachik ri kajawax chike ri e nibꞌaꞌibꞌ. 3 Ruma kꞌu laꞌ hermanos, tzukuj alaq wuqubꞌ achijabꞌ chixoꞌl alaq, chom ri kibꞌinik kisilabꞌik, lik kiyaꞌom kibꞌ puqꞌabꞌ ri Ruxlabꞌixel ri Dios y lik kꞌo kinaꞌoj, chaꞌ kaqaya wa chak pakiqꞌabꞌ. 4 Jekꞌulaꞌ riꞌoj xew kaqaya qibꞌ che kaqaꞌan orar chwach ri Dios y che rutzijoxik Ruchꞌaꞌtem» xechaꞌ.

5 Konoje kꞌu ri hermanos kimolom kibꞌ, xukꞌul kikꞌuꞌx wa xbꞌiꞌx chike. Xkichaꞌ kꞌu ri Esteban, jun achi lik kubꞌul ukꞌuꞌx rukꞌ ri Dios yey lik kꞌo ri Santowilaj Ruxlabꞌixel ri Dios rukꞌ. Y xekichaꞌ ri Felipe, ri Prócoro, ri Nicanor, ri Timón, ri Parmenas y ri Nicolás, jun achi aj Antioquía xex utaqem lo ri kꞌutunik ke raj judiꞌabꞌ. 6 Ewi xekikꞌam lo chikiwach rutaqoꞌn ri Jesús. Ekꞌu wa taqoꞌn xkiya ri kiqꞌabꞌ pakiwiꞌ y xkiꞌan orar kukꞌ.

7 Jekꞌuriꞌlaꞌ ri Utzilaj Tzij re ri Qanimajawal lik xeꞌek utzijoxik y lik katajin kikꞌiyarik ri kajlibꞌal ri kikojom rubꞌiꞌ ri Cristo chiriꞌ Jerusalem. E kꞌo ne ukꞌiyal e aj chakunel pa Rocho Dios xkijeq kakitaqej ri Utzilaj Tzij.

8 Ri Esteban lik kꞌo ri unimal rutzil ukꞌuꞌx y ruchuqꞌabꞌ ri Dios rukꞌ. Ruma kꞌu riꞌ, kuꞌan nimaq taq kꞌutubꞌal re ruchuqꞌabꞌ ri Dios chikiwach ri winaq.

9 Ekꞌuchiriꞌ, xeyaktaj jujun re ri sinagoga, ri kabꞌiꞌx che “Ri sinagoga ke ri ebꞌelinaq lo pa ri kꞌax”,†Ri kebꞌopon pa wa jun sinagoga e taq raj judiꞌabꞌ ebꞌelinaq lo pakiqꞌabꞌ ri kajaw y woꞌora kechakun pa ke rike. yey kukꞌ rike xeyaktaj jujun e aj Cirene, e aj Alejandría, e aj Chipre y e aj Asia. E taq kꞌu riꞌ waꞌ xkijeqo xa pa chꞌaꞌtem kechꞌoꞌjin rukꞌ ri Esteban. 10 Yey na kakiriq ta ukꞌulik uwach ri kubꞌiꞌij ri Esteban ma rire kachꞌaꞌt rukꞌ ri naꞌoj uyaꞌom ri Ruxlabꞌixel ri Dios che. 11 Ekꞌu ri xkiꞌano e xekipuaqij jujun achijabꞌ chaꞌ kakibꞌiꞌij kitom tzel kachꞌaꞌt ri Esteban chirij ri Moisés y chirij ri Dios.

12 Xa jekꞌulaꞌ xekichꞌiꞌ wi taq ri winaq re ri tinamit, ri nimaq winaq e aj wach y raj kꞌutunel re ri tzijpixabꞌ. Konoje kꞌu riꞌ waꞌ xebꞌek chirij ri Esteban; rukꞌ oyowal xkichapo, xkikꞌam bꞌi y xeꞌkiyaꞌa chikiwach taq ri uchapom wi ribꞌ ri qꞌatbꞌal tzij.

13 Xekikoj kꞌu achijabꞌ e aj kojol raqꞌubꞌal chirij, jewaꞌ kakibꞌiꞌij: «Waꞌ waꞌchi lik xaqi tzel kachꞌaꞌt chirij wa Santowilaj Luwar re ri Rocho Dios y chirij Rutzij Upixabꞌ ri Dios. 14 Ma qatom kubꞌiꞌij, laꞌ la Jesús ri aj Nazaret kuwulij wa luwar y kujalkꞌatij janipa ri kꞌutunik y kojobꞌal yaꞌtal kan chiqe ruma ri Moisés» kechaꞌ.

15 Konoje kꞌu ri etzꞌul pa ri qꞌatbꞌal tzij, echiriꞌ xkitzuꞌ uwach ri Esteban, xkil rupalaj e pachaꞌ upalaj juna ángel.

<- Hechos 5Hechos 7 ->