1 Kꞌo kꞌu jun achi Ananías rubꞌiꞌ, junam rukꞌ ri rixoqil Safira xkikꞌayij chꞌaqap ulew. 2 Ekꞌu rachi kꞌo xresaj kan che ri rajil rulew, yey junam rukꞌ ri rixoqil xkiꞌan tzij chikiwach chaꞌ kakiꞌan raqꞌubꞌal puwi ri rajil rulew. Ekꞌu ri nikꞌaj chik che ri rajil xukꞌam bꞌi, xuꞌyaꞌa pakiqꞌabꞌ ri e taqoꞌn[a] y xubꞌiꞌij waꞌ e rajil rulew.

3 Ekꞌu ri Pedro xubꞌiꞌij che:

—Ananías, ¿suꞌchak xaya luwar che ri Satanás kok pa awanimaꞌ chaꞌ jelaꞌ kaꞌan raqꞌubꞌal chwach ri Santowilaj Ruxlabꞌixel ri Dios? Ma xabꞌiꞌij xaya ronoje ri rajil rulew, pero kꞌo xawesaj kan che. 4 Echiriꞌ kꞌamajaꞌ kakꞌayij rawulew, ¿na aweꞌat ta nebꞌa laꞌ? Y echiriꞌ akꞌayim chik, ¿na paqꞌabꞌ ta nebꞌa kꞌo wi kaꞌan rukꞌ ri rajil saꞌ ri kawaj? ¿Suꞌchak kꞌu riꞌ xaꞌan waꞌ? ¡Na chikiwach ta kꞌu achijabꞌ aꞌanom wi raqꞌubꞌal ma e chwach ri Dios! —xchaꞌ.

5 Xew kꞌu xuta waꞌ wa chꞌaꞌtem, ri Ananías xtzaq pulew y asu xkamik. Ruma kꞌu waꞌ, xpe jun xiꞌin ibꞌ pakiwi konoje ri xebꞌetaꞌman re. 6 Xekꞌun kꞌu lo jujun alabꞌo, xkipis rucuerpo, xkikꞌam bꞌi y xeꞌkimuquꞌ.

7 Laj oxibꞌ ora rikꞌowik waꞌ echiriꞌ xok lo ri Safira ri rixoqil ri Ananías; yey rire na retaꞌam ta kꞌu riꞌ saꞌ ri xukꞌulumaj ri rachijil.

8 Ekꞌuchiriꞌ, xutzꞌonoj ri Pedro che:

—Chabꞌiꞌij chwe: ¿E rajil waꞌ rulew xikꞌayij? —xcha che.

Rixoq xukꞌul uwach che:

—Areꞌ, e rajil laꞌ —xchaꞌ.

9 Xubꞌiꞌij kꞌu ri Pedro che:

—¿Suꞌchak xiꞌan tzij chiwach chaꞌ kikꞌam upa ri Ruxlabꞌixel ri Dios Qajawxel? ¡Chawilaꞌ! Ralabꞌo katajin lo kokik che ruchiꞌ ja, e laꞌ xetzelej lo che umuqik rawachijil, yey ekꞌu woꞌora e katkikꞌam bꞌi riꞌat —xchaꞌ.

10 Na jampatana xtzaq ri Safira chwach ri Pedro y asu xkamik. Ekꞌuchiriꞌ xebꞌok lo ralabꞌo, xoꞌlkiriqaꞌ kaminaq chik. Xkikꞌam kꞌu bꞌi y xeꞌkimuqu putzal ri rachijil. 11 Y xok kꞌu jun unimal xiꞌin ibꞌ kukꞌ konoje ri tinamit re ri Cristo y kukꞌ konoje ri xebꞌetaꞌman re taq waꞌ.

12 Kuma kꞌu ri e taqoꞌn re ri Cristo, ukꞌiyal kꞌutubꞌal re ruchuqꞌabꞌ ri Dios y nimaq taq chak katajin rilik chikiwach taq ri tikawex. Yey taq ri kikojom rubꞌiꞌ ri Cristo, lik xa jun kikꞌuꞌx kakimol kibꞌ pa ri luwar kabꞌiꞌx che “Ruchiꞌ Ja re Salomón”.[b]

13 E taq kꞌu ri kꞌamajaꞌ kakikoj rubꞌiꞌ ri Cristo, kakixiꞌij kibꞌ kakijunimaj kibꞌ kukꞌ, tobꞌ konoje ri tikawex lik kakiyak kiqꞌij. 14 Y katajin kꞌu kikꞌiyarik ri kikojom rubꞌiꞌ ri Qanimajawal, waꞌ e ukꞌiyal achijabꞌ y ukꞌiyal ixoqibꞌ.

15 Ruma taq kꞌu ri kꞌutubꞌal re ruchuqꞌabꞌ ri Dios kakiꞌan rutaqoꞌn ri Jesús, taq ri winaq kekesaj taq ne lo ri e yewaꞌibꞌ pa taq ri bꞌe. Ekiyaꞌom chwa chꞌat y chwa pop, chaꞌ we xikꞌow ri Pedro, tobꞌ xew luꞌmuꞌj katzaq pakiwiꞌ, kekunutaj kꞌu riꞌ. 16 E kꞌi ne ri e petinaq pa taq ri tinamit kꞌo lo chunaqaj Jerusalem. Ekikꞌamom lo ri yewaꞌibꞌ y ri echꞌuꞌjerinaq kuma itzelilaj uxlabꞌixel; y konoje kꞌut kekunutajik.

17 Ri kajawal raj chakunel pa Rocho Dios y konoje ri e kꞌo rukꞌ, waꞌ e ri saduceos, xujeq katiꞌtot kikꞌuꞌx chikij rutaqoꞌn ri Jesús ruma lik e kꞌi ri winaq eteran chikij. 18 Xekichap kꞌu bꞌi rutaqoꞌn ri Jesús y xebꞌeꞌkiyaꞌa pa ri cárcel re ri tinamit.

19 Xopon kꞌu jun ángel re ri Qanimajawal chaqꞌabꞌ, xuꞌjaqa taq ri okibꞌal re ri cárcel y xebꞌeresaj loq. Ekꞌuchiriꞌ, xubꞌiꞌij chike: 20 «Jix, jixeꞌtakꞌala pa ri Rocho Dios y chitzijoj chike ri winaq re ri tinamit ronoje puwi ri kꞌakꞌ bꞌe re kꞌaslemal» xchaꞌ. 21 Ruma kꞌu ri xkita che ri ángel, anim tan xebꞌok pa ri Rocho Dios y xkijeq kekꞌutunik.

Ekꞌu ri kajawal raj chakunel pa Rocho Dios yey ri e kꞌo rukꞌ, kꞌamajaꞌ kakinaꞌbꞌej riꞌ we rutaqoꞌn ri Jesús ebꞌesam chi lo pa ri cárcel. Xkimol kꞌu kichiꞌ taq ri uchapom wi ribꞌ ri qꞌatbꞌal tzij, kukꞌ konoje ri nimaq winaq ke raj Israel. Xekitaq kꞌu ri e chajinel re ri Rocho Dios che kikꞌamik rutaqoꞌn ri Jesús pa ri cárcel. 22 Ekꞌuchiriꞌ xebꞌopon ri e chajinel pa ri cárcel, na xekiriq ta chi rutaqoꞌn ri Jesús. Xetzelej kꞌu loq 23 y jewaꞌ xoꞌlkibꞌiꞌij: «Ri cárcel xqariqo lik tzꞌapil chi utz, yey raj chajinel e kꞌo ne chwach taq ri okibꞌal re ri cárcel. Pero echiriꞌ xqajaqo, na jinta chi junoq chike rutaqoꞌn ri Jesús chupa» xechaꞌ.

24 Echiriꞌ xkita waꞌ, xsach kinaꞌoj ri kajawal raj chakunel y raj wach ke ri e chajinel kukꞌ ri nimaq e aj chakunel re ri Rocho Dios. Konoje xkijeq kechꞌaꞌt puwiꞌ, ma na ketaꞌam taj saꞌ kukꞌisbꞌej wi ronoje waꞌ.

25 Ekꞌuchiriꞌ, xkꞌun lo jun y jewaꞌ xubꞌiꞌij: «E rachijabꞌ xeyaꞌ alaq pa cárcel, e kꞌo pa ri Rocho Dios y na koqꞌotam ta kekꞌutun chikiwach ri tinamit» xchaꞌ.

26 Ekꞌu raj wach ke ri e chajinel re ri Rocho Dios xeꞌek junam kukꞌ jujun e aj chajinel y xeꞌkikꞌama lo rutaqoꞌn ri Jesús. Yey na jinta kꞌo xkiꞌan chike ma kakixiꞌij kibꞌ we kakiꞌan kꞌax chike, laj keꞌan paꞌbꞌaj kuma ri tinamit. 27 Ekꞌuchiriꞌ xekikꞌam loq, xekiya chikiwach ri uchapom wi ribꞌ ri qꞌatbꞌal tzij. Ekꞌu ri kajawal raj chakunel pa Rocho Dios xutzꞌonoj chike rutaqoꞌn ri Jesús:

28 —¿Na xixqataq ta nebꞌa che chaꞌ na kixkꞌutun ta chi chupa rubꞌiꞌ wa jun achi? Yey woꞌora iwuma ne riꞌix xeꞌek utzijoxik wa kꞌutunik che ronoje Jerusalem; y na xew ta laꞌ, ma kiwaj ne kiya qeqlabꞌal che rukikꞌel laꞌ la jun achi —xechaꞌ.

29 Ri Pedro kukꞌ ri jujun chik e taqoꞌn re ri Jesús xkikꞌul uwach:

—Lik chirajawaxik wi nabꞌe na e kaqakoj utzij ri Dios chwach ri kaqakoj kitzij rachijabꞌ. 30 Ma ri Dios ke ri qatiꞌ-qamam e xkꞌastajisan lo ri Jesús chikixoꞌl ri ekaminaq. Yey e ralaq ri xkamisan alaq ma uma ralaq xyaꞌiꞌ ri Jesús chwa ri cruz. 31 Pero ri Dios lik xuyak uqꞌij ri Jesús, xuya puwikiqꞌabꞌ y xuꞌan Qajawal y Kolobꞌenel che; chaꞌ ruma ri Jesús, raj Israel kakitzelej kitzij chwach y kakiriq na ri kuybꞌal kimak.

32 »Ekꞌu riꞌoj, e janipa ri xqilo, e kaqatzijoj. Yey ri Santowilaj Ruxlabꞌixel ri Dios, ri Jun yaꞌtal chike ri kakikoj utzij ri Dios, e kajikibꞌan uwach waꞌ —xechaꞌ.

33 Echiriꞌ xkita waꞌ ri e aj wach, lik xpe koyowal chikij rutaqoꞌn ri Jesús y xkaj kekikamisaj.

34 Ekꞌuchiriꞌ, chikixoꞌl ri e aj qꞌatal tzij xyaktaj jun fariseo Gamaliel rubꞌiꞌ, aj kꞌutunel re ri tzijpixabꞌ yey lik yakom uqꞌij ruma ri tinamit. Rire xtaqan che kebꞌesax bꞌi joqꞌotaj ri e taqoꞌn re ri Jesús. 35 Tekꞌuchiriꞌ, xubꞌiꞌij:

«Achijabꞌ, alaq aj Israel, chꞌobꞌo na alaq raqan chi utz saꞌ ri kaꞌan alaq chike waꞌchijabꞌ. 36 Ma kꞌo tan qꞌij xyaktaj jun achi Teudas rubꞌiꞌ, yey chiribꞌil ribꞌ xubꞌiꞌij e jun achi lik kꞌo uwach. Laj e kajibꞌ ciento rachijabꞌ xeterej chirij. Pero xopon jun qꞌij rire xkamisaxik. Y konoje ri xesokotaj ruma rire, xekicher bꞌi; jekꞌulaꞌ, xsach uwach janipa ri xunoꞌjij.

37 »Chwi kꞌu riꞌ waꞌ, xyaktaj jun chik chupa taq ri qꞌij echiriꞌ xꞌan jun ajilanik. Waꞌ e ri Judas aj Galilea. Yey ukꞌiyal tikawex xeterej chirij. Pero xopon ruqꞌijol echiriꞌ xkamisaxik; y konoje kꞌu ri xesokotaj ruma rire, xekicher bꞌi.

38 »Kambꞌiꞌij kꞌu woꞌora che alaq: Mechꞌichꞌaꞌ chi alaq waꞌchijabꞌ; ri ꞌana alaq e cheyolopij bꞌi alaq. Ma we xa kinoꞌjibꞌal achijabꞌ wa kakikꞌutu, riꞌ kasach na uwach. 39 Noꞌj we waꞌ re ri Dios, na kachꞌij ta alaq usachik kiwach; y kꞌate kꞌu kanaꞌ alaq riꞌ kachꞌoꞌjin alaq rukꞌ ri Dios» xchaꞌ.

40 Konoje xukꞌul kikꞌuꞌx ri xubꞌiꞌij ri Gamaliel. Xekisikꞌij kꞌu ri e taqoꞌn re ri Jesús; tekꞌuchiriꞌ, xjichꞌ kipa rukꞌ kolobꞌ y xekitaq che na ketzijon ta chi chupa rubꞌiꞌ ri Jesús y xekiyolopij kꞌu bꞌi.

41 Xebꞌel kꞌu bꞌi ri e taqoꞌn chikiwach raj qꞌatal tzij. Lik kekiꞌkotik ma xyaꞌtaj chike kakitij kꞌax ruma kikojom rubꞌiꞌ ri Jesús. 42 Jekꞌulaꞌ, ronoje qꞌij na kakoqꞌotaj taj kekꞌutunik y kakitzijoj ri Utzilaj Tzij chwi ri Jesucristo chupa ri Rocho Dios y chiꞌ taq ja.

<- Hechos 4Hechos 6 ->